অধ্যায় 186

186.1

দূত উবাচ
জন্যার্থমন্নং দ্রুপদেন রাজ্ঞা; বিবাহহেতোরুপসংস্কৃতং চ
তদাপ্নুবধ্বং কৃতসর্বকার্যাঃ; কৃষ্ণা চ তত্রৈব চিরং ন কার্যম্

ইমে রথাঃ কাঞ্চনপদ্মচিত্রাঃ; সদশ্বয়ুক্তা বসুধাধিপার্হাঃ
এতান্সমারুহ্য পরৈত সর্বে; পাঞ্চালরাজস্য নিবেশনং তৎ

বৈশংপায়ন উবাচ
ততঃ প্রয়াতাঃ কুরুপুংগবাস্তে; পুরোহিতং তং প্রথমং প্রয়াপ্য
আস্থায় যানানি মহান্তি তানি; কুন্তী চ কৃষ্ণা চ সহৈব যাতে

শ্রুত্বা তু বাক্যানি পুরোহিতস্য; যান্যুক্তবান্ভারত ধর্মরাজঃ
জিজ্ঞাসয়ৈবাথ কুরূত্তমানাং; দ্রব্যাণ্যনেকান্যুপসংজহার

ফলানি মাল্যানি সুসংস্কৃতানি; চর্মাণি বর্মাণি তথাসনানি
গাশ্চৈব রাজন্নথ চৈব রজ্জূ;র্দ্রব্যাণি চান্যানি কৃষীনিমিত্তম্

অন্যেষু শিল্পেষু চ যান্যপি স্যুঃ; সর্বাণি কৢপ্তান্যখিলেন তত্র
ক্রীডানিমিত্তানি চ যানি তানি; সর্বাণি তত্রোপজহার রাজা

রথাশ্ববর্মাণি চ ভানুমন্তি; খড্গা মহান্তোঽশ্বরথাশ্চ চিত্রাঃ
ধনূংষি চাগ্র্যাণি শরাশ্চ মুখ্যাঃ; শক্ত্যৃষ্টয়ঃ কাঞ্চনভূষিতাশ্চ

প্রাসা ভুশুণ্ড্যশ্চ পরশ্বধাশ্চ; সাংগ্রামিকং চৈব তথৈব সর্বম্
শয্যাসনান্যুত্তমসংস্কৃতানি; তথৈব চাসন্বিবিধানি তত্র

কুন্তী তু কৃষ্ণাং পরিগৃহ্য সাধ্বী;মন্তঃপুরং দ্রুপদস্যাবিবেষ
স্ত্রিয়শ্চ তাং কৌরবরাজপত্নীং; প্রত্যর্চয়াং চক্রুরদীনসত্ত্বাঃ

তান্সিংহবিক্রান্তগতীনবেক্ষ্য; মহর্ষভাক্ষানজিনোত্তরীয়ান্
গূঢোত্তরাংসান্ভুজগেন্দ্রভোগ;প্রলম্ববাহূন্পুরুষপ্রবীরান্

রাজা চ রাজ্ঞঃ সচিবাশ্চ সর্বে; পুত্রাশ্চ রাজ্ঞঃ সুহৃদস্তথৈব
প্রেষ্যাশ্চ সর্বে নিখিলেন রাজ;ন্হর্ষং সমাপেতুরতীব তত্র

তে তত্র বীরাঃ পরমাসনেষু; সপাদপীঠেষ্ববিশঙ্কমানাঃ
যথানুপূর্ব্যা বিবিশুর্নরাগ্র্যা;স্তদা মহার্হেষু ন বিস্ময়ন্তঃ

উচ্চাবচং পার্থিবভোজনীয়ং; পাত্রীষু জাম্বূনদরাজতীষু
দাসাশ্চ দাস্যশ্চ সুমৃষ্টবেষাঃ; ভোজাপকাশ্চাপ্যুপজহ্রুরন্নম্

তে তত্র ভুক্ত্বা পুরুষপ্রবীরা; যথানুকামং সুভৃশং প্রতীতাঃ
উত্ক্রম্য সর্বাণি বসূনি তত্র; সাংগ্রামিকান্যাবিবিশুর্নৃবীরাঃ

তল্লক্ষয়িত্বা দ্রুপদস্য পুত্রো; রাজা চ সর্বৈঃ সহ মন্ত্রিমুখ্যৈঃ
সমর্চয়ামাসুরুপেত্য হৃষ্টাঃ; কুন্তীসুতান্পার্থিবপুত্রপৌত্রান্