UtshovChapter 157
157.1
वैशंपायन उवाच
वसत्सु तेषु प्रच्छन्नं पाण्डवेषु महात्मसु
आजगामाथ तान्द्रष्टुं व्यासः सत्यवतीसुतः
Vaishampayana uvacha
Vasatsu teshu prachchhannam pandaveshu mahatmasu
Ajagamatha tandrashtum vyasah satyavatisutah
157.2
तमागतमभिप्रेक्ष्य प्रत्युद्गम्य परंतपाः
प्रणिपत्याभिवाद्यैनं तस्थुः प्राञ्जलयस्तदा
Tamagatamabhiprekshya pratyudgamya parantapah
Pranipatyabhivadyainam tasthuh pranjalayastada
157.3
समनुज्ञाप्य तान्सर्वानासीनान्मुनिरब्रवीत्
प्रसन्नः पूजितः पार्थैः प्रीतिपूर्वमिदं वचः
Samanugyapya tansarvanasinanmunirabravit
Prasannah pujitah parthaih pritipurvamidam vachah
157.4
अपि धर्मेण वर्तध्वं शास्त्रेण च परंतपाः
अपि विप्रेषु वः पूजा पूजार्हेषु न हीयते
Api dharmena vartadhvam shastrena cha parantapah
Api vipreshu vah puja pujarheshu na hiyate
157.5
अथ धर्मार्थवद्वाक्यमुक्त्वा स भगवानृषिः
विचित्राश्च कथास्तास्ताः पुनरेवेदमब्रवीत्
Atha dharmarthavadvakyamuktva sa bhagavanrishih
Vichitrashcha kathastastah punarevedamabravit
157.6
आसीत्तपोवने काचिदृषेः कन्या महात्मनः
विलग्नमध्या सुश्रोणी सुभ्रूः सर्वगुणान्विता
Asittapovane kachidrisheh kanya mahatmanah
Vilagnamadhya sushroni subhruh sarvagunanvita
157.7
कर्मभिः स्वकृतैः सा तु दुर्भगा समपद्यत
नाध्यगच्छत्पतिं सा तु कन्या रूपवती सती
Karmabhih svakritaih sa tu durbhaga samapadyata
Nadhyagachchhatpatim sa tu kanya rupavati sati
157.8
तपस्तप्तुमथारेभे पत्यर्थमसुखा ततः
तोषयामास तपसा सा किलोग्रेण शंकरम्
Tapastaptumatharebhe patyarthamasukha tatah
Toshayamasa tapasa sa kilogrena shankaram
157.9
तस्याः स भगवांस्तुष्टस्तामुवाच तपस्विनीम्
वरं वरय भद्रं ते वरदोऽस्मीति भामिनि
Tasyah sa bhagavanstushtastamuvacha tapasvinim
Varam varaya bhadram te varadosmiti bhamini
157.10
अथेश्वरमुवाचेदमात्मनः सा वचो हितम्
पतिं सर्वगुणोपेतमिच्छामीति पुनः पुनः
Atheshvaramuvachedamatmanah sa vacho hitam
Patim sarvagunopetamichchhamiti punah punah
157.11
तामथ प्रत्युवाचेदमीशानो वदतां वरः
पञ्च ते पतयो भद्रे भविष्यन्तीति शंकरः
Tamatha pratyuvachedamishano vadatam varah
Pancha te patayo bhadre bhavishyantiti shankarah
157.12
प्रतिब्रुवन्तीमेकं मे पतिं देहीति शंकरम्
पुनरेवाब्रवीद्देव इदं वचनमुत्तमम्
Pratibruvantimekam me patim dehiti shankaram
Punarevabraviddeva idam vachanamuttamam
157.13
पञ्चकृत्वस्त्वया उक्तः पतिं देहीत्यहं पुनः
देहमन्यं गतायास्ते यथोक्तं तद्भविष्यति
Panchakritvastvaya uktah patim dehityaham punah
Dehamanyam gatayaste yathoktam tadbhavishyati
157.14
द्रुपदस्य कुले जाता कन्या सा देवरूपिणी
निर्दिष्टा भवतां पत्नी कृष्णा पार्षत्यनिन्दिता
Drupadasya kule jata kanya sa devarupini
Nirdishta bhavatam patni krishna parshatyanindita
157.15
पाञ्चालनगरं तस्मात्प्रविशध्वं महाबलाः
सुखिनस्तामनुप्राप्य भविष्यथ न संशयः
Panchalanagaram tasmatpravishadhvam mahabalah
Sukhinastamanuprapya bhavishyatha na sanshayah
157.16
एवमुक्त्वा महाभागः पाण्डवानां पितामहः
पार्थानामन्त्र्य कुन्तीं च प्रातिष्ठत महातपाः
Evamuktva mahabhagah pandavanam pitamahah
Parthanamantrya kuntim cha pratishthata mahatapah