UtshovChapter 132
132.1
वैशंपायन उवाच
एवमुक्तेषु राज्ञा तु पाण्डवेषु महात्मसु
दुर्योधनः परं हर्षमाजगाम दुरात्मवान्
Vaishampayana uvacha
Evamukteshu ragya tu pandaveshu mahatmasu
Duryodhanah param harshamajagama duratmavan
132.2
स पुरोचनमेकान्तमानीय भरतर्षभ
गृहीत्वा दक्षिणे पाणौ सचिवं वाक्यमब्रवीत्
Sa purochanamekantamaniya bharatarshabha
Grihitva dakshine panau sachivam vakyamabravit
132.3
ममेयं वसुसंपूर्णा पुरोचन वसुंधरा
यथेयं मम तद्वत्ते स तां रक्षितुमर्हसि
Mameyam vasusampurna purochana vasundhara
Yatheyam mama tadvatte sa tam rakshitumarhasi
132.4
न हि मे कश्चिदन्योऽस्ति वैश्वासिकतरस्त्वया
सहायो येन संधाय मन्त्रयेयं यथा त्वया
Na hi me kashchidanyosti vaishvasikatarastvaya
Sahayo yena sandhaya mantrayeyam yatha tvaya
132.5
संरक्ष तात मन्त्रं च सपत्नांश्च ममोद्धर
निपुणेनाभ्युपायेन यद्ब्रवीमि तथा कुरु
Sanraksha tata mantram cha sapatnanshcha mamoddhara
Nipunenabhyupayena yadbravimi tatha kuru
132.6
पाण्डवा धृतराष्ट्रेण प्रेषिता वारणावतम्
उत्सवे विहरिष्यन्ति धृतराष्ट्रस्य शासनात्
Pandava dhritarashtrena preshita varanavatam
Utsave viharishyanti dhritarashtrasya shasanat
132.7
स त्वं रासभयुक्तेन स्यन्दनेनाशुगामिना
वारणावतमद्यैव यथा यासि तथा कुरु
Sa tvam rasabhayuktena syandanenashugamina
Varanavatamadyaiva yatha yasi tatha kuru
132.8
तत्र गत्वा चतुःशालं गृहं परमसंवृतम्
आयुधागारमाश्रित्य कारयेथा महाधनम्
Tatra gatva chatuhshalam griham paramasanvritam
Ayudhagaramashritya karayetha mahadhanam
132.9
शणसर्जरसादीनि यानि द्रव्याणि कानिचित्
आग्नेयान्युत सन्तीह तानि सर्वाणि दापय
Shanasarjarasadini yani dravyani kanichit
Agneyanyuta santiha tani sarvani dapaya
132.10
सर्पिषा च सतैलेन लाक्षया चाप्यनल्पया
मृत्तिकां मिश्रयित्वा त्वं लेपं कुड्येषु दापयेः
Sarpisha cha satailena lakshaya chapyanalpaya
Mrittikam mishrayitva tvam lepam kudyeshu dapayeh
132.11
शणान्वंशं घृतं दारु यन्त्राणि विविधानि च
तस्मिन्वेश्मनि सर्वाणि निक्षिपेथाः समन्ततः
Shananvansham ghritam daru yantrani vividhani cha
Tasminveshmani sarvani nikshipethah samantatah
132.12
यथा च त्वां न शङ्केरन्परीक्षन्तोऽपि पाण्डवाः
आग्नेयमिति तत्कार्यमिति चान्ये च मानवाः
Yatha cha tvam na shankeranparikshantopi pandavah
Agneyamiti tatkaryamiti chanye cha manavah
132.13
वेश्मन्येवं कृते तत्र कृत्वा तान्परमार्चितान्
वासयेः पाण्डवेयांश्च कुन्तीं च ससुहृज्जनाम्
Veshmanyevam krite tatra kritva tanparamarchitan
Vasayeh pandaveyanshcha kuntim cha sasuhrijjanam
132.14
तत्रासनानि मुख्यानि यानानि शयनानि च
विधातव्यानि पाण्डूनां यथा तुष्येत मे पिता
Tatrasanani mukhyani yanani shayanani cha
Vidhatavyani pandunam yatha tushyeta me pita
132.15
यथा रमेरन्विश्रब्धा नगरे वारणावते
तथा सर्वं विधातव्यं यावत्कालस्य पर्ययः
Yatha rameranvishrabdha nagare varanavate
Tatha sarvam vidhatavyam yavatkalasya paryayah
132.16
ज्ञात्वा तु तान्सुविश्वस्ताञ्शयानानकुतोभयान्
अग्निस्ततस्त्वया देयो द्वारतस्तस्य वेश्मनः
Gyatva tu tansuvishvastanshayananakutobhayan
Agnistatastvaya deyo dvaratastasya veshmanah
132.17
दग्धानेवं स्वके गेहे दग्धा इति ततो जनाः
ज्ञातयो वा वदिष्यन्ति पाण्डवार्थाय कर्हिचित्
Dagdhanevam svake gehe dagdha iti tato janah
Gyatayo va vadishyanti pandavarthaya karhichit
132.18
तत्तथेति प्रतिज्ञाय कौरवाय पुरोचनः
प्रायाद्रासभयुक्तेन नगरं वारणावतम्
Tattatheti pratigyaya kauravaya purochanah
Prayadrasabhayuktena nagaram varanavatam
132.19
स गत्वा त्वरितो राजन्दुर्योधनमते स्थितः
यथोक्तं राजपुत्रेण सर्वं चक्रे पुरोचनः
Sa gatva tvarito rajanduryodhanamate sthitah
Yathoktam rajaputrena sarvam chakre purochanah