UtshovChapter 170
170.1
ब्राह्मण्युवाच
नाहं गृह्णामि वस्तात दृष्टीर्नास्ति रुषान्विता
अयं तु भार्गवो नूनमूरुजः कुपितोऽद्य वः
Brahmanyuvacha
Naham grihnami vastata drishtirnasti rushanvita
Ayam tu bhargavo nunamurujah kupitodya vah
170.2
तेन चक्षूंषि वस्तात नूनं कोपान्महात्मना
स्मरता निहतान्बन्धूनादत्तानि न संशयः
Tena chakshunshi vastata nunam kopanmahatmana
Smarata nihatanbandhunadattani na sanshayah
170.3
गर्भानपि यदा यूयं भृगूणां घ्नत पुत्रकाः
तदायमूरुणा गर्भो मया वर्षशतं धृतः
Garbhanapi yada yuyam bhrigunam ghnata putrakah
Tadayamuruna garbho maya varshashatam dhritah
170.4
षडङ्गश्चाखिलो वेद इमं गर्भस्थमेव हि
विवेश भृगुवंशस्य भूयः प्रियचिकीर्षया
Shadangashchakhilo veda imam garbhasthameva hi
Vivesha bhriguvanshasya bhuyah priyachikirshaya
170.5
सोऽयं पितृवधान्नूनं क्रोधाद्वो हन्तुमिच्छति
तेजसा यस्य दिव्येन चक्षूंषि मुषितानि वः
Soyam pitrivadhannunam krodhadvo hantumichchhati
Tejasa yasya divyena chakshunshi mushitani vah
170.6
तमिमं तात याचध्वमौर्वं मम सुतोत्तमम्
अयं वः प्रणिपातेन तुष्टो दृष्टीर्विमोक्ष्यति
Tamimam tata yachadhvamaurvam mama sutottamam
Ayam vah pranipatena tushto drishtirvimokshyati
170.7
गन्धर्व उवाच
एवमुक्तास्ततः सर्वे राजानस्ते तमूरुजम्
ऊचुः प्रसीदेति तदा प्रसादं च चकार सः
Gandharva uvacha
Evamuktastatah sarve rajanaste tamurujam
Uchuh prasideti tada prasadam cha chakara sah
170.8
अनेनैव च विख्यातो नाम्ना लोकेषु सत्तमः
स और्व इति विप्रर्षिरूरुं भित्त्वा व्यजायत
Anenaiva cha vikhyato namna lokeshu sattamah
Sa aurva iti viprarshirurum bhittva vyajayata
170.9
चक्षूंषि प्रतिलभ्याथ प्रतिजग्मुस्ततो नृपाः
भार्गवस्तु मुनिर्मेने सर्वलोकपराभवम्
Chakshunshi pratilabhyatha pratijagmustato nripah
Bhargavastu munirmene sarvalokaparabhavam
170.10
स चक्रे तात लोकानां विनाशाय महामनाः
सर्वेषामेव कार्त्स्न्येन मनः प्रवणमात्मनः
Sa chakre tata lokanam vinashaya mahamanah
Sarveshameva kartsnyena manah pravanamatmanah
170.11
इच्छन्नपचितिं कर्तुं भृगूणां भृगुसत्तमः
सर्वलोकविनाशाय तपसा महतैधितः
Ichchhannapachitim kartum bhrigunam bhrigusattamah
Sarvalokavinashaya tapasa mahataidhitah
170.12
तापयामास लोकान्स सदेवासुरमानुषान्
तपसोग्रेण महता नन्दयिष्यन्पितामहान्
Tapayamasa lokansa sadevasuramanushan
Tapasogrena mahata nandayishyanpitamahan
170.13
ततस्तं पितरस्तात विज्ञाय भृगुसत्तमम्
पितृलोकादुपागम्य सर्व ऊचुरिदं वचः
Tatastam pitarastata vigyaya bhrigusattamam
Pitrilokadupagamya sarva uchuridam vachah
170.14
और्व दृष्टः प्रभावस्ते तपसोग्रस्य पुत्रक
प्रसादं कुरु लोकानां नियच्छ क्रोधमात्मनः
Aurva drishtah prabhavaste tapasograsya putraka
Prasadam kuru lokanam niyachchha krodhamatmanah
170.15
नानीशैर्हि तदा तात भृगुभिर्भावितात्मभिः
वधोऽभ्युपेक्षितः सर्वैः क्षत्रियाणां विहिंसताम्
Nanishairhi tada tata bhrigubhirbhavitatmabhih
Vadhobhyupekshitah sarvaih kshatriyanam vihinsatam
170.16
आयुषा हि प्रकृष्टेन यदा नः खेद आविशत्
तदास्माभिर्वधस्तात क्षत्रियैरीप्सितः स्वयम्
Ayusha hi prakrishtena yada nah kheda avishat
Tadasmabhirvadhastata kshatriyairipsitah svayam
170.17
निखातं तद्धि वै वित्तं केनचिद्भृगुवेश्मनि
वैरायैव तदा न्यस्तं क्षत्रियान्कोपयिष्णुभिः
किं हि वित्तेन नः कार्यं स्वर्गेप्सूनां द्विजर्षभ
Nikhatam taddhi vai vittam kenachidbhriguveshmani
Vairayaiva tada nyastam kshatriyankopayishnubhih
Kim hi vittena nah karyam svargepsunam dvijarshabha
170.18
यदा तु मृत्युरादातुं न नः शक्नोति सर्वशः
तदास्माभिरयं दृष्ट उपायस्तात संमतः
Yada tu mrityuradatum na nah shaknoti sarvashah
Tadasmabhirayam drishta upayastata sammatah
170.19
आत्महा च पुमांस्तात न लोकाँल्लभते शुभान्
ततोऽस्माभिः समीक्ष्यैवं नात्मनात्मा विनाशितः
Atmaha cha pumanstata na lokanllabhate shubhan
Tatosmabhih samikshyaivam natmanatma vinashitah
170.20
न चैतन्नः प्रियं तात यदिदं कर्तुमिच्छसि
नियच्छेदं मनः पापात्सर्वलोकपराभवात्
Na chaitannah priyam tata yadidam kartumichchhasi
Niyachchhedam manah papatsarvalokaparabhavat
170.21
न हि नः क्षत्रियाः केचिन्न लोकाः सप्त पुत्रक
दूषयन्ति तपस्तेजः क्रोधमुत्पतितं जहि
Na hi nah kshatriyah kechinna lokah sapta putraka
Dushayanti tapastejah krodhamutpatitam jahi