অধ্যায় 175

175.1

বৈশংপায়ন উবাচ
ততস্তে নরশার্দূলা ভ্রাতরঃ পঞ্চ পাণ্ডবাঃ
প্রয়য়ুর্দ্রৌপদীং দ্রষ্টুং তং চ দেবমহোত্সবম্

তে প্রয়াতা নরব্যাঘ্রা মাত্রা সহ পরংতপাঃ
ব্রাহ্মণান্দদৃশুর্মার্গে গচ্ছতঃ সগণান্বহূন্

তানূচুর্ব্রাহ্মণা রাজন্পাণ্ডবান্ব্রহ্মচারিণঃ
ক্ব ভবন্তো গমিষ্যন্তি কুতো বাগচ্ছতেতি হ

যুধিষ্ঠির উবাচ
আগতানেকচক্রায়াঃ সোদর্যান্দেবদর্শিনঃ
ভবন্তো হি বিজানন্তু সহিতান্মাতৃচারিণঃ

ব্রাহ্মণা ঊচুঃ
গচ্ছতাদ্যৈব পাঞ্চালান্দ্রুপদস্য নিবেশনম্
স্বয়ংবরো মহাংস্তত্র ভবিতা সুমহাধনঃ

একসার্থং প্রয়াতাঃ স্মো বয়মপ্যত্র গামিনঃ
তত্র হ্যদ্ভুতসংকাশো ভবিতা সুমহোত্সবঃ

যজ্ঞসেনস্য দুহিতা দ্রুপদস্য মহাত্মনঃ
বেদীমধ্যাত্সমুত্পন্না পদ্মপত্রনিভেক্ষণা

দর্শনীয়ানবদ্যাঙ্গী সুকুমারী মনস্বিনী
ধৃষ্টদ্যুম্নস্য ভগিনী দ্রোণশত্রোঃ প্রতাপিনঃ

যো জাতঃ কবচী খড্গী সশরঃ সশরাসনঃ
সুসমিদ্ধে মহাবাহুঃ পাবকে পাবকপ্রভঃ

স্বসা তস্যানবদ্যাঙ্গী দ্রৌপদী তনুমধ্যমা
নীলোত্পলসমো গন্ধো যস্যাঃ ক্রোশাত্প্রবায়তি

তাং যজ্ঞসেনস্য সুতাং স্বয়ংবরকৃতক্ষণাম্
গচ্ছামহে বয়ং দ্রষ্টুং তং চ দেবমহোত্সবম্

রাজানো রাজপুত্রাশ্চ যজ্বানো ভূরিদক্ষিণাঃ
স্বাধ্যায়বন্তঃ শুচয়ো মহাত্মানো যতব্রতাঃ

তরুণা দর্শনীয়াশ্চ নানাদেশসমাগতাঃ
মহারথাঃ কৃতাস্ত্রাশ্চ সমুপৈষ্যন্তি ভূমিপাঃ

তে তত্র বিবিধান্দায়ান্বিজয়ার্থং নরেশ্বরাঃ
প্রদাস্যন্তি ধনং গাশ্চ ভক্ষ্যং ভোজ্যং চ সর্বশঃ

প্রতিগৃহ্য চ তত্সর্বং দৃষ্ট্বা চৈব স্বয়ংবরম্
অনুভূয়োত্সবং চৈব গমিষ্যামো যথেপ্সিতম্

নটা বৈতালিকাশ্চৈব নর্তকাঃ সূতমাগধাঃ
নিয়োধকাশ্চ দেশেভ্যঃ সমেষ্যন্তি মহাবলাঃ

এবং কৌতূহলং কৃত্বা দৃষ্ট্বা চ প্রতিগৃহ্য চ
সহাস্মাভির্মহাত্মানঃ পুনঃ প্রতিনিবর্ত্স্যথ

দর্শনীয়াংশ্চ বঃ সর্বান্দেবরূপানবস্থিতান্
সমীক্ষ্য কৃষ্ণা বরয়েত্সংগত্যান্যতমং বরম্

অয়ং ভ্রাতা তব শ্রীমান্দর্শনীয়ো মহাভুজঃ
নিয়ুধ্যমানো বিজয়েত্সংগত্যা দ্রবিণং বহু

যুধিষ্ঠির উবাচ
পরমং ভো গমিষ্যামো দ্রষ্টুং দেবমহোত্সবম্
ভবদ্ভিঃ সহিতাঃ সর্বে কন্যায়াস্তং স্বয়ংবরম্