UtshovChapter 174
174.1
अर्जुन उवाच
अस्माकमनुरूपो वै यः स्याद्गन्धर्व वेदवित्
पुरोहितस्तमाचक्ष्व सर्वं हि विदितं तव
Arjuna uvacha
Asmakamanurupo vai yah syadgandharva vedavit
Purohitastamachakshva sarvam hi viditam tava
174.2
गन्धर्व उवाच
यवीयान्देवलस्यैष वने भ्राता तपस्यति
धौम्य उत्कोचके तीर्थे तं वृणुध्वं यदीच्छथ
Gandharva uvacha
Yaviyandevalasyaisha vane bhrata tapasyati
Dhaumya utkochake tirthe tam vrinudhvam yadichchhatha
174.3
वैशंपायन उवाच
ततोऽर्जुनोऽस्त्रमाग्नेयं प्रददौ तद्यथाविधि
गन्धर्वाय तदा प्रीतो वचनं चेदमब्रवीत्
Vaishampayana uvacha
Tatorjunostramagneyam pradadau tadyathavidhi
Gandharvaya tada prito vachanam chedamabravit
174.4
त्वय्येव तावत्तिष्ठन्तु हया गन्धर्वसत्तम
कर्मकाले ग्रहीष्यामि स्वस्ति तेऽस्त्विति चाब्रवीत्
Tvayyeva tavattishthantu haya gandharvasattama
Karmakale grahishyami svasti testviti chabravit
174.5
तेऽन्योन्यमभिसंपूज्य गन्धर्वः पाण्डवाश्च ह
रम्याद्भागीरथीकच्छाद्यथाकामं प्रतस्थिरे
Tenyonyamabhisampujya gandharvah pandavashcha ha
Ramyadbhagirathikachchhadyathakamam pratasthire
174.6
तत उत्कोचकं तीर्थं गत्वा धौम्याश्रमं तु ते
तं वव्रुः पाण्डवा धौम्यं पौरोहित्याय भारत
Tata utkochakam tirtham gatva dhaumyashramam tu te
Tam vavruh pandava dhaumyam paurohityaya bharata
174.7
तान्धौम्यः प्रतिजग्राह सर्ववेदविदां वरः
पाद्येन फलमूलेन पौरोहित्येन चैव ह
Tandhaumyah pratijagraha sarvavedavidam varah
Padyena phalamulena paurohityena chaiva ha
174.8
ते तदाशंसिरे लब्धां श्रियं राज्यं च पाण्डवाः
तं ब्राह्मणं पुरस्कृत्य पाञ्चाल्याश्च स्वयंवरम्
Te tadashansire labdham shriyam rajyam cha pandavah
Tam brahmanam puraskritya panchalyashcha svayanvaram
174.9
मातृषष्ठास्तु ते तेन गुरुणा संगतास्तदा
नाथवन्तमिवात्मानं मेनिरे भरतर्षभाः
Matrishashthastu te tena guruna sangatastada
Nathavantamivatmanam menire bharatarshabhah
174.10
स हि वेदार्थतत्त्वज्ञस्तेषां गुरुरुदारधीः
तेन धर्मविदा पार्था याज्याः सर्वविदा कृताः
Sa hi vedarthatattvagyastesham gururudaradhih
Tena dharmavida partha yajyah sarvavida kritah
174.11
वीरांस्तु स हि तान्मेने प्राप्तराज्यान्स्वधर्मतः
बुद्धिवीर्यबलोत्साहैर्युक्तान्देवानिवापरान्
Viranstu sa hi tanmene praptarajyansvadharmatah
Buddhiviryabalotsahairyuktandevanivaparan
174.12
कृतस्वस्त्ययनास्तेन ततस्ते मनुजाधिपाः
मेनिरे सहिता गन्तुं पाञ्चाल्यास्तं स्वयंवरम्
Kritasvastyayanastena tataste manujadhipah
Menire sahita gantum panchalyastam svayanvaram