অধ্যায় 184

184.1

বৈশংপায়ন উবাচ
ধৃষ্টদ্যুম্নস্তু পাঞ্চাল্যঃ পৃষ্ঠতঃ কুরুনন্দনৌ
অন্বগচ্ছত্তদা যান্তৌ ভার্গবস্য নিবেশনম্

সোঽজ্ঞায়মানঃ পুরুষানবধায় সমন্ততঃ
স্বয়মারান্নিবিষ্টোঽভূদ্ভার্গবস্য নিবেশনে

সায়েঽথ ভীমস্তু রিপুপ্রমাথী; জিষ্ণুর্যমৌ চাপি মহানুভাবৌ
ভৈক্ষং চরিত্বা তু যুধিষ্ঠিরায়; নিবেদয়াং চক্রুরদীনসত্ত্বাঃ

ততস্তু কুন্তী দ্রুপদাত্মজাং তা;মুবাচ কালে বচনং বদান্যা
অতোঽগ্রমাদায় কুরুষ্ব ভদ্রে; বলিং চ বিপ্রায় চ দেহি ভিক্ষাম্

যে চান্নমিচ্ছন্তি দদস্ব তেভ্যঃ; পরিশ্রিতা যে পরিতো মনুষ্যাঃ
ততশ্চ শেষং প্রবিভজ্য শীঘ্র;মর্ধং চতুর্ণাং মম চাত্মনশ্চ

অর্ধং চ ভীমায় দদাহি ভদ্রে; য এষ মত্তর্ষভতুল্যরূপঃ
শ্যামো যুবা সংহননোপপন্ন; এষো হি বীরো বহুভুক্সদৈব

সা হৃষ্টরূপৈব তু রাজপুত্রী; তস্যা বচঃ সাধ্ববিশঙ্কমানা
যথাবদুক্তং প্রচকার সাধ্বী; তে চাপি সর্বেঽভ্যবজহ্রুরন্নম্

কুশৈস্তু ভূমৌ শয়নং চকার; মাদ্রীসুতঃ সহদেবস্তরস্বী
যথাত্মীয়ান্যজিনানি সর্বে; সংস্তীর্য বীরাঃ সুষুপুর্ধরণ্যাম্

অগস্ত্যশাস্তামভিতো দিশং তু; শিরাংসি তেষাং কুরুসত্তমানাম্
কুন্তী পুরস্তাত্তু বভূব তেষাং; কৃষ্ণা তিরশ্চৈব বভূব পত্তঃ

অশেত ভূমৌ সহ পাণ্ডুপুত্রৈঃ; পাদোপধানেব কৃতা কুশেষু
ন তত্র দুঃখং চ বভূব তস্যা; ন চাবমেনে কুরুপুংগবাংস্তান্

তে তত্র শূরাঃ কথয়াং বভূবুঃ; কথা বিচিত্রাঃ পৃতনাধিকারাঃ
অস্ত্রাণি দিব্যানি রথাংশ্চ নাগা;ন্খড্গান্গদাশ্চাপি পরশ্বধাংশ্চ

তেষাং কথাস্তাঃ পরিকীর্ত্যমানাঃ; পাঞ্চালরাজস্য সুতস্তদানীম্
শুশ্রাব কৃষ্ণাং চ তথা নিষণ্ণাং; তে চাপি সর্বে দদৃশুর্মনুষ্যাঃ

ধৃষ্টদ্যুম্নো রাজপুত্রস্তু সর্বং; বৃত্তং তেষাং কথিতং চৈব রাত্রৌ
সর্বং রাজ্ঞে দ্রুপদায়াখিলেন; নিবেদয়িষ্যংস্ত্বরিতো জগাম

পাঞ্চালরাজস্তু বিষণ্ণরূপ;স্তান্পাণ্ডবানপ্রতিবিন্দমানঃ
ধৃষ্টদ্যুম্নং পর্যপৃচ্ছন্মহাত্মা; ক্ব সা গতা কেন নীতা চ কৃষ্ণা

কচ্চিন্ন শূদ্রেণ ন হীনজেন; বৈশ্যেন বা করদেনোপপন্না
কচ্চিত্পদং মূর্ধ্নি ন মে নিদিগ্ধং; কচ্চিন্মালা পতিতা ন শ্মশানে

কচ্চিত্সবর্ণপ্রবরো মনুষ্য; উদ্রিক্তবর্ণোঽপ্যুত বেহ কচ্চিৎ
কচ্চিন্ন বামো মম মূর্ধ্নি পাদঃ; কৃষ্ণাভিমর্শেন কৃতোঽদ্য পুত্র

কচ্চিচ্চ যক্ষ্যে পরমপ্রতীতঃ; সংয়ুজ্য পার্থেন নরর্ষভেণ
ব্রবীহি তত্ত্বেন মহানুভাবঃ; কোঽসৌ বিজেতা দুহিতুর্মমাদ্য

বিচিত্রবীর্যস্য তু কচ্চিদদ্য; কুরুপ্রবীরস্য ধরন্তি পুত্রাঃ
কচ্চিত্তু পার্থেন যবীয়সাদ্য; ধনুর্গৃহীতং নিহতং চ লক্ষ্যম্