অধ্যায় 172

172.1

গন্ধর্ব উবাচ
এবমুক্তঃ স বিপ্রর্ষির্বসিষ্ঠেন মহাত্মনা
ন্যয়চ্ছদাত্মনঃ কোপং সর্বলোকপরাভবাৎ

ঈজে চ স মহাতেজাঃ সর্ববেদবিদাং বরঃ
ঋষী রাক্ষসসত্রেণ শাক্তেয়োঽথ পরাশরঃ

ততো বৃদ্ধাংশ্চ বালাংশ্চ রাক্ষসান্স মহামুনিঃ
দদাহ বিততে যজ্ঞে শক্তের্বধমনুস্মরন্

ন হি তং বারয়ামাস বসিষ্ঠো রক্ষসাং বধাৎ
দ্বিতীয়ামস্য মা ভাঙ্ক্ষং প্রতিজ্ঞামিতি নিশ্চয়াৎ

ত্রয়াণাং পাবকানাং স সত্রে তস্মিন্মহামুনিঃ
আসীত্পুরস্তাদ্দীপ্তানাং চতুর্থ ইব পাবকঃ

তেন যজ্ঞেন শুভ্রেণ হূয়মানেন যুক্তিতঃ
তদ্বিদীপিতমাকাশং সূর্যেণেব ঘনাত্যয়ে

তং বসিষ্ঠাদয়ঃ সর্বে মুনয়স্তত্র মেনিরে
তেজসা দিবি দীপ্যন্তং দ্বিতীয়মিব ভাস্করম্

ততঃ পরমদুষ্প্রাপমন্যৈরৃষিরুদারধীঃ
সমাপিপয়িষুঃ সত্রং তমত্রিঃ সমুপাগমৎ

তথা পুলস্ত্যঃ পুলহঃ ক্রতুশ্চৈব মহাক্রতুম্
উপাজগ্মুরমিত্রঘ্ন রক্ষসাং জীবিতেপ্সয়া

পুলস্ত্যস্তু বধাত্তেষাং রক্ষসাং ভরতর্ষভ
উবাচেদং বচঃ পার্থ পরাশরমরিংদমম্

কচ্চিত্তাতাপবিঘ্নং তে কচ্চিন্নন্দসি পুত্রক
অজানতামদোষাণাং সর্বেষাং রক্ষসাং বধাৎ

প্রজোচ্ছেদমিমং মহ্যং সর্বং সোমপসত্তম
অধর্মিষ্ঠং বরিষ্ঠঃ সন্কুরুষে ত্বং পরাশর
রাজা কল্মাষপাদশ্চ দিবমারোঢুমিচ্ছতি

যে চ শক্ত্যবরাঃ পুত্রা বসিষ্ঠস্য মহামুনেঃ
তে চ সর্বে মুদা যুক্তা মোদন্তে সহিতাঃ সুরৈঃ
সর্বমেতদ্বসিষ্ঠস্য বিদিতং বৈ মহামুনে

রক্ষসাং চ সমুচ্ছেদ এষ তাত তপস্বিনাম্
নিমিত্তভূতস্ত্বং চাত্র ক্রতৌ বাসিষ্ঠনন্দন
স সত্রং মুঞ্চ ভদ্রং তে সমাপ্তমিদমস্তু তে

এবমুক্তঃ পুলস্ত্যেন বসিষ্ঠেন চ ধীমতা
তদা সমাপয়ামাস সত্রং শাক্তিঃ পরাশরঃ

সর্বরাক্ষসসত্রায় সংভৃতং পাবকং মুনিঃ
উত্তরে হিমবত্পার্শ্বে উত্সসর্জ মহাবনে

স তত্রাদ্যাপি রক্ষাংসি বৃক্ষানশ্মান এব চ
ভক্ষয়ন্দৃশ্যতে বহ্নিঃ সদা পর্বণি পর্বণি