অধ্যায় 177

177.1

ধৃষ্টদ্যুম্ন উবাচ
দুর্যোধনো দুর্বিষহো দুর্মুখো দুষ্প্রধর্ষণঃ
বিবিংশতির্বিকর্ণশ্চ সহো দুঃশাসনঃ সমঃ

যুয়ুত্সুর্বাতবেগশ্চ ভীমবেগধরস্তথা
উগ্রায়ুধো বলাকী চ কনকায়ুর্বিরোচনঃ

সুকুণ্ডলশ্চিত্রসেনঃ সুবর্চাঃ কনকধ্বজঃ
নন্দকো বাহুশালী চ কুণ্ডজো বিকটস্তথা

এতে চান্যে চ বহবো ধার্তরাষ্ট্রা মহাবলাঃ
কর্ণেন সহিতা বীরাস্ত্বদর্থং সমুপাগতাঃ
শতসংখ্যা মহাত্মানঃ প্রথিতাঃ ক্ষত্রিয়র্ষভাঃ

শকুনিশ্চ বলশ্চৈব বৃষকোঽথ বৃহদ্বলঃ
এতে গান্ধাররাজস্য সুতাঃ সর্বে সমাগতাঃ

অশ্বত্থামা চ ভোজশ্চ সর্বশস্ত্রভৃতাং বরৌ
সমবেতৌ মহাত্মানৌ ত্বদর্থে সমলংকৃতৌ

বৃহন্তো মণিমাংশ্চৈব দণ্ডধারশ্চ বীর্যবান্
সহদেবো জয়ত্সেনো মেঘসংধিশ্চ মাগধঃ

বিরাটঃ সহ পুত্রাভ্যাং শঙ্খেনৈবোত্তরেণ চ
বার্ধক্ষেমিঃ সুবর্চাশ্চ সেনাবিন্দুশ্চ পার্থিবঃ

অভিভূঃ সহ পুত্রেণ সুদাম্না চ সুবর্চসা
সুমিত্রঃ সুকুমারশ্চ বৃকঃ সত্যধৃতিস্তথা

সূর্যধ্বজো রোচমানো নীলশ্চিত্রায়ুধস্তথা
অংশুমাংশ্চেকিতানশ্চ শ্রেণিমাংশ্চ মহাবলঃ

সমুদ্রসেনপুত্রশ্চ চন্দ্রসেনঃ প্রতাপবান্
জলসংধঃ পিতাপুত্রৌ সুদণ্ডো দণ্ড এব চ

পৌণ্ড্রকো বাসুদেবশ্চ ভগদত্তশ্চ বীর্যবান্
কলিঙ্গস্তাম্রলিপ্তশ্চ পত্তনাধিপতিস্তথা

মদ্ররাজস্তথা শল্যঃ সহপুত্রো মহারথঃ
রুক্মাঙ্গদেন বীরেণ তথা রুক্মরথেন চ

কৌরব্যঃ সোমদত্তশ্চ পুত্রাশ্চাস্য মহারথাঃ
সমবেতাস্ত্রয়ঃ শূরা ভূরির্ভূরিশ্রবাঃ শলঃ

সুদক্ষিণশ্চ কাম্বোজো দৃঢধন্বা চ কৌরবঃ
বৃহদ্বলঃ সুষেণশ্চ শিবিরৌশীনরস্তথা

সংকর্ষণো বাসুদেবো রৌক্মিণেয়শ্চ বীর্যবান্
সাম্বশ্চ চারুদেষ্ণশ্চ সারণোঽথ গদস্তথা

অক্রূরঃ সাত্যকিশ্চৈব উদ্ধবশ্চ মহাবলঃ
কৃতবর্মা চ হার্দিক্যঃ পৃথুর্বিপৃথুরেব চ

বিডূরথশ্চ কঙ্কশ্চ সমীকঃ সারমেজয়ঃ
বীরো বাতপতিশ্চৈব ঝিল্লী পিণ্ডারকস্তথা
উশীনরশ্চ বিক্রান্তো বৃষ্ণয়স্তে প্রকীর্তিতাঃ

ভগীরথো বৃহত্ক্ষত্রঃ সৈন্ধবশ্চ জয়দ্রথঃ
বৃহদ্রথো বাহ্লিকশ্চ শ্রুতায়ুশ্চ মহারথঃ

উলূকঃ কৈতবো রাজা চিত্রাঙ্গদশুভাঙ্গদৌ
বত্সরাজশ্চ ধৃতিমান্কোসলাধিপতিস্তথা

এতে চান্যে চ বহবো নানাজনপদেশ্বরাঃ
ত্বদর্থমাগতা ভদ্রে ক্ষত্রিয়াঃ প্রথিতা ভুবি

এতে বেত্স্যন্তি বিক্রান্তাস্ত্বদর্থং লক্ষ্যমুত্তমম্
বিধ্যেত য ইমং লক্ষ্যং বরয়েথাঃ শুভেঽদ্য তম্