অধ্যায় 182

182.1

বৈশংপায়ন উবাচ
গত্বা তু তাং ভার্গবকর্মশালাং; পার্থৌ পৃথাং প্রাপ্য মহানুভাবৌ
তাং যাজ্ঞসেনীং পরমপ্রতীতৌ; ভিক্ষেত্যথাবেদয়তাং নরাগ্র্যৌ

কুটীগতা সা ত্বনবেক্ষ্য পুত্রা;নুবাচ ভুঙ্ক্তেতি সমেত্য সর্বে
পশ্চাত্তু কুন্তী প্রসমীক্ষ্য কন্যাং; কষ্টং ময়া ভাষিতমিত্যুবাচ

সাধর্মভীতা হি বিলজ্জমানা; তাং যাজ্ঞসেনীং পরমপ্রতীতাম্
পাণৌ গৃহীত্বোপজগাম কুন্তী; যুধিষ্ঠিরং বাক্যমুবাচ চেদম্

ইয়ং হি কন্যা দ্রুপদস্য রাজ্ঞ;স্তবানুজাভ্যাং ময়ি সংনিসৃষ্টা
যথোচিতং পুত্র ময়াপি চোক্তং; সমেত্য ভুঙ্ক্তেতি নৃপ প্রমাদাৎ

কথং ময়া নানৃতমুক্তমদ্য; ভবেত্কুরূণামৃষভ ব্রবীহি
পাঞ্চালরাজস্য সুতামধর্মো; ন চোপবর্তেত নভূতপূর্বঃ

মুহূর্তমাত্রং ত্বনুচিন্ত্য রাজা; যুধিষ্ঠিরো মাতরমুত্তমৌজাঃ
কুন্তীং সমাশ্বাস্য কুরুপ্রবীরো; ধনংজয়ং বাক্যমিদং বভাষে

ত্বয়া জিতা পাণ্ডব যাজ্ঞসেনী; ত্বয়া চ তোষিষ্যতি রাজপুত্রী
প্রজ্বাল্যতাং হূয়তাং চাপি বহ্নি;র্গৃহাণ পাণিং বিধিবত্ত্বমস্যাঃ

অর্জুন উবাচ
মা মাং নরেন্দ্র ত্বমধর্মভাজং; কৃথা ন ধর্মো হ্যয়মীপ্সিতোঽন্যৈঃ
ভবান্নিবেশ্যঃ প্রথমং ততোঽয়ং; ভীমো মহাবাহুরচিন্ত্যকর্মা

অহং ততো নকুলোঽনন্তরং মে; মাদ্রীসুতঃ সহদেবো জঘন্যঃ
বৃকোদরোঽহং চ যমৌ চ রাজ;ন্নিয়ং চ কন্যা ভবতঃ স্ম সর্বে

এবংগতে যত্করণীয়মত্র; ধর্ম্যং যশস্যং কুরু তত্প্রচিন্ত্য
পাঞ্চালরাজস্য চ যত্প্রিয়ং স্যা;ত্তদ্ব্রূহি সর্বে স্ম বশে স্থিতাস্তে

বৈশংপায়ন উবাচ
তে দৃষ্ট্বা তত্র তিষ্ঠন্তীং সর্বে কৃষ্ণাং যশস্বিনীম্
সংপ্রেক্ষ্যান্যোন্যমাসীনা হৃদয়ৈস্তামধারয়ন্

তেষাং হি দ্রৌপদীং দৃষ্ট্বা সর্বেষামমিতৌজসাম্
সংপ্রমথ্যেন্দ্রিয়গ্রামং প্রাদুরাসীন্মনোভবঃ

কাম্যং রূপং হি পাঞ্চাল্যা বিধাত্রা বিহিতং স্বয়ম্
বভূবাধিকমন্যাভ্যঃ সর্বভূতমনোহরম্

তেষামাকারভাবজ্ঞঃ কুন্তীপুত্রো যুধিষ্ঠিরঃ
দ্বৈপায়নবচঃ কৃত্স্নং সংস্মরন্বৈ নরর্ষভ

অব্রবীত্স হি তান্ভ্রাতৄন্মিথোভেদভয়ান্নৃপঃ
সর্বেষাং দ্রৌপদী ভার্যা ভবিষ্যতি হি নঃ শুভা