Utshovঅধ্যায় 189
189.1
ব্যাস উবাচ
পুরা বৈ নৈমিষারণ্যে দেবাঃ সত্রমুপাসতে
তত্র বৈবস্বতো রাজঞ্শামিত্রমকরোত্তদা
189.2
ততো যমো দীক্ষিতস্তত্র রাজ;ন্নামারয়ত্কিংচিদপি প্রজাভ্যঃ
ততঃ প্রজাস্তা বহুলা বভূবুঃ; কালাতিপাতান্মরণাত্প্রহীণাঃ
189.3
ততস্তু শক্রো বরুণঃ কুবেরঃ; সাধ্যা রুদ্রা বসবশ্চাশ্বিনৌ চ
প্রণেতারং ভুবনস্য প্রজাপতিং; সমাজগ্মুস্তত্র দেবাস্তথান্যে
189.4
ততোঽব্রুবঁল্লোকগুরুং সমেতা; ভয়ং নস্তীব্রং মানুষাণাং বিবৃদ্ধ্যা
তস্মাদ্ভয়াদুদ্বিজন্তঃ সুখেপ্সবঃ; প্রয়াম সর্বে শরণং ভবন্তম্
189.5
ব্রহ্মোবাচ
কিং বো ভয়ং মানুষেভ্যো যূয়ং সর্বে যদামরাঃ
মা বো মর্ত্যসকাশাদ্বৈ ভয়ং ভবতু কর্হিচিৎ
189.6
দেবা ঊচুঃ
মর্ত্যা হ্যমর্ত্যাঃ সংবৃত্তা ন বিশেষোঽস্তি কশ্চন
অবিশেষাদুদ্বিজন্তো বিশেষার্থমিহাগতাঃ
189.7
ব্রহ্মোবাচ
বৈবস্বতো ব্যাপৃতঃ সত্রহেতো;স্তেন ত্বিমে ন ম্রিয়ন্তে মনুষ্যাঃ
তস্মিন্নেকাগ্রে কৃতসর্বকার্যে; তত এষাং ভবিতৈবান্তকালঃ
189.8
বৈবস্বতস্যাপি তনুর্বিভূতা; বীর্যেণ যুষ্মাকমুত প্রয়ুক্তা
সৈষামন্তো ভবিতা হ্যন্তকালে; তনুর্হি বীর্যং ভবিতা নরেষু
189.9
ব্যাস উবাচ
ততস্তু তে পূর্বজদেববাক্যং; শ্রুত্বা দেবা যত্র দেবা যজন্তে
সমাসীনাস্তে সমেতা মহাবলা; ভাগীরথ্যাং দদৃশুঃ পুণ্ডরীকম্
189.10
দৃষ্ট্বা চ তদ্বিস্মিতাস্তে বভূবু;স্তেষামিন্দ্রস্তত্র শূরো জগাম
সোঽপশ্যদ্যোষামথ পাবকপ্রভাং; যত্র গঙ্গা সততং সংপ্রসূতা
189.11
সা তত্র যোষা রুদতী জলার্থিনী; গঙ্গাং দেবীং ব্যবগাহ্যাবতিষ্ঠৎ
তস্যাশ্রুবিন্দুঃ পতিতো জলে বৈ; তত্পদ্মমাসীদথ তত্র কাঞ্চনম্
189.12
তদদ্ভুতং প্রেক্ষ্য বজ্রী তদানী;মপৃচ্ছত্তাং যোষিতমন্তিকাদ্বৈ
কা ত্বং কথং রোদিষি কস্য হেতো;র্বাক্যং তথ্যং কাময়েহ ব্রবীহি
189.13
স্ত্র্যুবাচ
ত্বং বেত্স্যসে মামিহ যাস্মি শক্র; যদর্থং চাহং রোদিমি মন্দভাগ্যা
আগচ্ছ রাজন্পুরতোঽহং গমিষ্যে; দ্রষ্টাসি তদ্রোদিমি যত্কৃতেঽহম্
189.14
ব্যাস উবাচ
তাং গচ্ছন্তীমন্বগচ্ছত্তদানীং; সোঽপশ্যদারাত্তরুণং দর্শনীয়ম্
সিংহাসনস্থং যুবতীসহায়ং; ক্রীডন্তমক্ষৈর্গিরিরাজমূর্ধ্নি
189.15
তমব্রবীদ্দেবরাজো মমেদং; ত্বং বিদ্ধি বিশ্বং ভুবনং বশে স্থিতম্
ঈশোঽহমস্মীতি সমন্যুরব্রবী;দ্দৃষ্ট্বা তমক্ষৈঃ সুভৃশং প্রমত্তম্
189.16
ক্রুদ্ধং তু শক্রং প্রসমীক্ষ্য দেবো; জহাস শক্রং চ শনৈরুদৈক্ষত
সংস্তম্ভিতোঽভূদথ দেবরাজ;স্তেনেক্ষিতঃ স্থাণুরিবাবতস্থে
189.17
যদা তু পর্যাপ্তমিহাস্য ক্রীডয়া; তদা দেবীং রুদতীং তামুবাচ
আনীয়তামেষ যতোঽহমারা;ন্মৈনং দর্পঃ পুনরপ্যাবিশেত
189.18
ততঃ শক্রঃ স্পৃষ্টমাত্রস্তয়া তু; স্রস্তৈরঙ্গৈঃ পতিতোঽভূদ্ধরণ্যাম্
তমব্রবীদ্ভগবানুগ্রতেজা; মৈবং পুনঃ শক্র কৃথাঃ কথংচিৎ
189.19
বিবর্তয়ৈনং চ মহাদ্রিরাজং; বলং চ বীর্যং চ তবাপ্রমেয়ম্
বিবৃত্য চৈবাবিশ মধ্যমস্য; যত্রাসতে ত্বদ্বিধাঃ সূর্যভাসঃ
189.20
স তদ্বিবৃত্য শিখরং মহাগিরে;স্তুল্যদ্যুতীংশ্চতুরোঽন্যান্দদর্শ
স তানভিপ্রেক্ষ্য বভূব দুঃখিতঃ; কচ্চিন্নাহং ভবিতা বৈ যথেমে
189.21
ততো দেবো গিরিশো বজ্রপাণিং; বিবৃত্য নেত্রে কুপিতোঽভ্যুবাচ
দরীমেতাং প্রবিশ ত্বং শতক্রতো; যন্মাং বাল্যাদবমংস্থাঃ পুরস্তাৎ
189.22
উক্তস্ত্বেবং বিভুনা দেবরাজঃ; প্রবেপমানো ভৃশমেবাভিষঙ্গাৎ
স্রস্তৈরঙ্গৈরনিলেনেব নুন্ন;মশ্বত্থপত্রং গিরিরাজমূর্ধ্নি
189.23
স প্রাঞ্জলির্বিনতেনাননেন; প্রবেপমানঃ সহসৈবমুক্তঃ
উবাচ চেদং বহুরূপমুগ্রং; দ্রষ্টা শেষস্য ভগবংস্ত্বং ভবাদ্য
189.24
তমব্রবীদুগ্রধন্বা প্রহস্য; নৈবংশীলাঃ শেষমিহাপ্নুবন্তি
এতেঽপ্যেবং ভবিতারঃ পুরস্তা;ত্তস্মাদেতাং দরিমাবিশ্য শেধ্বম্
189.25
শেষোঽপ্যেবং ভবিতা বো ন সংশয়ো; যোনিং সর্বে মানুষীমাবিশধ্বম্
তত্র যূয়ং কর্ম কৃত্বাবিষহ্যং; বহূনন্যান্নিধনং প্রাপয়িত্বা
189.26
আগন্তারঃ পুনরেবেন্দ্রলোকং; স্বকর্মণা পূর্বজিতং মহার্হম্
সর্বং ময়া ভাষিতমেতদেবং; কর্তব্যমন্যদ্বিবিধার্থবচ্চ
189.27
পূর্বেন্দ্রা ঊচুঃ
গমিষ্যামো মানুষং দেবলোকা;দ্দুরাধরো বিহিতো যত্র মোক্ষঃ
দেবাস্ত্বস্মানাদধীরঞ্জনন্যাং; ধর্মো বায়ুর্মঘবানশ্বিনৌ চ
189.28
ব্যাস উবাচ
এতচ্ছ্রুত্বা বজ্রপাণির্বচস্তু; দেবশ্রেষ্ঠং পুনরেবেদমাহ
বীর্যেণাহং পুরুষং কার্যহেতো;র্দদ্যামেষাং পঞ্চমং মত্প্রসূতম্
189.29
তেষাং কামং ভগবানুগ্রধন্বা; প্রাদাদিষ্টং সন্নিসর্গাদ্যথোক্তম্
তাং চাপ্যেষাং যোষিতং লোককান্তাং; শ্রিয়ং ভার্যাং ব্যদধান্মানুষেষু
189.30
তৈরেব সার্ধং তু ততঃ স দেবো; জগাম নারায়ণমপ্রমেয়ম্
স চাপি তদ্ব্যদধাত্সর্বমেব; ততঃ সর্বে সংবভূবুর্ধরণ্যাম্
189.31
স চাপি কেশৌ হরিরুদ্ববর্হ; শুক্লমেকমপরং চাপি কৃষ্ণম্
তৌ চাপি কেশৌ বিশতাং যদূনাং; কুলে স্ত্রিয়ৌ রোহিণীং দেবকীং চ
তয়োরেকো বলদেবো বভূব; কৃষ্ণো দ্বিতীয়ঃ কেশবঃ সংবভূব
189.32
যে তে পূর্বং শক্ররূপা নিরুদ্ধা;স্তস্যাং দর্যাং পর্বতস্যোত্তরস্য
ইহৈব তে পাণ্ডবা বীর্যবন্তঃ; শক্রস্যাংশঃ পাণ্ডবঃ সব্যসাচী
189.33
এবমেতে পাণ্ডবাঃ সংবভূবু;র্যে তে রাজন্পূর্বমিন্দ্রা বভূবুঃ
লক্ষ্মীশ্চৈষাং পূর্বমেবোপদিষ্টা; ভার্যা যৈষা দ্রৌপদী দিব্যরূপা
189.34
কথং হি স্ত্রী কর্মণোঽন্তে মহীতলা;ত্সমুত্তিষ্ঠেদন্যতো দৈবয়োগাৎ
যস্যা রূপং সোমসূর্যপ্রকাশং; গন্ধশ্চাগ্র্যঃ ক্রোশমাত্রাত্প্রবাতি
189.35
ইদং চান্যত্প্রীতিপূর্বং নরেন্দ্র; দদামি তে বরমত্যদ্ভুতং চ
দিব্যং চক্ষুঃ পশ্য কুন্তীসুতাংস্ত্বং; পুণ্যৈর্দিব্যৈঃ পূর্বদেহৈরুপেতান্
189.36
বৈশংপায়ন উবাচ
ততো ব্যাসঃ পরমোদারকর্মা; শুচির্বিপ্রস্তপসা তস্য রাজ্ঞঃ
চক্ষুর্দিব্যং প্রদদৌ তান্স সর্বা;ন্রাজাপশ্যত্পূর্বদেহৈর্যথাবৎ
189.37
ততো দিব্যান্হেমকিরীটমালিনঃ; শক্রপ্রখ্যান্পাবকাদিত্যবর্ণান্
বদ্ধাপীডাংশ্চারুরূপাংশ্চ যূনো; ব্যূঢোরস্কাংস্তালমাত্রান্দদর্শ
189.38
দিব্যৈর্বস্ত্রৈররজোভিঃ সুবর্ণৈ;র্মাল্যৈশ্চাগ্র্যৈঃ শোভমানানতীব
সাক্ষাত্ত্র্যক্ষান্বসবো বাথ দিব্যা;নাদিত্যান্বা সর্বগুণোপপন্নান্
তান্পূর্বেন্দ্রানেবমীক্ষ্যাভিরূপা;ন্প্রীতো রাজা দ্রুপদো বিস্মিতশ্চ
189.39
দিব্যাং মায়াং তামবাপ্যাপ্রমেয়াং; তাং চৈবাগ্র্যাং শ্রিয়মিব রূপিণীং চ
যোগ্যাং তেষাং রূপতেজোয়শোভিঃ; পত্নীমৃদ্ধাং দৃষ্টবান্পার্থিবেন্দ্রঃ
189.40
স তদ্দৃষ্ট্বা মহদাশ্চর্যরূপং; জগ্রাহ পাদৌ সত্যবত্যাঃ সুতস্য
নৈতচ্চিত্রং পরমর্ষে ত্বয়ীতি; প্রসন্নচেতাঃ স উবাচ চৈনম্
189.41
ব্যাস উবাচ
আসীত্তপোবনে কাচিদৃষেঃ কন্যা মহাত্মনঃ
নাধ্যগচ্ছত্পতিং সা তু কন্যা রূপবতী সতী
189.42
তোষয়ামাস তপসা সা কিলোগ্রেণ শংকরম্
তামুবাচেশ্বরঃ প্রীতো বৃণু কামমিতি স্বয়ম্
189.43
সৈবমুক্তাব্রবীত্কন্যা দেবং বরদমীশ্বরম্
পতিং সর্বগুণোপেতমিচ্ছামীতি পুনঃ পুনঃ
189.44
দদৌ তস্যৈ স দেবেশস্তং বরং প্রীতিমাংস্তদা
পঞ্চ তে পতয়ঃ শ্রেষ্ঠা ভবিষ্যন্তীতি শংকরঃ
189.45
সা প্রসাদয়তী দেবমিদং ভূয়োঽভ্যভাষত
একং পতিং গুণোপেতং ত্বত্তোঽর্হামীতি বৈ তদা
তাং দেবদেবঃ প্রীতাত্মা পুনঃ প্রাহ শুভং বচঃ
189.46
পঞ্চকৃত্বস্ত্বয়া উক্তঃ পতিং দেহীত্যহং পুনঃ
তত্তথা ভবিতা ভদ্রে তব তদ্ভদ্রমস্তু তে
দেহমন্যং গতায়াস্তে যথোক্তং তদ্ভবিষ্যতি
189.47
দ্রুপদৈষা হি সা জজ্ঞে সুতা তে দেবরূপিণী
পঞ্চানাং বিহিতা পত্নী কৃষ্ণা পার্ষত্যনিন্দিতা
189.48
স্বর্গশ্রীঃ পাণ্ডবার্থায় সমুত্পন্না মহামখে
সেহ তপ্ত্বা তপো ঘোরং দুহিতৃত্বং তবাগতা
189.49
সৈষা দেবী রুচিরা দেবজুষ্টা; পঞ্চানামেকা স্বকৃতেন কর্মণা
সৃষ্টা স্বয়ং দেবপত্নী স্বয়ম্ভুবা; শ্রুত্বা রাজন্দ্রুপদেষ্টং কুরুষ্ব