Utshovঅধ্যায় 181
181.1
বৈশংপায়ন উবাচ
অজিনানি বিধুন্বন্তঃ করকাংশ্চ দ্বিজর্ষভাঃ
ঊচুস্তং ভীর্ন কর্তব্যা বয়ং যোত্স্যামহে পরান্
181.2
তানেবং বদতো বিপ্রানর্জুনঃ প্রহসন্নিব
উবাচ প্রেক্ষকা ভূত্বা যূয়ং তিষ্ঠত পার্শ্বতঃ
181.3
অহমেনানজিহ্মাগ্রৈঃ শতশো বিকিরঞ্শরৈঃ
বারয়িষ্যামি সংক্রুদ্ধান্মন্ত্রৈরাশীবিষানিব
181.4
ইতি তদ্ধনুরাদায় শুল্কাবাপ্তং মহারথঃ
ভ্রাত্রা ভীমেন সহিতস্তস্থৌ গিরিরিবাচলঃ
181.5
ততঃ কর্ণমুখান্ক্রুদ্ধান্ক্ষত্রিয়াংস্তান্রুষোত্থিতান্
সংপেততুরভীতৌ তৌ গজৌ প্রতিগজানিব
181.6
ঊচুশ্চ বাচঃ পরুষাস্তে রাজানো জিঘাংসবঃ
আহবে হি দ্বিজস্যাপি বধো দৃষ্টো যুয়ুত্সতঃ
181.7
ততো বৈকর্তনঃ কর্ণো জগামার্জুনমোজসা
যুদ্ধার্থী বাশিতাহেতোর্গজঃ প্রতিগজং যথা
181.8
ভীমসেনং যয়ৌ শল্যো মদ্রাণামীশ্বরো বলী
দুর্যোধনাদয়স্ত্বন্যে ব্রাহ্মণৈঃ সহ সংগতাঃ
মৃদুপূর্বময়ত্নেন প্রত্যয়ুধ্যংস্তদাহবে
181.9
ততোঽর্জুনঃ প্রত্যবিধ্যদাপতন্তং ত্রিভিঃ শরৈঃ
কর্ণং বৈকর্তনং ধীমান্বিকৃষ্য বলবদ্ধনুঃ
181.10
তেষাং শরাণাং বেগেন শিতানাং তিগ্মতেজসাম্
বিমুহ্যমানো রাধেয়ো যত্নাত্তমনুধাবতি
181.11
তাবুভাবপ্যনির্দেশ্যৌ লাঘবাজ্জয়তাং বরৌ
অয়ুধ্যেতাং সুসংরব্ধাবন্যোন্যবিজয়ৈষিণৌ
181.12
কৃতে প্রতিকৃতং পশ্য পশ্য বাহুবলং চ মে
ইতি শূরার্থবচনৈরাভাষেতাং পরস্পরম্
181.13
ততোঽর্জুনস্য ভুজয়োর্বীর্যমপ্রতিমং ভুবি
জ্ঞাত্বা বৈকর্তনঃ কর্ণঃ সংরব্ধঃ সময়োধয়ৎ
181.14
অর্জুনেন প্রয়ুক্তাংস্তান্বাণান্বেগবতস্তদা
প্রতিহত্য ননাদোচ্চৈঃ সৈন্যাস্তমভিপূজয়ন্
181.15
কর্ণ উবাচ
তুষ্যামি তে বিপ্রমুখ্য ভুজবীর্যস্য সংয়ুগে
অবিষাদস্য চৈবাস্য শস্ত্রাস্ত্রবিনয়স্য চ
181.16
কিং ত্বং সাক্ষাদ্ধনুর্বেদো রামো বা বিপ্রসত্তম
অথ সাক্ষাদ্ধরিহয়ঃ সাক্ষাদ্বা বিষ্ণুরচ্যুতঃ
181.17
আত্মপ্রচ্ছাদনার্থং বৈ বাহুবীর্যমুপাশ্রিতঃ
বিপ্ররূপং বিধায়েদং ততো মাং প্রতিয়ুধ্যসে
181.18
ন হি মামাহবে ক্রুদ্ধমন্যঃ সাক্ষাচ্ছচীপতেঃ
পুমান্যোধয়িতুং শক্তঃ পাণ্ডবাদ্বা কিরীটিনঃ
181.19
বৈশংপায়ন উবাচ
তমেবংবাদিনং তত্র ফল্গুনঃ প্রত্যভাষত
নাস্মি কর্ণ ধনুর্বেদো নাস্মি রামঃ প্রতাপবান্
ব্রাহ্মণোঽস্মি যুধাং শ্রেষ্ঠঃ সর্বশস্ত্রভৃতাং বরঃ
181.20
ব্রাহ্মে পৌরংদরে চাস্ত্রে নিষ্ঠিতো গুরুশাসনাৎ
স্থিতোঽস্ম্যদ্য রণে জেতুং ত্বাং বীরাবিচলো ভব
181.21
এবমুক্তস্তু রাধেয়ো যুদ্ধাত্কর্ণো ন্যবর্তত
ব্রাহ্মং তেজস্তদাজয্যং মন্যমানো মহারথঃ
181.22
যুদ্ধং তূপেয়তুস্তত্র রাজঞ্শল্যবৃকোদরৌ
বলিনৌ যুগপন্মত্তৌ স্পর্ধয়া চ বলেন চ
181.23
অন্যোন্যমাহ্বয়ন্তৌ তৌ মত্তাবিব মহাগজৌ
মুষ্টিভির্জানুভিশ্চৈব নিঘ্নন্তাবিতরেতরম্
মুহূর্তং তৌ তথান্যোন্যং সমরে পর্যকর্ষতাম্
181.24
ততো ভীমঃ সমুত্ক্ষিপ্য বাহুভ্যাং শল্যমাহবে
ন্যবধীদ্বলিনাং শ্রেষ্ঠো জহসুর্ব্রাহ্মণাস্ততঃ
181.25
তত্রাশ্চর্যং ভীমসেনশ্চকার পুরুষর্ষভঃ
যচ্ছল্যং পতিতং ভূমৌ নাহনদ্বলিনং বলী
181.26
পাতিতে ভীমসেনেন শল্যে কর্ণে চ শঙ্কিতে
শঙ্কিতাঃ সর্বরাজানঃ পরিবব্রুর্বৃকোদরম্
181.27
ঊচুশ্চ সহিতাস্তত্র সাধ্বিমে ব্রাহ্মণর্ষভাঃ
বিজ্ঞায়ন্তাং ক্বজন্মানঃ ক্বনিবাসাস্তথৈব চ
181.28
কো হি রাধাসুতং কর্ণং শক্তো যোধয়িতুং রণে
অন্যত্র রামাদ্দ্রোণাদ্বা কৃপাদ্বাপি শরদ্বতঃ
181.29
কৃষ্ণাদ্বা দেবকীপুত্রাত্ফল্গুনাদ্বা পরংতপাৎ
কো বা দুর্যোধনং শক্তঃ প্রতিয়োধয়িতুং রণে
181.30
তথৈব মদ্ররাজানং শল্যং বলবতাং বরম্
বলদেবাদৃতে বীরাত্পাণ্ডবাদ্বা বৃকোদরাৎ
181.31
ক্রিয়তামবহারোঽস্মাদ্যুদ্ধাদ্ব্রাহ্মণসংয়ুতাৎ
অথৈনানুপলভ্যেহ পুনর্যোত্স্যামহে বয়ম্
181.32
তত্কর্ম ভীমস্য সমীক্ষ্য কৃষ্ণঃ; কুন্তীসুতৌ তৌ পরিশঙ্কমানঃ
নিবারয়ামাস মহীপতীংস্তা;ন্ধর্মেণ লব্ধেত্যনুনীয় সর্বান্
181.33
ত এবং সংনিবৃত্তাস্তু যুদ্ধাদ্যুদ্ধবিশারদাঃ
যথাবাসং যয়ুঃ সর্বে বিস্মিতা রাজসত্তমাঃ
181.34
বৃত্তো ব্রহ্মোত্তরো রঙ্গঃ পাঞ্চালী ব্রাহ্মণৈর্বৃতা
ইতি ব্রুবন্তঃ প্রয়য়ুর্যে তত্রাসন্সমাগতাঃ
181.35
ব্রাহ্মণৈস্তু প্রতিচ্ছন্নৌ রৌরবাজিনবাসিভিঃ
কৃচ্ছ্রেণ জগ্মতুস্তত্র ভীমসেনধনংজয়ৌ
181.36
বিমুক্তৌ জনসংবাধাচ্ছত্রুভিঃ পরিবিক্ষতৌ
কৃষ্ণয়ানুগতৌ তত্র নৃবীরৌ তৌ বিরেজতুঃ
181.37
তেষাং মাতা বহুবিধং বিনাশং পর্যচিন্তয়ৎ
অনাগচ্ছত্সু পুত্রেষু ভৈক্ষকালেঽতিগচ্ছতি
181.38
ধার্তরাষ্ট্রৈর্হতা ন স্যুর্বিজ্ঞায় কুরুপুংগবাঃ
মায়ান্বিতৈর্বা রক্ষোভিঃ সুঘোরৈর্দৃঢবৈরিভিঃ
181.39
বিপরীতং মতং জাতং ব্যাসস্যাপি মহাত্মনঃ
ইত্যেবং চিন্তয়ামাস সুতস্নেহান্বিতা পৃথা
181.40
মহত্যথাপরাহ্ণে তু ঘনৈঃ সূর্য ইবাবৃতঃ
ব্রাহ্মণৈঃ প্রাবিশত্তত্র জিষ্ণুর্ব্রহ্মপুরস্কৃতঃ