Utshovঅধ্যায় 187
187.1
বৈশংপায়ন উবাচ
তত আহূয় পাঞ্চাল্যো রাজপুত্রং যুধিষ্ঠিরম্
পরিগ্রহেণ ব্রাহ্মেণ পরিগৃহ্য মহাদ্যুতিঃ
187.2
পর্যপৃচ্ছদদীনাত্মা কুন্তীপুত্রং সুবর্চসম্
কথং জানীম ভবতঃ ক্ষত্রিয়ান্ব্রাহ্মণানুত
187.3
বৈশ্যান্বা গুণসংপন্নানুত বা শূদ্রয়োনিজান্
মায়ামাস্থায় বা সিদ্ধাংশ্চরতঃ সর্বতোদিশম্
187.4
কৃষ্ণাহেতোরনুপ্রাপ্তান্দিবঃ সংদর্শনার্থিনঃ
ব্রবীতু নো ভবান্সত্যং সংদেহো হ্যত্র নো মহান্
187.5
অপি নঃ সংশয়স্যান্তে মনস্তুষ্টিরিহাবিশেৎ
অপি নো ভাগধেয়ানি শুভানি স্যুঃ পরংতপ
187.6
কাময়া ব্রূহি সত্যং ত্বং সত্যং রাজসু শোভতে
ইষ্টাপূর্তেন চ তথা বক্তব্যমনৃতং ন তু
187.7
শ্রুত্বা হ্যমরসংকাশ তব বাক্যমরিংদম
ধ্রুবং বিবাহকরণমাস্থাস্যামি বিধানতঃ
187.8
যুধিষ্ঠির উবাচ
মা রাজন্বিমনা ভূস্ত্বং পাঞ্চাল্য প্রীতিরস্তু তে
ঈপ্সিতস্তে ধ্রুবঃ কামঃ সংবৃত্তোঽয়মসংশয়ম্
187.9
বয়ং হি ক্ষত্রিয়া রাজন্পাণ্ডোঃ পুত্রা মহাত্মনঃ
জ্যেষ্ঠং মাং বিদ্ধি কৌন্তেয়ং ভীমসেনার্জুনাবিমৌ
যাভ্যাং তব সুতা রাজন্নির্জিতা রাজসংসদি
187.10
যমৌ তু তত্র রাজেন্দ্র যত্র কৃষ্ণা প্রতিষ্ঠিতা
ব্যেতু তে মানসং দুঃখং ক্ষত্রিয়াঃ স্মো নরর্ষভ
পদ্মিনীব সুতেয়ং তে হ্রদাদন্যং হ্রদং গতা
187.11
ইতি তথ্যং মহারাজ সর্বমেতদ্ব্রবীমি তে
ভবান্হি গুরুরস্মাকং পরমং চ পরায়ণম্
187.12
বৈশংপায়ন উবাচ
ততঃ স দ্রুপদো রাজা হর্ষব্যাকুললোচনঃ
প্রতিবক্তুং তদা যুক্তং নাশকত্তং যুধিষ্ঠিরম্
187.13
যত্নেন তু স তং হর্ষং সংনিগৃহ্য পরংতপঃ
অনুরূপং ততো রাজা প্রত্যুবাচ যুধিষ্ঠিরম্
187.14
পপ্রচ্ছ চৈনং ধর্মাত্মা যথা তে প্রদ্রুতাঃ পুরা
স তস্মৈ সর্বমাচখ্যাবানুপূর্ব্যেণ পাণ্ডবঃ
187.15
তচ্ছ্রুত্বা দ্রুপদো রাজা কুন্তীপুত্রস্য ভাষিতম্
বিগর্হয়ামাস তদা ধৃতরাষ্ট্রং জনেশ্বরম্
187.16
আশ্বাসয়ামাস চ তং কুন্তীপুত্রং যুধিষ্ঠিরম্
প্রতিজজ্ঞে চ রাজ্যায় দ্রুপদো বদতাং বরঃ
187.17
ততঃ কুন্তী চ কৃষ্ণা চ ভীমসেনার্জুনাবপি
যমৌ চ রাজ্ঞা সংদিষ্টৌ বিবিশুর্ভবনং মহৎ
187.18
তত্র তে ন্যবসন্রাজন্যজ্ঞসেনেন পূজিতাঃ
প্রত্যাশ্বস্তাংস্ততো রাজা সহ পুত্রৈরুবাচ তান্
187.19
গৃহ্ণাতু বিধিবত্পাণিমদ্যৈব কুরুনন্দনঃ
পুণ্যেঽহনি মহাবাহুরর্জুনঃ কুরুতাং ক্ষণম্
187.20
ততস্তমব্রবীদ্রাজা ধর্মপুত্রো যুধিষ্ঠিরঃ
মমাপি দারসংবন্ধঃ কার্যস্তাবদ্বিশাং পতে
187.21
দ্রুপদ উবাচ
ভবান্বা বিধিবত্পাণিং গৃহ্ণাতু দুহিতুর্মম
যস্য বা মন্যসে বীর তস্য কৃষ্ণামুপাদিশ
187.22
যুধিষ্ঠির উবাচ
সর্বেষাং দ্রৌপদী রাজন্মহিষী নো ভবিষ্যতি
এবং হি ব্যাহৃতং পূর্বং মম মাত্রা বিশাং পতে
187.23
অহং চাপ্যনিবিষ্টো বৈ ভীমসেনশ্চ পাণ্ডবঃ
পার্থেন বিজিতা চৈষা রত্নভূতা চ তে সুতা
187.24
এষ নঃ সময়ো রাজন্রত্নস্য সহভোজনম্
ন চ তং হাতুমিচ্ছামঃ সময়ং রাজসত্তম
187.25
সর্বেষাং ধর্মতঃ কৃষ্ণা মহিষী নো ভবিষ্যতি
আনুপূর্ব্যেণ সর্বেষাং গৃহ্ণাতু জ্বলনে করম্
187.26
দ্রুপদ উবাচ
একস্য বহ্ব্যো বিহিতা মহিষ্যঃ কুরুনন্দন
নৈকস্যা বহবঃ পুংসো বিধীয়ন্তে কদাচন
187.27
লোকবেদবিরুদ্ধং ত্বং নাধর্মং ধার্মিকঃ শুচিঃ
কর্তুমর্হসি কৌন্তেয় কস্মাত্তে বুদ্ধিরীদৃশী
187.28
যুধিষ্ঠির উবাচ
সূক্ষ্মো ধর্মো মহারাজ নাস্য বিদ্মো বয়ং গতিম্
পূর্বেষামানুপূর্ব্যেণ যাতং বর্ত্মানুয়ামহে
187.29
ন মে বাগনৃতং প্রাহ নাধর্মে ধীয়তে মতিঃ
এবং চৈব বদত্যম্বা মম চৈব মনোগতম্
187.30
এষ ধর্মো ধ্রুবো রাজংশ্চরৈনমবিচারয়ন্
মা চ তেঽত্র বিশঙ্কা ভূত্কথংচিদপি পার্থিব
187.31
দ্রুপদ উবাচ
ত্বং চ কুন্তী চ কৌন্তেয় ধৃষ্টদ্যুম্নশ্চ মে সুতঃ
কথয়ন্ত্বিতিকর্তব্যং শ্বঃ কালে করবামহে
187.32
বৈশংপায়ন উবাচ
তে সমেত্য ততঃ সর্বে কথয়ন্তি স্ম ভারত
অথ দ্বৈপায়নো রাজন্নভ্যাগচ্ছদ্যদৃচ্ছয়া