UtshovChapter 130
130.1
वैशंपायन उवाच
धृतराष्ट्रस्तु पुत्रस्य श्रुत्वा वचनमीदृशम्
मुहूर्तमिव संचिन्त्य दुर्योधनमथाब्रवीत्
Vaishampayana uvacha
Dhritarashtrastu putrasya shrutva vachanamidrisham
Muhurtamiva sanchintya duryodhanamathabravit
130.2
धर्मनित्यः सदा पाण्डुर्ममासीत्प्रियकृद्धितः
सर्वेषु ज्ञातिषु तथा मयि त्वासीद्विशेषतः
Dharmanityah sada pandurmamasitpriyakriddhitah
Sarveshu gyatishu tatha mayi tvasidvisheshatah
130.3
नास्य किंचिन्न जानामि भोजनादि चिकीर्षितम्
निवेदयति नित्यं हि मम राज्यं धृतव्रतः
Nasya kinchinna janami bhojanadi chikirshitam
Nivedayati nityam hi mama rajyam dhritavratah
130.4
तस्य पुत्रो यथा पाण्डुस्तथा धर्मपरायणः
गुणवाँल्लोकविख्यातः पौराणां च सुसंमतः
Tasya putro yatha pandustatha dharmaparayanah
Gunavanllokavikhyatah pauranam cha susammatah
130.5
स कथं शक्यमस्माभिरपक्रष्टुं बलादितः
पितृपैतामहाद्राज्यात्ससहायो विशेषतः
Sa katham shakyamasmabhirapakrashtum baladitah
Pitripaitamahadrajyatsasahayo visheshatah
130.6
भृता हि पाण्डुनामात्या बलं च सततं भृतम्
भृताः पुत्राश्च पौत्राश्च तेषामपि विशेषतः
Bhrita hi pandunamatya balam cha satatam bhritam
Bhritah putrashcha pautrashcha teshamapi visheshatah
130.7
ते पुरा सत्कृतास्तात पाण्डुना पौरवा जनाः
कथं युधिष्ठिरस्यार्थे न नो हन्युः सबान्धवान्
Te pura satkritastata panduna paurava janah
Katham yudhishthirasyarthe na no hanyuh sabandhavan
130.8
दुर्योधन उवाच
एवमेतन्मया तात भावितं दोषमात्मनि
दृष्ट्वा प्रकृतयः सर्वा अर्थमानेन योजिताः
Duryodhana uvacha
Evametanmaya tata bhavitam doshamatmani
Drishtva prakritayah sarva arthamanena yojitah
130.9
ध्रुवमस्मत्सहायास्ते भविष्यन्ति प्रधानतः
अर्थवर्गः सहामात्यो मत्संस्थोऽद्य महीपते
Dhruvamasmatsahayaste bhavishyanti pradhanatah
Arthavargah sahamatyo matsansthodya mahipate
130.10
स भवान्पाण्डवानाशु विवासयितुमर्हति
मृदुनैवाभ्युपायेन नगरं वारणावतम्
Sa bhavanpandavanashu vivasayitumarhati
Mridunaivabhyupayena nagaram varanavatam
130.11
यदा प्रतिष्ठितं राज्यं मयि राजन्भविष्यति
तदा कुन्ती सहापत्या पुनरेष्यति भारत
Yada pratishthitam rajyam mayi rajanbhavishyati
Tada kunti sahapatya punareshyati bharata
130.12
धृतराष्ट्र उवाच
दुर्योधन ममाप्येतद्धृदि संपरिवर्तते
अभिप्रायस्य पापत्वान्नैतत्तु विवृणोम्यहम्
Dhritarashtra uvacha
Duryodhana mamapyetaddhridi samparivartate
Abhiprayasya papatvannaitattu vivrinomyaham
130.13
न च भीष्मो न च द्रोणो न क्षत्ता न च गौतमः
विवास्यमानान्कौन्तेयाननुमंस्यन्ति कर्हिचित्
Na cha bhishmo na cha drono na kshatta na cha gautamah
Vivasyamanankaunteyananumansyanti karhichit
130.14
समा हि कौरवेयाणां वयमेते च पुत्रक
नैते विषममिच्छेयुर्धर्मयुक्ता मनस्विनः
Sama hi kauraveyanam vayamete cha putraka
Naite vishamamichchheyurdharmayukta manasvinah
130.15
ते वयं कौरवेयाणामेतेषां च महात्मनाम्
कथं न वध्यतां तात गच्छेम जगतस्तथा
Te vayam kauraveyanametesham cha mahatmanam
Katham na vadhyatam tata gachchhema jagatastatha
130.16
दुर्योधन उवाच
मध्यस्थः सततं भीष्मो द्रोणपुत्रो मयि स्थितः
यतः पुत्रस्ततो द्रोणो भविता नात्र सांशयः
Duryodhana uvacha
Madhyasthah satatam bhishmo dronaputro mayi sthitah
Yatah putrastato drono bhavita natra sanshayah
130.17
कृपः शारद्वतश्चैव यत एते त्रयस्ततः
द्रोणं च भागिनेयं च न स त्यक्ष्यति कर्हिचित्
Kripah sharadvatashchaiva yata ete trayastatah
Dronam cha bhagineyam cha na sa tyakshyati karhichit
130.18
क्षत्तार्थबद्धस्त्वस्माकं प्रच्छन्नं तु यतः परे
न चैकः स समर्थोऽस्मान्पाण्डवार्थे प्रबाधितुम्
Kshattarthabaddhastvasmakam prachchhannam tu yatah pare
Na chaikah sa samarthosmanpandavarthe prabadhitum
130.19
स विश्रब्धः पाण्डुपुत्रान्सह मात्रा विवासय
वारणावतमद्यैव नात्र दोषो भविष्यति
Sa vishrabdhah panduputransaha matra vivasaya
Varanavatamadyaiva natra dosho bhavishyati
130.20
विनिद्रकरणं घोरं हृदि शल्यमिवार्पितम्
शोकपावकमुद्भूतं कर्मणैतेन नाशय
Vinidrakaranam ghoram hridi shalyamivarpitam
Shokapavakamudbhutam karmanaitena nashaya