অধ্যায় 174

174.1

অর্জুন উবাচ
অস্মাকমনুরূপো বৈ যঃ স্যাদ্গন্ধর্ব বেদবিৎ
পুরোহিতস্তমাচক্ষ্ব সর্বং হি বিদিতং তব

গন্ধর্ব উবাচ
যবীয়ান্দেবলস্যৈষ বনে ভ্রাতা তপস্যতি
ধৌম্য উত্কোচকে তীর্থে তং বৃণুধ্বং যদীচ্ছথ

বৈশংপায়ন উবাচ
ততোঽর্জুনোঽস্ত্রমাগ্নেয়ং প্রদদৌ তদ্যথাবিধি
গন্ধর্বায় তদা প্রীতো বচনং চেদমব্রবীৎ

ত্বয্যেব তাবত্তিষ্ঠন্তু হয়া গন্ধর্বসত্তম
কর্মকালে গ্রহীষ্যামি স্বস্তি তেঽস্ত্বিতি চাব্রবীৎ

তেঽন্যোন্যমভিসংপূজ্য গন্ধর্বঃ পাণ্ডবাশ্চ হ
রম্যাদ্ভাগীরথীকচ্ছাদ্যথাকামং প্রতস্থিরে

তত উত্কোচকং তীর্থং গত্বা ধৌম্যাশ্রমং তু তে
তং বব্রুঃ পাণ্ডবা ধৌম্যং পৌরোহিত্যায় ভারত

তান্ধৌম্যঃ প্রতিজগ্রাহ সর্ববেদবিদাং বরঃ
পাদ্যেন ফলমূলেন পৌরোহিত্যেন চৈব হ

তে তদাশংসিরে লব্ধাং শ্রিয়ং রাজ্যং চ পাণ্ডবাঃ
তং ব্রাহ্মণং পুরস্কৃত্য পাঞ্চাল্যাশ্চ স্বয়ংবরম্

মাতৃষষ্ঠাস্তু তে তেন গুরুণা সংগতাস্তদা
নাথবন্তমিবাত্মানং মেনিরে ভরতর্ষভাঃ

স হি বেদার্থতত্ত্বজ্ঞস্তেষাং গুরুরুদারধীঃ
তেন ধর্মবিদা পার্থা যাজ্যাঃ সর্ববিদা কৃতাঃ

বীরাংস্তু স হি তান্মেনে প্রাপ্তরাজ্যান্স্বধর্মতঃ
বুদ্ধিবীর্যবলোত্সাহৈর্যুক্তান্দেবানিবাপরান্

কৃতস্বস্ত্যয়নাস্তেন ততস্তে মনুজাধিপাঃ
মেনিরে সহিতা গন্তুং পাঞ্চাল্যাস্তং স্বয়ংবরম্