UtshovChapter 175
175.1
वैशंपायन उवाच
ततस्ते नरशार्दूला भ्रातरः पञ्च पाण्डवाः
प्रययुर्द्रौपदीं द्रष्टुं तं च देवमहोत्सवम्
Vaishampayana uvacha
Tataste narashardula bhratarah pancha pandavah
Prayayurdraupadim drashtum tam cha devamahotsavam
175.2
ते प्रयाता नरव्याघ्रा मात्रा सह परंतपाः
ब्राह्मणान्ददृशुर्मार्गे गच्छतः सगणान्बहून्
Te prayata naravyaghra matra saha parantapah
Brahmanandadrishurmarge gachchhatah sagananbahun
175.3
तानूचुर्ब्राह्मणा राजन्पाण्डवान्ब्रह्मचारिणः
क्व भवन्तो गमिष्यन्ति कुतो वागच्छतेति ह
Tanuchurbrahmana rajanpandavanbrahmacharinah
Kva bhavanto gamishyanti kuto vagachchhateti ha
175.4
युधिष्ठिर उवाच
आगतानेकचक्रायाः सोदर्यान्देवदर्शिनः
भवन्तो हि विजानन्तु सहितान्मातृचारिणः
Yudhishthira uvacha
Agatanekachakrayah sodaryandevadarshinah
Bhavanto hi vijanantu sahitanmatricharinah
175.5
ब्राह्मणा ऊचुः
गच्छताद्यैव पाञ्चालान्द्रुपदस्य निवेशनम्
स्वयंवरो महांस्तत्र भविता सुमहाधनः
Brahmana uchuh
Gachchhatadyaiva panchalandrupadasya niveshanam
Svayanvaro mahanstatra bhavita sumahadhanah
175.6
एकसार्थं प्रयाताः स्मो वयमप्यत्र गामिनः
तत्र ह्यद्भुतसंकाशो भविता सुमहोत्सवः
Ekasartham prayatah smo vayamapyatra gaminah
Tatra hyadbhutasankasho bhavita sumahotsavah
175.7
यज्ञसेनस्य दुहिता द्रुपदस्य महात्मनः
वेदीमध्यात्समुत्पन्ना पद्मपत्रनिभेक्षणा
Yagyasenasya duhita drupadasya mahatmanah
Vedimadhyatsamutpanna padmapatranibhekshana
175.8
दर्शनीयानवद्याङ्गी सुकुमारी मनस्विनी
धृष्टद्युम्नस्य भगिनी द्रोणशत्रोः प्रतापिनः
Darshaniyanavadyangi sukumari manasvini
Dhrishtadyumnasya bhagini dronashatroh pratapinah
175.9
यो जातः कवची खड्गी सशरः सशरासनः
सुसमिद्धे महाबाहुः पावके पावकप्रभः
Yo jatah kavachi khadgi sasharah sasharasanah
Susamiddhe mahabahuh pavake pavakaprabhah
175.10
स्वसा तस्यानवद्याङ्गी द्रौपदी तनुमध्यमा
नीलोत्पलसमो गन्धो यस्याः क्रोशात्प्रवायति
Svasa tasyanavadyangi draupadi tanumadhyama
Nilotpalasamo gandho yasyah kroshatpravayati
175.11
तां यज्ञसेनस्य सुतां स्वयंवरकृतक्षणाम्
गच्छामहे वयं द्रष्टुं तं च देवमहोत्सवम्
Tam yagyasenasya sutam svayanvarakritakshanam
Gachchhamahe vayam drashtum tam cha devamahotsavam
175.12
राजानो राजपुत्राश्च यज्वानो भूरिदक्षिणाः
स्वाध्यायवन्तः शुचयो महात्मानो यतव्रताः
Rajano rajaputrashcha yajvano bhuridakshinah
Svadhyayavantah shuchayo mahatmano yatavratah
175.13
तरुणा दर्शनीयाश्च नानादेशसमागताः
महारथाः कृतास्त्राश्च समुपैष्यन्ति भूमिपाः
Taruna darshaniyashcha nanadeshasamagatah
Maharathah kritastrashcha samupaishyanti bhumipah
175.14
ते तत्र विविधान्दायान्विजयार्थं नरेश्वराः
प्रदास्यन्ति धनं गाश्च भक्ष्यं भोज्यं च सर्वशः
Te tatra vividhandayanvijayartham nareshvarah
Pradasyanti dhanam gashcha bhakshyam bhojyam cha sarvashah
175.15
प्रतिगृह्य च तत्सर्वं दृष्ट्वा चैव स्वयंवरम्
अनुभूयोत्सवं चैव गमिष्यामो यथेप्सितम्
Pratigrihya cha tatsarvam drishtva chaiva svayanvaram
Anubhuyotsavam chaiva gamishyamo yathepsitam
175.16
नटा वैतालिकाश्चैव नर्तकाः सूतमागधाः
नियोधकाश्च देशेभ्यः समेष्यन्ति महाबलाः
Nata vaitalikashchaiva nartakah sutamagadhah
Niyodhakashcha deshebhyah sameshyanti mahabalah
175.17
एवं कौतूहलं कृत्वा दृष्ट्वा च प्रतिगृह्य च
सहास्माभिर्महात्मानः पुनः प्रतिनिवर्त्स्यथ
Evam kautuhalam kritva drishtva cha pratigrihya cha
Sahasmabhirmahatmanah punah pratinivartsyatha
175.18
दर्शनीयांश्च वः सर्वान्देवरूपानवस्थितान्
समीक्ष्य कृष्णा वरयेत्संगत्यान्यतमं वरम्
Darshaniyanshcha vah sarvandevarupanavasthitan
Samikshya krishna varayetsangatyanyatamam varam
175.19
अयं भ्राता तव श्रीमान्दर्शनीयो महाभुजः
नियुध्यमानो विजयेत्संगत्या द्रविणं बहु
Ayam bhrata tava shrimandarshaniyo mahabhujah
Niyudhyamano vijayetsangatya dravinam bahu
175.20
युधिष्ठिर उवाच
परमं भो गमिष्यामो द्रष्टुं देवमहोत्सवम्
भवद्भिः सहिताः सर्वे कन्यायास्तं स्वयंवरम्
Yudhishthira uvacha
Paramam bho gamishyamo drashtum devamahotsavam
Bhavadbhih sahitah sarve kanyayastam svayanvaram