UtshovChapter 164
164.1
वैशंपायन उवाच
स गन्धर्ववचः श्रुत्वा तत्तदा भरतर्षभ
अर्जुनः परया प्रीत्या पूर्णचन्द्र इवाबभौ
Vaishampayana uvacha
Sa gandharvavachah shrutva tattada bharatarshabha
Arjunah paraya pritya purnachandra ivababhau
164.2
उवाच च महेष्वासो गन्धर्वं कुरुसत्तमः
जातकौतूहलोऽतीव वसिष्ठस्य तपोबलात्
Uvacha cha maheshvaso gandharvam kurusattamah
Jatakautuhalotiva vasishthasya tapobalat
164.3
वसिष्ठ इति यस्यैतदृषेर्नाम त्वयेरितम्
एतदिच्छाम्यहं श्रोतुं यथावत्तद्वदस्व मे
Vasishtha iti yasyaitadrishernama tvayeritam
Etadichchhamyaham shrotum yathavattadvadasva me
164.4
य एष गन्धर्वपते पूर्वेषां नः पुरोहितः
आसीदेतन्ममाचक्ष्व क एष भगवानृषिः
Ya esha gandharvapate purvesham nah purohitah
Asidetanmamachakshva ka esha bhagavanrishih
164.5
गन्धर्व उवाच
तपसा निर्जितौ शश्वदजेयावमरैरपि
कामक्रोधावुभौ यस्य चरणौ संववाहतुः
Gandharva uvacha
Tapasa nirjitau shashvadajeyavamarairapi
Kamakrodhavubhau yasya charanau sanvavahatuh
164.6
यस्तु नोच्छेदनं चक्रे कुशिकानामुदारधीः
विश्वामित्रापराधेन धारयन्मन्युमुत्तमम्
Yastu nochchhedanam chakre kushikanamudaradhih
Vishvamitraparadhena dharayanmanyumuttamam
164.7
पुत्रव्यसनसंतप्तः शक्तिमानपि यः प्रभुः
विश्वामित्रविनाशाय न मेने कर्म दारुणम्
Putravyasanasantaptah shaktimanapi yah prabhuh
Vishvamitravinashaya na mene karma darunam
164.8
मृतांश्च पुनराहर्तुं यः स पुत्रान्यमक्षयात्
कृतान्तं नातिचक्राम वेलामिव महोदधिः
Mritanshcha punarahartum yah sa putranyamakshayat
Kritantam natichakrama velamiva mahodadhih
164.9
यं प्राप्य विजितात्मानं महात्मानं नराधिपाः
इक्ष्वाकवो महीपाला लेभिरे पृथिवीमिमाम्
Yam prapya vijitatmanam mahatmanam naradhipah
Ikshvakavo mahipala lebhire prithivimimam
164.10
पुरोहितवरं प्राप्य वसिष्ठमृषिसत्तमम्
ईजिरे क्रतुभिश्चापि नृपास्ते कुरुनन्दन
Purohitavaram prapya vasishthamrishisattamam
Ijire kratubhishchapi nripaste kurunandana
164.11
स हि तान्याजयामास सर्वान्नृपतिसत्तमान्
ब्रह्मर्षिः पाण्डवश्रेष्ठ बृहस्पतिरिवामरान्
Sa hi tanyajayamasa sarvannripatisattaman
Brahmarshih pandavashreshtha brihaspatirivamaran
164.12
तस्माद्धर्मप्रधानात्मा वेदधर्मविदीप्सितः
ब्राह्मणो गुणवान्कश्चित्पुरोधाः प्रविमृश्यताम्
Tasmaddharmapradhanatma vedadharmavidipsitah
Brahmano gunavankashchitpurodhah pravimrishyatam
164.13
क्षत्रियेण हि जातेन पृथिवीं जेतुमिच्छता
पूर्वं पुरोहितः कार्यः पार्थ राज्याभिवृद्धये
Kshatriyena hi jatena prithivim jetumichchhata
Purvam purohitah karyah partha rajyabhivriddhaye
164.14
महीं जिगीषता राज्ञा ब्रह्म कार्यं पुरःसरम्
तस्मात्पुरोहितः कश्चिद्गुणवानस्तु वो द्विजः
Mahim jigishata ragya brahma karyam purahsaram
Tasmatpurohitah kashchidgunavanastu vo dvijah