অধ্যায় 190

190.1

দ্রুপদ উবাচ
অশ্রুত্বৈবং বচনং তে মহর্ষে; ময়া পূর্বং যতিতং কার্যমেতৎ
ন বৈ শক্যং বিহিতস্যাপয়াতুং; তদেবেদমুপপন্নং বিধানম্

দিষ্টস্য গ্রন্থিরনিবর্তনীয়ঃ; স্বকর্মণা বিহিতং নেহ কিংচিৎ
কৃতং নিমিত্তং হি বরৈকহেতো;স্তদেবেদমুপপন্নং বহূনাম্

যথৈব কৃষ্ণোক্তবতী পুরস্তা;ন্নৈকান্পতীন্মে ভগবান্দদাতু
স চাপ্যেবং বরমিত্যব্রবীত্তাং; দেবো হি বেদ পরমং যদত্র

যদি বায়ং বিহিতঃ শংকরেণ; ধর্মোঽধর্মো বা নাত্র মমাপরাধঃ
গৃহ্ণন্ত্বিমে বিধিবত্পাণিমস্যা; যথোপজোষং বিহিতৈষাং হি কৃষ্ণা

বৈশংপায়ন উবাচ
ততোঽব্রবীদ্ভগবান্ধর্মরাজ;মদ্য পুণ্যাহমুত পাণ্ডবেয়
অদ্য পৌষ্যং যোগমুপৈতি চন্দ্রমাঃ; পাণিং কৃষ্ণায়াস্ত্বং গৃহাণাদ্য পূর্বম্

ততো রাজা যজ্ঞসেনঃ সপুত্রো; জন্যার্থ যুক্তং বহু তত্তদগ্র্যম্
সমানয়ামাস সুতাং চ কৃষ্ণা;মাপ্লাব্য রত্নৈর্বহুভির্বিভূষ্য

ততঃ সর্বে সুহৃদস্তত্র তস্য; সমাজগ্মুঃ সচিবা মন্ত্রিণশ্চ
দ্রষ্টুং বিবাহং পরমপ্রতীতা; দ্বিজাশ্চ পৌরাশ্চ যথাপ্রধানাঃ

তত্তস্য বেশ্মার্থিজনোপশোভিতং; বিকীর্ণপদ্মোত্পলভূষিতাজিরম্
মহার্হরত্নৌঘবিচিত্রমাবভৌ; দিবং যথা নির্মলতারকাচিতম্

ততস্তু তে কৌরবরাজপুত্রা; বিভূষিতাঃ কুণ্ডলিনো যুবানঃ
মহার্হবস্ত্রা বরচন্দনোক্ষিতাঃ; কৃতাভিষেকাঃ কৃতমঙ্গলক্রিয়াঃ

পুরোহিতেনাগ্নিসমানবর্চসা; সহৈব ধৌম্যেন যথাবিধি প্রভো
ক্রমেণ সর্বে বিবিশুশ্চ তত্সদো; মহর্ষভা গোষ্ঠমিবাভিনন্দিনঃ

ততঃ সমাধায় স বেদপারগো; জুহাব মন্ত্রৈর্জ্বলিতং হুতাশনম্
যুধিষ্ঠিরং চাপ্যুপনীয় মন্ত্রবি;ন্নিয়োজয়ামাস সহৈব কৃষ্ণয়া

প্রদক্ষিণং তৌ প্রগৃহীতপাণী; সমানয়ামাস স বেদপারগঃ
ততোঽভ্যনুজ্ঞায় তমাজিশোভিনং; পুরোহিতো রাজগৃহাদ্বিনির্যয়ৌ

ক্রমেণ চানেন নরাধিপাত্মজা; বরস্ত্রিয়াস্তে জগৃহুস্তদা করম্
অহন্যহন্যুত্তমরূপধারিণো; মহারথাঃ কৌরববংশবর্ধনাঃ

ইদং চ তত্রাদ্ভুতরূপমুত্তমং; জগাদ বিপ্রর্ষিরতীতমানুষম্
মহানুভাবা কিল সা সুমধ্যমা; বভূব কন্যৈব গতে গতেঽহনি

কৃতে বিবাহে দ্রুপদো ধনং দদৌ; মহারথেভ্যো বহুরূপমুত্তমম্
শতং রথানাং বরহেমভূষিণাং; চতুর্যুজাং হেমখলীনমালিনাম্

শতং গজানামভিপদ্মিনাং তথা; শতং গিরীণামিব হেমশৃঙ্গিণাম্
তথৈব দাসীশতমগ্র্যয়ৌবনং; মহার্হবেষাভরণাম্বরস্রজম্

পৃথক্পৃথক্চৈব দশায়ুতান্বিতং; ধনং দদৌ সৌমকিরগ্নিসাক্ষিকম্
তথৈব বস্ত্রাণি চ ভূষণানি; প্রভাবয়ুক্তানি মহাধনানি

কৃতে বিবাহে চ ততঃ স্ম পাণ্ডবাঃ; প্রভূতরত্নামুপলভ্য তাং শ্রিয়ম্
বিজহ্রুরিন্দ্রপ্রতিমা মহাবলাঃ; পুরে তু পাঞ্চালনৃপস্য তস্য হ