Chapter 156

156.1

वैशंपायन उवाच
एतच्छ्रुत्वा तु कौन्तेयाः शल्यविद्धा इवाभवन्
सर्वे चास्वस्थमनसो बभूवुस्ते महारथाः

Vaishampayana uvacha
Etachchhrutva tu kaunteyah shalyaviddha ivabhavan
Sarve chasvasthamanaso babhuvuste maharathah

ततः कुन्ती सुतान्दृष्ट्वा विभ्रान्तान्गतचेतसः
युधिष्ठिरमुवाचेदं वचनं सत्यवादिनी

Tatah kunti sutandrishtva vibhrantangatachetasah
Yudhishthiramuvachedam vachanam satyavadini

चिररात्रोषिताः स्मेह ब्राह्मणस्य निवेशने
रममाणाः पुरे रम्ये लब्धभैक्षा युधिष्ठिर

Chiraratroshitah smeha brahmanasya niveshane
Ramamanah pure ramye labdhabhaiksha yudhishthira

यानीह रमणीयानि वनान्युपवनानि च
सर्वाणि तानि दृष्टानि पुनः पुनररिंदम

Yaniha ramaniyani vananyupavanani cha
Sarvani tani drishtani punah punararindama

पुनर्दृष्टानि तान्येव प्रीणयन्ति न नस्तथा
भैक्षं च न तथा वीर लभ्यते कुरुनन्दन

Punardrishtani tanyeva prinayanti na nastatha
Bhaiksham cha na tatha vira labhyate kurunandana

ते वयं साधु पाञ्चालान्गच्छाम यदि मन्यसे
अपूर्वदर्शनं तात रमणीयं भविष्यति

Te vayam sadhu panchalangachchhama yadi manyase
Apurvadarshanam tata ramaniyam bhavishyati

सुभिक्षाश्चैव पाञ्चालाः श्रूयन्ते शत्रुकर्शन
यज्ञसेनश्च राजासौ ब्रह्मण्य इति शुश्रुमः

Subhikshashchaiva panchalah shruyante shatrukarshana
Yagyasenashcha rajasau brahmanya iti shushrumah

एकत्र चिरवासो हि क्षमो न च मतो मम
ते तत्र साधु गच्छामो यदि त्वं पुत्र मन्यसे

Ekatra chiravaso hi kshamo na cha mato mama
Te tatra sadhu gachchhamo yadi tvam putra manyase

युधिष्ठिर उवाच
भवत्या यन्मतं कार्यं तदस्माकं परं हितम्
अनुजांस्तु न जानामि गच्छेयुर्नेति वा पुनः

Yudhishthira uvacha
Bhavatya yanmatam karyam tadasmakam param hitam
Anujanstu na janami gachchheyurneti va punah

वैशंपायन उवाच
ततः कुन्ती भीमसेनमर्जुनं यमजौ तथा
उवाच गमनं ते च तथेत्येवाब्रुवंस्तदा

Vaishampayana uvacha
Tatah kunti bhimasenamarjunam yamajau tatha
Uvacha gamanam te cha tathetyevabruvanstada

तत आमन्त्र्य तं विप्रं कुन्ती राजन्सुतैः सह
प्रतस्थे नगरीं रम्यां द्रुपदस्य महात्मनः

Tata amantrya tam vipram kunti rajansutaih saha
Pratasthe nagarim ramyam drupadasya mahatmanah