অধ্যায় 188

188.1

বৈশংপায়ন উবাচ
ততস্তে পাণ্ডবাঃ সর্বে পাঞ্চাল্যশ্চ মহায়শাঃ
প্রত্যুত্থায় মহাত্মানং কৃষ্ণং দৃষ্ট্বাভ্যপূজয়ন্

প্রতিনন্দ্য স তান্সর্বান্পৃষ্ট্বা কুশলমন্ততঃ
আসনে কাঞ্চনে শুভ্রে নিষসাদ মহামনাঃ

অনুজ্ঞাতাস্তু তে সর্বে কৃষ্ণেনামিততেজসা
আসনেষু মহার্হেষু নিষেদুর্দ্বিপদাং বরাঃ

ততো মুহূর্তান্মধুরাং বাণীমুচ্চার্য পার্ষতঃ
পপ্রচ্ছ তং মহাত্মানং দ্রৌপদ্যর্থে বিশাং পতিঃ

কথমেকা বহূনাং স্যান্ন চ স্যাদ্ধর্মসংকরঃ
এতন্নো ভগবান্সর্বং প্রব্রবীতু যথাতথম্

ব্যাস উবাচ
অস্মিন্ধর্মে বিপ্রলম্ভে লোকবেদবিরোধকে
যস্য যস্য মতং যদ্যচ্ছ্রোতুমিচ্ছামি তস্য তৎ

দ্রুপদ উবাচ
অধর্মোঽয়ং মম মতো বিরুদ্ধো লোকবেদয়োঃ
ন হ্যেকা বিদ্যতে পত্নী বহূনাং দ্বিজসত্তম

ন চাপ্যাচরিতঃ পূর্বৈরয়ং ধর্মো মহাত্মভিঃ
ন চ ধর্মোঽপ্যনেকস্থশ্চরিতব্যঃ সনাতনঃ

অতো নাহং করোম্যেবং ব্যবসায়ং ক্রিয়াং প্রতি
ধর্মসংদেহসংদিগ্ধং প্রতিভাতি হি মামিদম্

ধৃষ্টদ্যুম্ন উবাচ
যবীয়সঃ কথং ভার্যাং জ্যেষ্ঠো ভ্রাতা দ্বিজর্ষভ
ব্রহ্মন্সমভিবর্তেত সদ্বৃত্তঃ সংস্তপোধন

ন তু ধর্মস্য সূক্ষ্মত্বাদ্গতিং বিদ্মঃ কথংচন
অধর্মো ধর্ম ইতি বা ব্যবসায়ো ন শক্যতে

কর্তুমস্মদ্বিধৈর্ব্রহ্মংস্ততো ন ব্যবসাম্যহম্
পঞ্চানাং মহিষী কৃষ্ণা ভবত্বিতি কথংচন

যুধিষ্ঠির উবাচ
ন মে বাগনৃতং প্রাহ নাধর্মে ধীয়তে মতিঃ
বর্ততে হি মনো মেঽত্র নৈষোঽধর্মঃ কথংচন

শ্রূয়তে হি পুরাণেঽপি জটিলা নাম গৌতমী
ঋষীনধ্যাসিতবতী সপ্ত ধর্মভৃতাং বর

গুরোশ্চ বচনং প্রাহুর্ধর্মং ধর্মজ্ঞসত্তম
গুরূণাং চৈব সর্বেষাং জনিত্রী পরমো গুরুঃ

সা চাপ্যুক্তবতী বাচং ভৈক্ষবদ্ভুজ্যতামিতি
তস্মাদেতদহং মন্যে ধর্মং দ্বিজবরোত্তম

কুন্ত্যুবাচ
এবমেতদ্যথাহায়ং ধর্মচারী যুধিষ্ঠিরঃ
অনৃতান্মে ভয়ং তীব্রং মুচ্যেয়মনৃতাত্কথম্

ব্যাস উবাচ
অনৃতান্মোক্ষ্যসে ভদ্রে ধর্মশ্চৈষ সনাতনঃ
ন তু বক্ষ্যামি সর্বেষাং পাঞ্চাল শৃণু মে স্বয়ম্

যথায়ং বিহিতো ধর্মো যতশ্চায়ং সনাতনঃ
যথা চ প্রাহ কৌন্তেয়স্তথা ধর্মো ন সংশয়ঃ

বৈশংপায়ন উবাচ
তত উত্থায় ভগবান্ব্যাসো দ্বৈপায়নঃ প্রভুঃ
করে গৃহীত্বা রাজানং রাজবেশ্ম সমাবিশৎ

পাণ্ডবাশ্চাপি কুন্তী চ ধৃষ্টদ্যুম্নশ্চ পার্ষতঃ
বিচেতসস্তে তত্রৈব প্রতীক্ষন্তে স্ম তাবুভৌ

ততো দ্বৈপায়নস্তস্মৈ নরেন্দ্রায় মহাত্মনে
আচখ্যৌ তদ্যথা ধর্মো বহূনামেকপত্নিতা