UtshovChapter 161
161.1
गन्धर्व उवाच
अथ तस्यामदृश्यायां नृपतिः काममोहितः
पातनः शत्रुसंघानां पपात धरणीतले
Gandharva uvacha
Atha tasyamadrishyayam nripatih kamamohitah
Patanah shatrusanghanam papata dharanitale
161.2
तस्मिन्निपतिते भूमावथ सा चारुहासिनी
पुनः पीनायतश्रोणी दर्शयामास तं नृपम्
Tasminnipatite bhumavatha sa charuhasini
Punah pinayatashroni darshayamasa tam nripam
161.3
अथाबभाषे कल्याणी वाचा मधुरया नृपम्
तं कुरूणां कुलकरं कामाभिहतचेतसम्
Athababhashe kalyani vacha madhuraya nripam
Tam kurunam kulakaram kamabhihatachetasam
161.4
उत्तिष्ठोत्तिष्ठ भद्रं ते न त्वमर्हस्यरिंदम
मोहं नृपतिशार्दूल गन्तुमाविष्कृतः क्षितौ
Uttishthottishtha bhadram te na tvamarhasyarindama
Moham nripatishardula gantumavishkritah kshitau
161.5
एवमुक्तोऽथ नृपतिर्वाचा मधुरया तदा
ददर्श विपुलश्रोणीं तामेवाभिमुखे स्थिताम्
Evamuktotha nripatirvacha madhuraya tada
Dadarsha vipulashronim tamevabhimukhe sthitam
161.6
अथ तामसितापाङ्गीमाबभाषे नराधिपः
मन्मथाग्निपरीतात्मा संदिग्धाक्षरया गिरा
Atha tamasitapangimababhashe naradhipah
Manmathagniparitatma sandigdhaksharaya gira
161.7
साधु मामसितापाङ्गे कामार्तं मत्तकाशिनि
भजस्व भजमानं मां प्राणा हि प्रजहन्ति माम्
Sadhu mamasitapange kamartam mattakashini
Bhajasva bhajamanam mam prana hi prajahanti mam
161.8
त्वदर्थं हि विशालाक्षि मामयं निशितैः शरैः
कामः कमलगर्भाभे प्रतिविध्यन्न शाम्यति
Tvadartham hi vishalakshi mamayam nishitaih sharaih
Kamah kamalagarbhabhe pratividhyanna shamyati
161.9
ग्रस्तमेवमनाक्रन्दे भद्रे काममहाहिना
सा त्वं पीनायतश्रोणि पर्याप्नुहि शुभानने
Grastamevamanakrande bhadre kamamahahina
Sa tvam pinayatashroni paryapnuhi shubhanane
161.10
त्वय्यधीना हि मे प्राणाः किंनरोद्गीतभाषिणि
चारुसर्वानवद्याङ्गि पद्मेन्दुसदृशानने
Tvayyadhina hi me pranah kinnarodgitabhashini
Charusarvanavadyangi padmendusadrishanane
161.11
न ह्यहं त्वदृते भीरु शक्ष्ये जीवितुमात्मना
तस्मात्कुरु विशालाक्षि मय्यनुक्रोशमङ्गने
Na hyaham tvadrite bhiru shakshye jivitumatmana
Tasmatkuru vishalakshi mayyanukroshamangane
161.12
भक्तं मामसितापाङ्गे न परित्यक्तुमर्हसि
त्वं हि मां प्रीतियोगेन त्रातुमर्हसि भामिनि
Bhaktam mamasitapange na parityaktumarhasi
Tvam hi mam pritiyogena tratumarhasi bhamini
161.13
गान्धर्वेण च मां भीरु विवाहेनैहि सुन्दरि
विवाहानां हि रम्भोरु गान्धर्वः श्रेष्ठ उच्यते
Gandharvena cha mam bhiru vivahenaihi sundari
Vivahanam hi rambhoru gandharvah shreshtha uchyate
161.14
तपत्युवाच
नाहमीशात्मनो राजन्कन्या पितृमती ह्यहम्
मयि चेदस्ति ते प्रीतिर्याचस्व पितरं मम
Tapatyuvacha
Nahamishatmano rajankanya pitrimati hyaham
Mayi chedasti te pritiryachasva pitaram mama
161.15
यथा हि ते मया प्राणाः संगृहीता नरेश्वर
दर्शनादेव भूयस्त्वं तथा प्राणान्ममाहरः
Yatha hi te maya pranah sangrihita nareshvara
Darshanadeva bhuyastvam tatha prananmamaharah
161.16
न चाहमीशा देहस्य तस्मान्नृपतिसत्तम
समीपं नोपगच्छामि न स्वतन्त्रा हि योषितः
Na chahamisha dehasya tasmannripatisattama
Samipam nopagachchhami na svatantra hi yoshitah
161.17
का हि सर्वेषु लोकेषु विश्रुताभिजनं नृपम्
कन्या नाभिलषेन्नाथं भर्तारं भक्तवत्सलम्
Ka hi sarveshu lokeshu vishrutabhijanam nripam
Kanya nabhilashennatham bhartaram bhaktavatsalam
161.18
तस्मादेवंगते काले याचस्व पितरं मम
आदित्यं प्रणिपातेन तपसा नियमेन च
Tasmadevangate kale yachasva pitaram mama
Adityam pranipatena tapasa niyamena cha
161.19
स चेत्कामयते दातुं तव मामरिमर्दन
भविष्याम्यथ ते राजन्सततं वशवर्तिनी
Sa chetkamayate datum tava mamarimardana
Bhavishyamyatha te rajansatatam vashavartini
161.20
अहं हि तपती नाम सावित्र्यवरजा सुता
अस्य लोकप्रदीपस्य सवितुः क्षत्रियर्षभ
Aham hi tapati nama savitryavaraja suta
Asya lokapradipasya savituh kshatriyarshabha