অধ্যায় 173

173.1

অর্জুন উবাচ
রাজ্ঞা কল্মাষপাদেন গুরৌ ব্রহ্মবিদাং বরে
কারণং কিং পুরস্কৃত্য ভার্যা বৈ সংনিয়োজিতা

173.2

জানতা চ পরং ধর্মং লোক্যং তেন মহাত্মনা
অগম্যাগমনং কস্মাদ্বসিষ্ঠেন মহাত্মনা
কৃতং তেন পুরা সর্বং বক্তুমর্হসি পৃচ্ছতঃ

173.3

গন্ধর্ব উবাচ
ধনংজয় নিবোধেদং যন্মাং ত্বং পরিপৃচ্ছসি
বসিষ্ঠং প্রতি দুর্ধর্ষং তথামিত্রসহং নৃপম্

173.4

কথিতং তে ময়া পূর্বং যথা শপ্তঃ স পার্থিবঃ
শক্তিনা ভরতশ্রেষ্ঠ বাসিষ্ঠেন মহাত্মনা

173.5

স তু শাপবশং প্রাপ্তঃ ক্রোধপর্যাকুলেক্ষণঃ
নির্জগাম পুরাদ্রাজা সহদারঃ পরংতপঃ

173.6

অরণ্যং নির্জনং গত্বা সদারঃ পরিচক্রমে
নানামৃগগণাকীর্ণং নানাসত্ত্বসমাকুলম্

173.7

নানাগুল্মলতাচ্ছন্নং নানাদ্রুমসমাবৃতম্
অরণ্যং ঘোরসংনাদং শাপগ্রস্তঃ পরিভ্রমন্

173.8

স কদাচিত্ক্ষুধাবিষ্টো মৃগয়ন্ভক্ষমাত্মনঃ
দদর্শ সুপরিক্লিষ্টঃ কস্মিংশ্চিদ্বননির্ঝরে
ব্রাহ্মণীং ব্রাহ্মণং চৈব মৈথুনায়োপসংগতৌ

173.9

তৌ সমীক্ষ্য তু বিত্রস্তাবকৃতার্থৌ প্রধাবিতৌ
তয়োশ্চ দ্রবতোর্বিপ্রং জগৃহে নৃপতির্বলাৎ

173.10

দৃষ্ট্বা গৃহীতং ভর্তারমথ ব্রাহ্মণ্যভাষত
শৃণু রাজন্বচো মহ্যং যত্ত্বাং বক্ষ্যামি সুব্রত

173.11

আদিত্যবংশপ্রভবস্ত্বং হি লোকপরিশ্রুতঃ
অপ্রমত্তঃ স্থিতো ধর্মে গুরুশুশ্রূষণে রতঃ

173.12

শাপং প্রাপ্তোঽসি দুর্ধর্ষ ন পাপং কর্তুমর্হসি
ঋতুকালে তু সংপ্রাপ্তে ভর্ত্রাস্ম্যদ্য সমাগতা

173.13

অকৃতার্থা হ্যহং ভর্ত্রা প্রসবার্থশ্চ মে মহান্
প্রসীদ নৃপতিশ্রেষ্ঠ ভর্তা মেঽয়ং বিসৃজ্যতাম্

173.14

এবং বিক্রোশমানায়াস্তস্যাঃ স সুনৃশংসকৃৎ
ভর্তারং ভক্ষয়ামাস ব্যাঘ্রো মৃগমিবেপ্সিতম্

173.15

তস্যাঃ ক্রোধাভিভূতায়া যদশ্রু ন্যপতদ্ভুবি
সোঽগ্নিঃ সমভবদ্দীপ্তস্তং চ দেশং ব্যদীপয়ৎ

173.16

ততঃ সা শোকসংতপ্তা ভর্তৃব্যসনদুঃখিতা
কল্মাষপাদং রাজর্ষিমশপদ্ব্রাহ্মণী রুষা

173.17

যস্মান্মমাকৃতার্থায়াস্ত্বয়া ক্ষুদ্র নৃশংসবৎ
প্রেক্ষন্ত্যা ভক্ষিতো মেঽদ্য প্রভুর্ভর্তা মহায়শাঃ

173.18

তস্মাত্ত্বমপি দুর্বুদ্ধে মচ্ছাপপরিবিক্ষতঃ
পত্নীমৃতাবনুপ্রাপ্য সদ্যস্ত্যক্ষ্যসি জীবিতম্

173.19

যস্য চর্ষের্বসিষ্ঠস্য ত্বয়া পুত্রা বিনাশিতাঃ
তেন সংগম্য তে ভার্যা তনয়ং জনয়িষ্যতি
স তে বংশকরঃ পুত্রো ভবিষ্যতি নৃপাধম

173.20

এবং শপ্ত্বা তু রাজানং সা তমাঙ্গিরসী শুভা
তস্যৈব সংনিধৌ দীপ্তং প্রবিবেশ হুতাশনম্

173.21

বসিষ্ঠশ্চ মহাভাগঃ সর্বমেতদপশ্যত
জ্ঞানয়োগেন মহতা তপসা চ পরংতপ

173.22

মুক্তশাপশ্চ রাজর্ষিঃ কালেন মহতা ততঃ
ঋতুকালেঽভিপতিতো মদয়ন্ত্যা নিবারিতঃ

173.23

ন হি সস্মার নৃপতিস্তং শাপং শাপমোহিতঃ
দেব্যাঃ সোঽথ বচঃ শ্রুত্বা স তস্যা নৃপসত্তমঃ
তং চ শাপমনুস্মৃত্য পর্যতপ্যদ্ভৃশং তদা

173.24

এতস্মাত্কারণাদ্রাজা বসিষ্ঠং সংন্যয়োজয়ৎ
স্বদারে ভরতশ্রেষ্ঠ শাপদোষসমন্বিতঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.