Utshovঅধ্যায় 185
185.1
বৈশংপায়ন উবাচ
ততস্তথোক্তঃ পরিহৃষ্টরূপঃ; পিত্রে শশংসাথ স রাজপুত্রঃ
ধৃষ্টদ্যুম্নঃ সোমকানাং প্রবর্হো; বৃত্তং যথা যেন হৃতা চ কৃষ্ণা
185.2
যোঽসৌ যুবা স্বায়তলোহিতাক্ষঃ; কৃষ্ণাজিনী দেবসমানরূপঃ
যঃ কার্মুকাগ্র্যং কৃতবানধিজ্যং; লক্ষ্যং চ তত্পাতিতবান্পৃথিব্যাম্
185.3
অসজ্জমানশ্চ গতস্তরস্বী; বৃতো দ্বিজাগ্র্যৈরভিপূজ্যমানঃ
চক্রাম বজ্রীব দিতেঃ সুতেষু; সর্বৈশ্চ দেবৈরৃষিভিশ্চ জুষ্টঃ
185.4
কৃষ্ণা চ গৃহ্যাজিনমন্বয়াত্তং; নাগং যথা নাগবধূঃ প্রহৃষ্টা
অমৃষ্যমাণেষু নরাধিপেষু; ক্রুদ্ধেষু তং তত্র সমাপতত্সু
185.5
ততোঽপরঃ পার্থিবরাজমধ্যে; প্রবৃদ্ধমারুজ্য মহীপ্ররোহম্
প্রকালয়ন্নেব স পার্থিবৌঘা;ন্ক্রুদ্ধোঽন্তকঃ প্রাণভৃতো যথৈব
185.6
তৌ পার্থিবানাং মিষতাং নরেন্দ্র; কৃষ্ণামুপাদায় গতৌ নরাগ্র্যৌ
বিভ্রাজমানাবিব চন্দ্রসূর্যৌ; বাহ্যাং পুরাদ্ভার্গবকর্মশালাম্
185.7
তত্রোপবিষ্টার্চিরিবানলস্য; তেষাং জনিত্রীতি মম প্রতর্কঃ
তথাবিধৈরেব নরপ্রবীরৈ;রুপোপবিষ্টৈস্ত্রিভিরগ্নিকল্পৈঃ
185.8
তস্যাস্ততস্তাবভিবাদ্য পাদা;বুক্ত্বা চ কৃষ্ণামভিবাদয়েতি
স্থিতৌ চ তত্রৈব নিবেদ্য কৃষ্ণাং; ভৈক্ষপ্রচারায় গতা নরাগ্র্যাঃ
185.9
তেষাং তু ভৈক্ষং প্রতিগৃহ্য কৃষ্ণা; কৃত্বা বলিং ব্রাহ্মণসাচ্চ কৃত্বা
তাং চৈব বৃদ্ধাং পরিবিষ্য তাংশ্চ; নরপ্রবীরান্স্বয়মপ্যভুঙ্ক্ত
185.10
সুপ্তাস্তু তে পার্থিব সর্ব এব; কৃষ্ণা তু তেষাং চরণোপধানম্
আসীত্পৃথিব্যাং শয়নং চ তেষাং; দর্ভাজিনাগ্র্যাস্তরণোপপন্নম্
185.11
তে নর্দমানা ইব কালমেঘাঃ; কথা বিচিত্রাঃ কথয়াং বভূবুঃ
ন বৈশ্যশূদ্রৌপয়িকীঃ কথাস্তা; ন চ দ্বিজাতেঃ কথয়ন্তি বীরাঃ
185.12
নিঃসংশয়ং ক্ষত্রিয়পুংগবাস্তে; যথা হি যুদ্ধং কথয়ন্তি রাজন্
আশা হি নো ব্যক্তমিয়ং সমৃদ্ধা; মুক্তান্হি পার্থাঞ্শৃণুমোঽগ্নিদাহাৎ
185.13
যথা হি লক্ষ্যং নিহতং ধনুশ্চ; সজ্যং কৃতং তেন তথা প্রসহ্য
যথা চ ভাষন্তি পরস্পরং তে; ছন্না ধ্রুবং তে প্রচরন্তি পার্থাঃ
185.14
ততঃ স রাজা দ্রুপদঃ প্রহৃষ্টঃ; পুরোহিতং প্রেষয়াং তত্র চক্রে
বিদ্যাম যুষ্মানিতি ভাষমাণো; মহাত্মনঃ পাণ্ডুসুতাঃ স্থ কচ্চিৎ
185.15
গৃহীতবাক্যো নৃপতেঃ পুরোধা; গত্বা প্রশংসামভিধায় তেষাম্
বাক্যং যথাবন্নৃপতেঃ সমগ্র;মুবাচ তান্স ক্রমবিত্ক্রমেণ
185.16
বিজ্ঞাতুমিচ্ছত্যবনীশ্বরো বঃ; পাঞ্চালরাজো দ্রুপদো বরার্হাঃ
লক্ষ্যস্য বেদ্ধারমিমং হি দৃষ্ট্বা; হর্ষস্য নান্তং পরিপশ্যতে সঃ
185.17
তদাচড্ঢ্বং জ্ঞাতিকুলানুপূর্বীং; পদং শিরঃসু দ্বিষতাং কুরুধ্বম্
প্রহ্লাদয়ধ্বং হৃদয়ং মমেদং; পাঞ্চালরাজস্য সহানুগস্য
185.18
পাণ্ডুর্হি রাজা দ্রুপদস্য রাজ্ঞঃ; প্রিয়ঃ সখা চাত্মসমো বভূব
তস্যৈষ কামো দুহিতা মমেয়ং; স্নুষা যদি স্যাদিতি কৌরবস্য
185.19
অয়ং চ কামো দ্রুপদস্য রাজ্ঞো; হৃদি স্থিতো নিত্যমনিন্দিতাঙ্গাঃ
যদর্জুনো বৈ পৃথুদীর্ঘবাহু;র্ধর্মেণ বিন্দেত সুতাং মমেতি
185.20
তথোক্তবাক্যং তু পুরোহিতং তং; স্থিতং বিনীতং সমুদীক্ষ্য রাজা
সমীপস্থং ভীমমিদং শশাস; প্রদীয়তাং পাদ্যমর্ঘ্যং তথাস্মৈ
185.21
মান্যঃ পুরোধা দ্রুপদস্য রাজ্ঞ;স্তস্মৈ প্রয়োজ্যাভ্যধিকৈব পূজা
ভীমস্তথা তত্কৃতবান্নরেন্দ্র; তাং চৈব পূজাং প্রতিসংগৃহীত্বা
185.22
সুখোপবিষ্টং তু পুরোহিতং তং; যুধিষ্ঠিরো ব্রাহ্মণমিত্যুবাচ
পাঞ্চালরাজেন সুতা নিসৃষ্টা; স্বধর্মদৃষ্টেন যথানুকামম্
185.23
প্রদিষ্টশুল্কা দ্রুপদেন রাজ্ঞা; সানেন বীরেণ তথানুবৃত্তা
ন তত্র বর্ণেষু কৃতা বিবক্ষা; ন জীবশিল্পে ন কুলে ন গোত্রে
185.24
কৃতেন সজ্যেন হি কার্মুকেণ; বিদ্ধেন লক্ষ্যেণ চ সংনিসৃষ্টা
সেয়ং তথানেন মহাত্মনেহ; কৃষ্ণা জিতা পার্থিবসংঘমধ্যে
185.25
নৈবংগতে সৌমকিরদ্য রাজা; সংতাপমর্হত্যসুখায় কর্তুম্
কামশ্চ যোঽসৌ দ্রুপদস্য রাজ্ঞঃ; স চাপি সংপত্স্যতি পার্থিবস্য
185.26
অপ্রাপ্যরূপাং হি নরেন্দ্রকন্যা;মিমামহং ব্রাহ্মণ সাধু মন্যে
ন তদ্ধনুর্মন্দবলেন শক্যং; মৌর্ব্যা সমায়োজয়িতুং তথা হি
ন চাকৃতাস্ত্রেণ ন হীনজেন; লক্ষ্যং তথা পাতয়িতুং হি শক্যম্
185.27
তস্মান্ন তাপং দুহিতুর্নিমিত্তং; পাঞ্চালরাজোঽর্হতি কর্তুমদ্য
ন চাপি তত্পাতনমন্যথেহ; কর্তুং বিষহ্যং ভুবি মানবেন
185.28
এবং ব্রুবত্যেব যুধিষ্ঠিরে তু; পাঞ্চালরাজস্য সমীপতোঽন্যঃ
তত্রাজগামাশু নরো দ্বিতীয়ো; নিবেদয়িষ্যন্নিহ সিদ্ধমন্নম্