UtshovChapter 131
131.1
वैशंपायन उवाच
ततो दुर्योधनो राजा सर्वास्ताः प्रकृतीः शनैः
अर्थमानप्रदानाभ्यां संजहार सहानुजः
Vaishampayana uvacha
Tato duryodhano raja sarvastah prakritih shanaih
Arthamanapradanabhyam sanjahara sahanujah
131.2
धृतराष्ट्रप्रयुक्तास्तु केचित्कुशलमन्त्रिणः
कथयां चक्रिरे रम्यं नगरं वारणावतम्
Dhritarashtraprayuktastu kechitkushalamantrinah
Kathayam chakrire ramyam nagaram varanavatam
131.3
अयं समाजः सुमहान्रमणीयतमो भुवि
उपस्थितः पशुपतेर्नगरे वारणावते
Ayam samajah sumahanramaniyatamo bhuvi
Upasthitah pashupaternagare varanavate
131.4
सर्वरत्नसमाकीर्णे पुंसां देशे मनोरमे
इत्येवं धृतराष्ट्रस्य वचनाच्चक्रिरे कथाः
Sarvaratnasamakirne punsam deshe manorame
Ityevam dhritarashtrasya vachanachchakrire kathah
131.5
कथ्यमाने तथा रम्ये नगरे वारणावते
गमने पाण्डुपुत्राणां जज्ञे तत्र मतिर्नृप
Kathyamane tatha ramye nagare varanavate
Gamane panduputranam jagye tatra matirnripa
131.6
यदा त्वमन्यत नृपो जातकौतूहला इति
उवाचैनानथ तदा पाण्डवानम्बिकासुतः
Yada tvamanyata nripo jatakautuhala iti
Uvachainanatha tada pandavanambikasutah
131.7
ममेमे पुरुषा नित्यं कथयन्ति पुनः पुनः
रमणीयतरं लोके नगरं वारणावतम्
Mameme purusha nityam kathayanti punah punah
Ramaniyataram loke nagaram varanavatam
131.8
ते तात यदि मन्यध्वमुत्सवं वारणावते
सगणाः सानुयात्राश्च विहरध्वं यथामराः
Te tata yadi manyadhvamutsavam varanavate
Saganah sanuyatrashcha viharadhvam yathamarah
131.9
ब्राह्मणेभ्यश्च रत्नानि गायनेभ्यश्च सर्वशः
प्रयच्छध्वं यथाकामं देवा इव सुवर्चसः
Brahmanebhyashcha ratnani gayanebhyashcha sarvashah
Prayachchhadhvam yathakamam deva iva suvarchasah
131.10
कंचित्कालं विहृत्यैवमनुभूय परां मुदम्
इदं वै हास्तिनपुरं सुखिनः पुनरेष्यथ
Kanchitkalam vihrityaivamanubhuya param mudam
Idam vai hastinapuram sukhinah punareshyatha
131.11
धृतराष्ट्रस्य तं काममनुबुद्ध्वा युधिष्ठिरः
आत्मनश्चासहायत्वं तथेति प्रत्युवाच तम्
Dhritarashtrasya tam kamamanubuddhva yudhishthirah
Atmanashchasahayatvam tatheti pratyuvacha tam
131.12
ततो भीष्मं महाप्राज्ञं विदुरं च महामतिम्
द्रोणं च बाह्लिकं चैव सोमदत्तं च कौरवम्
Tato bhishmam mahapragyam viduram cha mahamatim
Dronam cha bahlikam chaiva somadattam cha kauravam
131.13
कृपमाचार्यपुत्रं च गान्धारीं च यशस्विनीम्
युधिष्ठिरः शनैर्दीनमुवाचेदं वचस्तदा
Kripamacharyaputram cha gandharim cha yashasvinim
Yudhishthirah shanairdinamuvachedam vachastada
131.14
रमणीये जनाकीर्णे नगरे वारणावते
सगणास्तात वत्स्यामो धृतराष्ट्रस्य शासनात्
Ramaniye janakirne nagare varanavate
Saganastata vatsyamo dhritarashtrasya shasanat
131.15
प्रसन्नमनसः सर्वे पुण्या वाचो विमुञ्चत
आशीर्भिर्वर्धितानस्मान्न पापं प्रसहिष्यति
Prasannamanasah sarve punya vacho vimunchata
Ashirbhirvardhitanasmanna papam prasahishyati
131.16
एवमुक्तास्तु ते सर्वे पाण्डुपुत्रेण कौरवाः
प्रसन्नवदना भूत्वा तेऽभ्यवर्तन्त पाण्डवान्
Evamuktastu te sarve panduputrena kauravah
Prasannavadana bhutva tebhyavartanta pandavan
131.17
स्वस्त्यस्तु वः पथि सदा भूतेभ्यश्चैव सर्वशः
मा च वोऽस्त्वशुभं किंचित्सर्वतः पाण्डुनन्दनाः
Svastyastu vah pathi sada bhutebhyashchaiva sarvashah
Ma cha vostvashubham kinchitsarvatah pandunandanah
131.18
ततः कृतस्वस्त्ययना राज्यलाभाय पाण्डवाः
कृत्वा सर्वाणि कार्याणि प्रययुर्वारणावतम्
Tatah kritasvastyayana rajyalabhaya pandavah
Kritva sarvani karyani prayayurvaranavatam