Utshovঅধ্যায় 183
183.1
বৈশংপায়ন উবাচ
ভ্রাতুর্বচস্তত্প্রসমীক্ষ্য সর্বে; জ্যেষ্ঠস্য পাণ্ডোস্তনয়াস্তদানীম্
তমেবার্থং ধ্যায়মানা মনোভি;রাসাং চক্রুরথ তত্রামিতৌজাঃ
183.2
বৃষ্ণিপ্রবীরস্তু কুরুপ্রবীরা;নাশঙ্কমানঃ সহরৌহিণেয়ঃ
জগাম তাং ভার্গবকর্মশালাং; যত্রাসতে তে পুরুষপ্রবীরাঃ
183.3
তত্রোপবিষ্টং পৃথুদীর্ঘবাহুং; দদর্শ কৃষ্ণঃ সহরৌহিণেয়ঃ
অজাতশত্রুং পরিবার্য তাংশ্চ; উপোপবিষ্টাঞ্জ্বলনপ্রকাশান্
183.4
ততোঽব্রবীদ্বাসুদেবোঽভিগম্য; কুন্তীসুতং ধর্মভৃতাং বরিষ্ঠম্
কৃষ্ণোঽহমস্মীতি নিপীড্য পাদৌ; যুধিষ্ঠিরস্যাজমীঢস্য রাজ্ঞঃ
183.5
তথৈব তস্যাপ্যনু রৌহিণেয়;স্তৌ চাপি হৃষ্টাঃ কুরবোঽভ্যনন্দন্
পিতৃষ্বসুশ্চাপি যদুপ্রবীরা;বগৃহ্ণতাং ভারতমুখ্য পাদৌ
183.6
অজাতশত্রুশ্চ কুরুপ্রবীরঃ; পপ্রচ্ছ কৃষ্ণং কুশলং নিবেদ্য
কথং বয়ং বাসুদেব ত্বয়েহ; গূঢা বসন্তো বিদিতাঃ স্ম সর্বে
183.7
তমব্রবীদ্বাসুদেবঃ প্রহস্য; গূঢোঽপ্যগ্নির্জ্ঞায়ত এব রাজন্
তং বিক্রমং পাণ্ডবেয়ানতীত্য; কোঽন্যঃ কর্তা বিদ্যতে মানুষেষু
183.8
দিষ্ট্যা তস্মাত্পাবকাত্সংপ্রমুক্তা; যূয়ং সর্বে পাণ্ডবাঃ শত্রুসাহাঃ
দিষ্ট্যা পাপো ধৃতরাষ্ট্রস্য পুত্রঃ; সহামাত্যো ন সকামোঽভবিষ্যৎ
183.9
ভদ্রং বোঽস্তু নিহিতং যদ্গুহায়াং; বিবর্ধধ্বং জ্বলন ইবেধ্যমানঃ
মা বো বিদ্যুঃ পার্থিবাঃ কেচনেহ; যাস্যাবহে শিবিরায়ৈব তাবৎ
সোঽনুজ্ঞাতঃ পাণ্ডবেনাব্যয়শ্রীঃ; প্রায়াচ্ছীঘ্রং বলদেবেন সার্ধম্