UtshovChapter 159
159.1
अर्जुन उवाच
कारणं ब्रूहि गन्धर्व किं तद्येन स्म धर्षिताः
यान्तो ब्रह्मविदः सन्तः सर्वे रात्रावरिंदम
Arjuna uvacha
Karanam bruhi gandharva kim tadyena sma dharshitah
Yanto brahmavidah santah sarve ratravarindama
159.2
गन्धर्व उवाच
अनग्नयोऽनाहुतयो न च विप्रपुरस्कृताः
यूयं ततो धर्षिताः स्थ मया पाण्डवनन्दन
Gandharva uvacha
Anagnayonahutayo na cha viprapuraskritah
Yuyam tato dharshitah stha maya pandavanandana
159.3
यक्षराक्षसगन्धर्वाः पिशाचोरगमानवाः
विस्तरं कुरुवंशस्य श्रीमतः कथयन्ति ते
Yaksharakshasagandharvah pishachoragamanavah
Vistaram kuruvanshasya shrimatah kathayanti te
159.4
नारदप्रभृतीनां च देवर्षीणां मया श्रुतम्
गुणान्कथयतां वीर पूर्वेषां तव धीमताम्
Naradaprabhritinam cha devarshinam maya shrutam
Gunankathayatam vira purvesham tava dhimatam
159.5
स्वयं चापि मया दृष्टश्चरता सागराम्बराम्
इमां वसुमतीं कृत्स्नां प्रभावः स्वकुलस्य ते
Svayam chapi maya drishtashcharata sagarambaram
Imam vasumatim kritsnam prabhavah svakulasya te
159.6
वेदे धनुषि चाचार्यमभिजानामि तेऽर्जुन
विश्रुतं त्रिषु लोकेषु भारद्वाजं यशस्विनम्
Vede dhanushi chacharyamabhijanami terjuna
Vishrutam trishu lokeshu bharadvajam yashasvinam
159.7
धर्मं वायुं च शक्रं च विजानाम्यश्विनौ तथा
पाण्डुं च कुरुशार्दूल षडेतान्कुलवर्धनान्
पितॄनेतानहं पार्थ देवमानुषसत्तमान्
Dharmam vayum cha shakram cha vijanamyashvinau tatha
Pandum cha kurushardula shadetankulavardhanan
Pitrinetanaham partha devamanushasattaman
159.8
दिव्यात्मानो महात्मानः सर्वशस्त्रभृतां वराः
भवन्तो भ्रातरः शूराः सर्वे सुचरितव्रताः
Divyatmano mahatmanah sarvashastrabhritam varah
Bhavanto bhratarah shurah sarve sucharitavratah
159.9
उत्तमां तु मनोबुद्धिं भवतां भावितात्मनाम्
जानन्नपि च वः पार्थ कृतवानिह धर्षणाम्
Uttamam tu manobuddhim bhavatam bhavitatmanam
Janannapi cha vah partha kritavaniha dharshanam
159.10
स्त्रीसकाशे च कौरव्य न पुमान्क्षन्तुमर्हति
धर्षणामात्मनः पश्यन्बाहुद्रविणमाश्रितः
Strisakashe cha kauravya na pumankshantumarhati
Dharshanamatmanah pashyanbahudravinamashritah
159.11
नक्तं च बलमस्माकं भूय एवाभिवर्धते
यतस्ततो मां कौन्तेय सदारं मन्युराविशत्
Naktam cha balamasmakam bhuya evabhivardhate
Yatastato mam kaunteya sadaram manyuravishat
159.12
सोऽहं त्वयेह विजितः संख्ये तापत्यवर्धन
येन तेनेह विधिना कीर्त्यमानं निबोध मे
Soham tvayeha vijitah sankhye tapatyavardhana
Yena teneha vidhina kirtyamanam nibodha me
159.13
ब्रह्मचर्यं परो धर्मः स चापि नियतस्त्वयि
यस्मात्तस्मादहं पार्थ रणेऽस्मिन्विजितस्त्वया
Brahmacharyam paro dharmah sa chapi niyatastvayi
Yasmattasmadaham partha ranesminvijitastvaya
159.14
यस्तु स्यात्क्षत्रियः कश्चित्कामवृत्तः परंतप
नक्तं च युधि युध्येत न स जीवेत्कथंचन
Yastu syatkshatriyah kashchitkamavrittah parantapa
Naktam cha yudhi yudhyeta na sa jivetkathanchana
159.15
यस्तु स्यात्कामवृत्तोऽपि राजा तापत्य संगरे
जयेन्नक्तंचरान्सर्वान्स पुरोहितधूर्गतः
Yastu syatkamavrittopi raja tapatya sangare
Jayennaktancharansarvansa purohitadhurgatah
159.16
तस्मात्तापत्य यत्किंचिन्नृणां श्रेय इहेप्सितम्
तस्मिन्कर्मणि योक्तव्या दान्तात्मानः पुरोहिताः
Tasmattapatya yatkinchinnrinam shreya ihepsitam
Tasminkarmani yoktavya dantatmanah purohitah
159.17
वेदे षडङ्गे निरताः शुचयः सत्यवादिनः
धर्मात्मानः कृतात्मानः स्युर्नृपाणां पुरोहिताः
Vede shadange niratah shuchayah satyavadinah
Dharmatmanah kritatmanah syurnripanam purohitah
159.18
जयश्च नियतो राज्ञः स्वर्गश्च स्यादनन्तरम्
यस्य स्याद्धर्मविद्वाग्मी पुरोधाः शीलवाञ्शुचिः
Jayashcha niyato ragyah svargashcha syadanantaram
Yasya syaddharmavidvagmi purodhah shilavanshuchih
159.19
लाभं लब्धुमलब्धं हि लब्धं च परिरक्षितुम्
पुरोहितं प्रकुर्वीत राजा गुणसमन्वितम्
Labham labdhumalabdham hi labdham cha parirakshitum
Purohitam prakurvita raja gunasamanvitam
159.20
पुरोहितमते तिष्ठेद्य इच्छेत्पृथिवीं नृपः
प्राप्तुं मेरुवरोत्तंसां सर्वशः सागराम्बराम्
Purohitamate tishthedya ichchhetprithivim nripah
Praptum meruvarottansam sarvashah sagarambaram
159.21
न हि केवलशौर्येण तापत्याभिजनेन च
जयेदब्राह्मणः कश्चिद्भूमिं भूमिपतिः क्वचित्
Na hi kevalashauryena tapatyabhijanena cha
Jayedabrahmanah kashchidbhumim bhumipatih kvachit
159.22
तस्मादेवं विजानीहि कुरूणां वंशवर्धन
ब्राह्मणप्रमुखं राज्यं शक्यं पालयितुं चिरम्
Tasmadevam vijanihi kurunam vanshavardhana
Brahmanapramukham rajyam shakyam palayitum chiram