অধ্যায় 179

179.1

বৈশংপায়ন উবাচ
যদা নিবৃত্তা রাজানো ধনুষঃ সজ্যকর্মণি
অথোদতিষ্ঠদ্বিপ্রাণাং মধ্যাজ্জিষ্ণুরুদারধীঃ

উদক্রোশন্বিপ্রমুখ্যা বিধুন্বন্তোঽজিনানি চ
দৃষ্ট্বা সংপ্রস্থিতং পার্থমিন্দ্রকেতুসমপ্রভম্

কেচিদাসন্বিমনসঃ কেচিদাসন্মুদা যুতাঃ
আহুঃ পরস্পরং কেচিন্নিপুণা বুদ্ধিজীবিনঃ

যত্কর্ণশল্যপ্রমুখৈঃ পার্থিবৈর্লোকবিশ্রুতৈঃ
নানতং বলবদ্ভির্হি ধনুর্বেদপরায়ণৈঃ

তত্কথং ত্বকৃতাস্ত্রেণ প্রাণতো দুর্বলীয়সা
বটুমাত্রেণ শক্যং হি সজ্যং কর্তুং ধনুর্দ্বিজাঃ

অবহাস্যা ভবিষ্যন্তি ব্রাহ্মণাঃ সর্বরাজসু
কর্মণ্যস্মিন্নসংসিদ্ধে চাপলাদপরীক্ষিতে

যদ্যেষ দর্পাদ্ধর্ষাদ্বা যদি বা ব্রহ্মচাপলাৎ
প্রস্থিতো ধনুরায়ন্তুং বার্যতাং সাধু মা গমৎ

নাবহাস্যা ভবিষ্যামো ন চ লাঘবমাস্থিতাঃ
ন চ বিদ্বিষ্টতাং লোকে গমিষ্যামো মহীক্ষিতাম্

কেচিদাহুর্যুবা শ্রীমান্নাগরাজকরোপমঃ
পীনস্কন্ধোরুবাহুশ্চ ধৈর্যেণ হিমবানিব

সংভাব্যমস্মিন্কর্মেদমুত্সাহাচ্চানুমীয়তে
শক্তিরস্য মহোত্সাহা ন হ্যশক্তঃ স্বয়ং ব্রজেৎ

ন চ তদ্বিদ্যতে কিংচিত্কর্ম লোকেষু যদ্ভবেৎ
ব্রাহ্মণানামসাধ্যং চ ত্রিষু সংস্থানচারিষু

অব্ভক্ষা বায়ুভক্ষাশ্চ ফলাহারা দৃঢব্রতাঃ
দুর্বলা হি বলীয়াংসো বিপ্রা হি ব্রহ্মতেজসা

ব্রাহ্মণো নাবমন্তব্যঃ সদ্বাসদ্বা সমাচরন্
সুখং দুঃখং মহদ্ধ্রস্বং কর্ম যত্সমুপাগতম্

এবং তেষাং বিলপতাং বিপ্রাণাং বিবিধা গিরঃ
অর্জুনো ধনুষোঽভ্যাশে তস্থৌ গিরিরিবাচলঃ

স তদ্ধনুঃ পরিক্রম্য প্রদক্ষিণমথাকরোৎ
প্রণম্য শিরসা হৃষ্টো জগৃহে চ পরংতপঃ

সজ্যং চ চক্রে নিমিষান্তরেণ; শরাংশ্চ জগ্রাহ দশার্ধসংখ্যান্
বিব্যাধ লক্ষ্যং নিপপাত তচ্চ; ছিদ্রেণ ভূমৌ সহসাতিবিদ্ধম্

ততোঽন্তরিক্ষে চ বভূব নাদঃ; সমাজমধ্যে চ মহান্নিনাদঃ
পুষ্পাণি দিব্যানি ববর্ষ দেবঃ; পার্থস্য মূর্ধ্নি দ্বিষতাং নিহন্তুঃ

চেলাবেধাংস্ততশ্চক্রুর্হাহাকারাংশ্চ সর্বশঃ
ন্যপতংশ্চাত্র নভসঃ সমন্তাত্পুষ্পবৃষ্টয়ঃ

শতাঙ্গানি চ তূর্যাণি বাদকাশ্চাপ্যবাদয়ন্
সূতমাগধসংঘাশ্চ অস্তুবংস্তত্র সুস্বনাঃ

তং দৃষ্ট্বা দ্রুপদঃ প্রীতো বভূবারিনিষূদনঃ
সহসৈন্যশ্চ পার্থস্য সাহায্যার্থমিয়েষ সঃ

তস্মিংস্তু শব্দে মহতি প্রবৃত্তে; যুধিষ্ঠিরো ধর্মভৃতাং বরিষ্ঠঃ
আবাসমেবোপজগাম শীঘ্রং; সার্ধং যমাভ্যাং পুরুষোত্তমাভ্যাম্

বিদ্ধং তু লক্ষ্যং প্রসমীক্ষ্য কৃষ্ণা; পার্থং চ শক্রপ্রতিমং নিরীক্ষ্য
আদায় শুক্লং বরমাল্যদাম; জগাম কুন্তীসুতমুত্স্ময়ন্তী

স তামুপাদায় বিজিত্য রঙ্গে; দ্বিজাতিভিস্তৈরভিপূজ্যমানঃ
রঙ্গান্নিরক্রামদচিন্ত্যকর্মা; পত্ন্যা তয়া চাপ্যনুগম্যমানঃ