অধ্যায় 178

178.1

বৈশংপায়ন উবাচ
তেঽলংকৃতাঃ কুণ্ডলিনো যুবানঃ; পরস্পরং স্পর্ধমানাঃ সমেতাঃ
অস্ত্রং বলং চাত্মনি মন্যমানাঃ; সর্বে সমুত্পেতুরহংকৃতেন

রূপেণ বীর্যেণ কুলেন চৈব; ধর্মেণ চৈবাপি চ যৌবনেন
সমৃদ্ধদর্পা মদবেগভিন্না; মত্তা যথা হৈমবতা গজেন্দ্রাঃ

পরস্পরং স্পর্ধয়া প্রেক্ষমাণাঃ; সংকল্পজেনাপি পরিপ্লুতাঙ্গাঃ
কৃষ্ণা মমৈষেত্যভিভাষমাণা; নৃপাসনেভ্যঃ সহসোপতস্থুঃ

তে ক্ষত্রিয়া রঙ্গগতাঃ সমেতা; জিগীষমাণা দ্রুপদাত্মজাং তাম্
চকাশিরে পর্বতরাজকন্যা;মুমাং যথা দেবগণাঃ সমেতাঃ

কন্দর্পবাণাভিনিপীডিতাঙ্গাঃ; কৃষ্ণাগতৈস্তে হৃদয়ৈর্নরেন্দ্রাঃ
রঙ্গাবতীর্ণা দ্রুপদাত্মজার্থং; দ্বেষ্যান্হি চক্রুঃ সুহৃদোঽপি তত্র

অথায়য়ুর্দেবগণা বিমানৈ; রুদ্রাদিত্যা বসবোঽথাশ্বিনৌ চ
সাধ্যাশ্চ সর্বে মরুতস্তথৈব; যমং পুরস্কৃত্য ধনেশ্বরং চ

দৈত্যাঃ সুপর্ণাশ্চ মহোরগাশ্চ; দেবর্ষয়ো গুহ্যকাশ্চারণাশ্চ
বিশ্বাবসুর্নারদপর্বতৌ চ; গন্ধর্বমুখ্যাশ্চ সহাপ্সরোভিঃ

হলায়ুধস্তত্র চ কেশবশ্চ; বৃষ্ণ্যন্ধকাশ্চৈব যথা প্রধানাঃ
প্রেক্ষাং স্ম চক্রুর্যদুপুংগবাস্তে; স্থিতাশ্চ কৃষ্ণস্য মতে বভূবুঃ

দৃষ্ট্বা হি তান্মত্তগজেন্দ্ররূপা;ন্পঞ্চাভিপদ্মানিব বারণেন্দ্রান্
ভস্মাবৃতাঙ্গানিব হব্যবাহা;ন্পার্থান্প্রদধ্যৌ স যদুপ্রবীরঃ

শশংস রামায় যুধিষ্ঠিরং চ; ভীমং চ জিষ্ণুং চ যমৌ চ বীরৌ
শনৈঃ শনৈস্তাংশ্চ নিরীক্ষ্য রামো; জনার্দনং প্রীতমনা দদর্শ

অন্যে তু নানানৃপপুত্রপৌত্রাঃ; কৃষ্ণাগতৈর্নেত্রমনঃস্বভাবৈঃ
ব্যায়চ্ছমানা দদৃশুর্ভ্রমন্তীং; সংদষ্টদন্তচ্ছদতাম্রবক্ত্রাঃ

তথৈব পার্থাঃ পৃথুবাহবস্তে; বীরৌ যমৌ চৈব মহানুভাবৌ
তাং দ্রৌপদীং প্রেক্ষ্য তদা স্ম সর্বে; কন্দর্পবাণাভিহতা বভূবুঃ

দেবর্ষিগন্ধর্বসমাকুলং ত;ত্সুপর্ণনাগাসুরসিদ্ধজুষ্টম্
দিব্যেন গন্ধেন সমাকুলং চ; দিব্যৈশ্চ মাল্যৈরবকীর্যমাণম্

মহাস্বনৈর্দুন্দুভিনাদিতৈশ্চ; বভূব তত্সংকুলমন্তরিক্ষম্
বিমানসংবাধমভূত্সমন্তা;ত্সবেণুবীণাপণবানুনাদম্

ততস্তু তে রাজগণাঃ ক্রমেণ; কৃষ্ণানিমিত্তং নৃপ বিক্রমন্তঃ
তত্কার্মুকং সংহননোপপন্নং; সজ্যং ন শেকুস্তরসাপি কর্তুম্

তে বিক্রমন্তঃ স্ফুরতা দৃঢেন; নিষ্কৃষ্যমাণা ধনুষা নরেন্দ্রাঃ
বিচেষ্টমানা ধরণীতলস্থা; দীনা অদৃশ্যন্ত বিভগ্নচিত্তাঃ

হাহাকৃতং তদ্ধনুষা দৃঢেন; নিষ্পিষ্টভগ্নাঙ্গদকুণ্ডলং চ
কৃষ্ণানিমিত্তং বিনিবৃত্তভাবং; রাজ্ঞাং তদা মণ্ডলমার্তমাসীৎ

তস্মিংস্তু সংভ্রান্তজনে সমাজে; নিক্ষিপ্তবাদেষু নরাধিপেষু
কুন্তীসুতো জিষ্ণুরিয়েষ কর্তুং; সজ্যং ধনুস্তত্সশরং স বীরঃ