অধ্যায় 180

180.1

বৈশংপায়ন উবাচ
তস্মৈ দিত্সতি কন্যাং তু ব্রাহ্মণায় মহাত্মনে
কোপ আসীন্মহীপানামালোক্যান্যোন্যমন্তিকাৎ

অস্মানয়মতিক্রম্য তৃণীকৃত্য চ সংগতান্
দাতুমিচ্ছতি বিপ্রায় দ্রৌপদীং যোষিতাং বরাম্

নিহন্মৈনং দুরাত্মানং যোঽয়মস্মান্ন মন্যতে
ন হ্যর্হত্যেষ সত্কারং নাপি বৃদ্ধক্রমং গুণৈঃ

হন্মৈনং সহ পুত্রেণ দুরাচারং নৃপদ্বিষম্
অয়ং হি সর্বানাহূয় সত্কৃত্য চ নরাধিপান্
গুণবদ্ভোজয়িত্বা চ ততঃ পশ্চাদ্বিনিন্দতি

অস্মিন্রাজসমাবায়ে দেবানামিব সংনয়ে
কিময়ং সদৃশং কংচিন্নৃপতিং নৈব দৃষ্টবান্

ন চ বিপ্রেষ্বধীকারো বিদ্যতে বরণং প্রতি
স্বয়ংবরঃ ক্ষত্রিয়াণামিতীয়ং প্রথিতা শ্রুতিঃ

অথ বা যদি কন্যেয়ং নেহ কংচিদ্বুভূষতি
অগ্নাবেনাং পরিক্ষিপ্য যাম রাষ্ট্রাণি পার্থিবাঃ

ব্রাহ্মণো যদি বা বাল্যাল্লোভাদ্বা কৃতবানিদম্
বিপ্রিয়ং পার্থিবেন্দ্রাণাং নৈষ বধ্যঃ কথংচন

ব্রাহ্মণার্থং হি নো রাজ্যং জীবিতং চ বসূনি চ
পুত্রপৌত্রং চ যচ্চান্যদস্মাকং বিদ্যতে ধনম্

অবমানভয়াদেতত্স্বধর্মস্য চ রক্ষণাৎ
স্বয়ংবরাণাং চান্যেষাং মা ভূদেবংবিধা গতিঃ

ইত্যুক্ত্বা রাজশার্দূলা হৃষ্টাঃ পরিঘবাহবঃ
দ্রুপদং সংজিঘৃক্ষন্তঃ সায়ুধাঃ সমুপাদ্রবন্

তান্গৃহীতশরাবাপান্ক্রুদ্ধানাপততো নৃপান্
দ্রুপদো বীক্ষ্য সংত্রাসাদ্ব্রাহ্মণাঞ্শরণং গতঃ

বেগেনাপততস্তাংস্তু প্রভিন্নানিব বারণান্
পাণ্ডুপুত্রৌ মহাবীর্যৌ প্রতীয়তুররিংদমৌ

ততঃ সমুত্পেতুরুদায়ুধাস্তে; মহীক্ষিতো বদ্ধতলাঙ্গুলিত্রাঃ
জিঘাংসমানাঃ কুরুরাজপুত্রা;বমর্ষয়ন্তোঽর্জুনভীমসেনৌ

ততস্তু ভীমোঽদ্ভুতবীর্যকর্মা; মহাবলো বজ্রসমানবীর্যঃ
উত্পাট্য দোর্ভ্যাং দ্রুমমেকবীরো; নিষ্পত্রয়ামাস যথা গজেন্দ্রঃ

তং বৃক্ষমাদায় রিপুপ্রমাথী; দণ্ডীব দণ্ডং পিতৃরাজ উগ্রম্
তস্থৌ সমীপে পুরুষর্ষভস্য; পার্থস্য পার্থঃ পৃথুদীর্ঘবাহুঃ

তত্প্রেক্ষ্য কর্মাতিমনুষ্যবুদ্ধে;র্জিষ্ণোঃ সহভ্রাতুরচিন্ত্যকর্মা
দামোদরো ভ্রাতরমুগ্রবীর্যং; হলায়ুধং বাক্যমিদং বভাষে

য এষ মত্তর্ষভতুল্যগামী; মহদ্ধনুঃ কর্ষতি তালমাত্রম্
এষোঽর্জুনো নাত্র বিচার্যমস্তি; যদ্যস্মি সংকর্ষণ বাসুদেবঃ

য এষ বৃক্ষং তরসাবরুজ্য; রাজ্ঞাং বিকারে সহসা নিবৃত্তঃ
বৃকোদরো নান্য ইহৈতদদ্য; কর্তুং সমর্থো ভুবি মর্ত্যধর্মা

যোঽসৌ পুরস্তাত্কমলায়তাক্ষ;স্তনুর্মহাসিংহগতির্বিনীতঃ
গৌরঃ প্রলম্বোজ্জ্বলচারুঘোণো; বিনিঃসৃতঃ সোঽচ্যুত ধর্মরাজঃ

যৌ তৌ কুমারাবিব কার্ত্তিকেয়ৌ; দ্বাবশ্বিনেয়াবিতি মে প্রতর্কঃ
মুক্তা হি তস্মাজ্জতুবেশ্মদাহা;ন্ময়া শ্রুতাঃ পাণ্ডুসুতাঃ পৃথা চ

তমব্রবীন্নির্মলতোয়দাভো; হলায়ুধোঽনন্তরজং প্রতীতঃ
প্রীতোঽস্মি দিষ্ট্যা হি পিতৃষ্বসা নঃ; পৃথা বিমুক্তা সহ কৌরবাগ্র্যৈঃ