UtshovChapter 144
144.1
वैशंपायन उवाच
ते वनेन वनं वीरा घ्नन्तो मृगगणान्बहून्
अपक्रम्य ययू राजंस्त्वरमाणा महारथाः
Vaishampayana uvacha
Te vanena vanam vira ghnanto mrigagananbahun
Apakramya yayu rajanstvaramana maharathah
144.2
मत्स्यांस्त्रिगर्तान्पाञ्चालान्कीचकानन्तरेण च
रमणीयान्वनोद्देशान्प्रेक्षमाणाः सरांसि च
Matsyanstrigartanpanchalankichakanantarena cha
Ramaniyanvanoddeshanprekshamanah saransi cha
144.3
जटाः कृत्वात्मनः सर्वे वल्कलाजिनवाससः
सह कुन्त्या महात्मानो बिभ्रतस्तापसं वपुः
Jatah kritvatmanah sarve valkalajinavasasah
Saha kuntya mahatmano bibhratastapasam vapuh
144.4
क्वचिद्वहन्तो जननीं त्वरमाणा महारथाः
क्वचिच्छन्देन गच्छन्तस्ते जग्मुः प्रसभं पुनः
Kvachidvahanto jananim tvaramana maharathah
Kvachichchhandena gachchhantaste jagmuh prasabham punah
144.5
ब्राह्मं वेदमधीयाना वेदाङ्गानि च सर्वशः
नीतिशास्त्रं च धर्मज्ञा ददृशुस्ते पितामहम्
Brahmam vedamadhiyana vedangani cha sarvashah
Nitishastram cha dharmagya dadrishuste pitamaham
144.6
तेऽभिवाद्य महात्मानं कृष्णद्वैपायनं तदा
तस्थुः प्राञ्जलयः सर्वे सह मात्रा परंतपाः
Tebhivadya mahatmanam krishnadvaipayanam tada
Tasthuh pranjalayah sarve saha matra parantapah
144.7
व्यास उवाच
मयेदं मनसा पूर्वं विदितं भरतर्षभाः
यथा स्थितैरधर्मेण धार्तराष्ट्रैर्विवासिताः
Vyasa uvacha
Mayedam manasa purvam viditam bharatarshabhah
Yatha sthitairadharmena dhartarashtrairvivasitah
144.8
तद्विदित्वास्मि संप्राप्तश्चिकीर्षुः परमं हितम्
न विषादोऽत्र कर्तव्यः सर्वमेतत्सुखाय वः
Tadviditvasmi sampraptashchikirshuh paramam hitam
Na vishadotra kartavyah sarvametatsukhaya vah
144.9
समास्ते चैव मे सर्वे यूयं चैव न संशयः
दीनतो बालतश्चैव स्नेहं कुर्वन्ति बान्धवाः
Samaste chaiva me sarve yuyam chaiva na sanshayah
Dinato balatashchaiva sneham kurvanti bandhavah
144.10
तस्मादभ्यधिकः स्नेहो युष्मासु मम सांप्रतम्
स्नेहपूर्वं चिकीर्षामि हितं वस्तन्निबोधत
Tasmadabhyadhikah sneho yushmasu mama sampratam
Snehapurvam chikirshami hitam vastannibodhata
144.11
इदं नगरमभ्याशे रमणीयं निरामयम्
वसतेह प्रतिच्छन्ना ममागमनकाङ्क्षिणः
Idam nagaramabhyashe ramaniyam niramayam
Vasateha pratichchhanna mamagamanakankshinah
144.12
वैशंपायन उवाच
एवं स तान्समाश्वास्य व्यासः पार्थानरिंदमान्
एकचक्रामभिगतः कुन्तीमाश्वासयत्प्रभुः
Vaishampayana uvacha
Evam sa tansamashvasya vyasah parthanarindaman
Ekachakramabhigatah kuntimashvasayatprabhuh
144.13
जीवपुत्रि सुतस्तेऽयं धर्मपुत्रो युधिष्ठिरः
पृथिव्यां पार्थिवान्सर्वान्प्रशासिष्यति धर्मराट्
Jivaputri sutasteyam dharmaputro yudhishthirah
Prithivyam parthivansarvanprashasishyati dharmarat
144.14
धर्मेण जित्वा पृथिवीमखिलां धर्मविद्वशी
भीमसेनार्जुनबलाद्भोक्ष्यत्ययमसंशयः
Dharmena jitva prithivimakhilam dharmavidvashi
Bhimasenarjunabaladbhokshyatyayamasanshayah
144.15
पुत्रास्तव च माद्र्याश्च सर्व एव महारथाः
स्वराष्ट्रे विहरिष्यन्ति सुखं सुमनसस्तदा
Putrastava cha madryashcha sarva eva maharathah
Svarashtre viharishyanti sukham sumanasastada
144.16
यक्ष्यन्ति च नरव्याघ्रा विजित्य पृथिवीमिमाम्
राजसूयाश्वमेधाद्यैः क्रतुभिर्भूरिदक्षिणैः
Yakshyanti cha naravyaghra vijitya prithivimimam
Rajasuyashvamedhadyaih kratubhirbhuridakshinaih
144.17
अनुगृह्य सुहृद्वर्गं धनेन च सुखेन च
पितृपैतामहं राज्यमिह भोक्ष्यन्ति ते सुताः
Anugrihya suhridvargam dhanena cha sukhena cha
Pitripaitamaham rajyamiha bhokshyanti te sutah
144.18
एवमुक्त्वा निवेश्यैनान्ब्राह्मणस्य निवेशने
अब्रवीत्पार्थिवश्रेष्ठमृषिर्द्वैपायनस्तदा
Evamuktva niveshyainanbrahmanasya niveshane
Abravitparthivashreshthamrishirdvaipayanastada
144.19
इह मां संप्रतीक्षध्वमागमिष्याम्यहं पुनः
देशकालौ विदित्वैव वेत्स्यध्वं परमां मुदम्
Iha mam sampratikshadhvamagamishyamyaham punah
Deshakalau viditvaiva vetsyadhvam paramam mudam
144.20
स तैः प्राञ्जलिभिः सर्वैस्तथेत्युक्तो नराधिप
जगाम भगवान्व्यासो यथाकाममृषिः प्रभुः
Sa taih pranjalibhih sarvaistathetyukto naradhipa
Jagama bhagavanvyaso yathakamamrishih prabhuh