Utshovঅধ্যায় 176
176.1
বৈশংপায়ন উবাচ
এবমুক্তাঃ প্রয়াতাস্তে পাণ্ডবা জনমেজয়
রাজ্ঞা দক্ষিণপাঞ্চালান্দ্রুপদেনাভিরক্ষিতান্
176.2
ততস্তে তং মহাত্মানং শুদ্ধাত্মানমকল্মষম্
দদৃশুঃ পাণ্ডবা রাজন্পথি দ্বৈপায়নং তদা
176.3
তস্মৈ যথাবত্সত্কারং কৃত্বা তেন চ সান্ত্বিতাঃ
কথান্তে চাভ্যনুজ্ঞাতাঃ প্রয়য়ুর্দ্রুপদক্ষয়ম্
176.4
পশ্যন্তো রমণীয়ানি বনানি চ সরাংসি চ
তত্র তত্র বসন্তশ্চ শনৈর্জগ্মুর্মহারথাঃ
176.5
স্বাধ্যায়বন্তঃ শুচয়ো মধুরাঃ প্রিয়বাদিনঃ
আনুপূর্ব্যেণ সংপ্রাপ্তাঃ পাঞ্চালান্কুরুনন্দনাঃ
176.6
তে তু দৃষ্ট্বা পুরং তচ্চ স্কন্ধাবারং চ পাণ্ডবাঃ
কুম্ভকারস্য শালায়াং নিবেশং চক্রিরে তদা
176.7
তত্র ভৈক্ষং সমাজহ্রুর্ব্রাহ্মীং বৃত্তিং সমাশ্রিতাঃ
তাংশ্চ প্রাপ্তাংস্তদা বীরাঞ্জজ্ঞিরে ন নরাঃ ক্বচিৎ
176.8
যজ্ঞসেনস্য কামস্তু পাণ্ডবায় কিরীটিনে
কৃষ্ণাং দদ্যামিতি সদা ন চৈতদ্বিবৃণোতি সঃ
176.9
সোঽন্বেষমাণঃ কৌন্তেয়ান্পাঞ্চাল্যো জনমেজয়
দৃঢং ধনুরনায়ম্যং কারয়ামাস ভারত
176.10
যন্ত্রং বৈহায়সং চাপি কারয়ামাস কৃত্রিমম্
তেন যন্ত্রেণ সহিতং রাজা লক্ষ্যং চ কাঞ্চনম্
176.11
দ্রুপদ উবাচ
ইদং সজ্যং ধনুঃ কৃত্বা সজ্যেনানেন সায়কৈঃ
অতীত্য লক্ষ্যং যো বেদ্ধা স লব্ধা মত্সুতামিতি
176.12
বৈশংপায়ন উবাচ
ইতি স দ্রুপদো রাজা সর্বতঃ সমঘোষয়ৎ
তচ্ছ্রুত্বা পার্থিবাঃ সর্বে সমীয়ুস্তত্র ভারত
176.13
ঋষয়শ্চ মহাত্মানঃ স্বয়ংবরদিদৃক্ষয়া
দুর্যোধনপুরোগাশ্চ সকর্ণাঃ কুরবো নৃপ
176.14
ব্রাহ্মণাশ্চ মহাভাগা দেশেভ্যঃ সমুপাগমন্
তেঽভ্যর্চিতা রাজগণা দ্রুপদেন মহাত্মনা
176.15
ততঃ পৌরজনাঃ সর্বে সাগরোদ্ধূতনিঃস্বনাঃ
শিশুমারপুরং প্রাপ্য ন্যবিশংস্তে চ পার্থিবাঃ
176.16
প্রাগুত্তরেণ নগরাদ্ভূমিভাগে সমে শুভে
সমাজবাটঃ শুশুভে ভবনৈঃ সর্বতো বৃতঃ
176.17
প্রাকারপরিখোপেতো দ্বারতোরণমণ্ডিতঃ
বিতানেন বিচিত্রেণ সর্বতঃ সমবস্তৃতঃ
176.18
তূর্যৌঘশতসংকীর্ণঃ পরার্ধ্যাগুরুধূপিতঃ
চন্দনোদকসিক্তশ্চ মাল্যদামৈশ্চ শোভিতঃ
176.19
কৈলাসশিখরপ্রখ্যৈর্নভস্তলবিলেখিভিঃ
সর্বতঃ সংবৃতৈর্নদ্ধঃ প্রাসাদৈঃ সুকৃতোচ্ছ্রিতৈঃ
176.20
সুবর্ণজালসংবীতৈর্মণিকুট্টিমভূষিতৈঃ
সুখারোহণসোপানৈর্মহাসনপরিচ্ছদৈঃ
176.21
অগ্রাম্যসমবচ্ছন্নৈরগুরূত্তমবাসিতৈঃ
হংসাচ্ছবর্ণৈর্বহুভিরায়োজনসুগন্ধিভিঃ
176.22
অসংবাধশতদ্বারৈঃ শয়নাসনশোভিতৈঃ
বহুধাতুপিনদ্ধাঙ্গৈর্হিমবচ্ছিখরৈরিব
176.23
তত্র নানাপ্রকারেষু বিমানেষু স্বলংকৃতাঃ
স্পর্ধমানাস্তদান্যোন্যং নিষেদুঃ সর্বপার্থিবাঃ
176.24
তত্রোপবিষ্টান্দদৃশুর্মহাসত্ত্বপরাক্রমান্
রাজসিংহান্মহাভাগান্কৃষ্ণাগুরুবিভূষিতান্
176.25
মহাপ্রসাদান্ব্রহ্মণ্যান্স্বরাষ্ট্রপরিরক্ষিণঃ
প্রিয়ান্সর্বস্য লোকস্য সুকৃতৈঃ কর্মভিঃ শুভৈঃ
176.26
মঞ্চেষু চ পরার্ধ্যেষু পৌরজানপদা জনাঃ
কৃষ্ণাদর্শনতুষ্ট্যর্থং সর্বতঃ সমুপাবিশন্
176.27
ব্রাহ্মণৈস্তে চ সহিতাঃ পাণ্ডবাঃ সমুপাবিশন্
ঋদ্ধিং পাঞ্চালরাজস্য পশ্যন্তস্তামনুত্তমাম্
176.28
ততঃ সমাজো ববৃধে স রাজন্দিবসান্বহূন্
রত্নপ্রদানবহুলঃ শোভিতো নটনর্তকৈঃ
176.29
বর্তমানে সমাজে তু রমণীয়েঽহ্নি ষোডশে
আপ্লুতাঙ্গী সুবসনা সর্বাভরণভূষিতা
176.30
বীরকাংস্যমুপাদায় কাঞ্চনং সমলংকৃতম্
অবতীর্ণা ততো রঙ্গং দ্রৌপদী ভরতর্ষভ
176.31
পুরোহিতঃ সোমকানাং মন্ত্রবিদ্ব্রাহ্মণঃ শুচিঃ
পরিস্তীর্য জুহাবাগ্নিমাজ্যেন বিধিনা তদা
176.32
স তর্পয়িত্বা জ্বলনং ব্রাহ্মণান্স্বস্তি বাচ্য চ
বারয়ামাস সর্বাণি বাদিত্রাণি সমন্ততঃ
176.33
নিঃশব্দে তু কৃতে তস্মিন্ধৃষ্টদ্যুম্নো বিশাং পতে
রঙ্গমধ্যগতস্তত্র মেঘগম্ভীরয়া গিরা
বাক্যমুচ্চৈর্জগাদেদং শ্লক্ষ্ণমর্থবদুত্তমম্
176.34
ইদং ধনুর্লক্ষ্যমিমে চ বাণাঃ; শৃণ্বন্তু মে পার্থিবাঃ সর্ব এব
যন্ত্রচ্ছিদ্রেণাভ্যতিক্রম্য লক্ষ্যং; সমর্পয়ধ্বং খগমৈর্দশার্ধৈঃ
176.35
এতত্কর্তা কর্ম সুদুষ্করং যঃ; কুলেন রূপেণ বলেন যুক্তঃ
তস্যাদ্য ভার্যা ভগিনী মমেয়ং; কৃষ্ণা ভবিত্রী ন মৃষা ব্রবীমি
176.36
তানেবমুক্ত্বা দ্রুপদস্য পুত্রঃ; পশ্চাদিদং দ্রৌপদীমভ্যুবাচ
নাম্না চ গোত্রেণ চ কর্মণা চ; সংকীর্তয়ংস্তান্নৃপতীন্সমেতান্