UtshovChapter 190
190.1
द्रुपद उवाच
अश्रुत्वैवं वचनं ते महर्षे; मया पूर्वं यतितं कार्यमेतत्
न वै शक्यं विहितस्यापयातुं; तदेवेदमुपपन्नं विधानम्
Drupada uvacha
Ashrutvaivam vachanam te maharshe; maya purvam yatitam karyametat
Na vai shakyam vihitasyapayatum; tadevedamupapannam vidhanam
190.2
दिष्टस्य ग्रन्थिरनिवर्तनीयः; स्वकर्मणा विहितं नेह किंचित्
कृतं निमित्तं हि वरैकहेतो;स्तदेवेदमुपपन्नं बहूनाम्
Dishtasya granthiranivartaniyah; svakarmana vihitam neha kinchit
Kritam nimittam hi varaikaheto;stadevedamupapannam bahunam
190.3
यथैव कृष्णोक्तवती पुरस्ता;न्नैकान्पतीन्मे भगवान्ददातु
स चाप्येवं वरमित्यब्रवीत्तां; देवो हि वेद परमं यदत्र
Yathaiva krishnoktavati purasta;nnaikanpatinme bhagavandadatu
Sa chapyevam varamityabravittam; devo hi veda paramam yadatra
190.4
यदि वायं विहितः शंकरेण; धर्मोऽधर्मो वा नात्र ममापराधः
गृह्णन्त्विमे विधिवत्पाणिमस्या; यथोपजोषं विहितैषां हि कृष्णा
Yadi vayam vihitah shankarena; dharmodharmo va natra mamaparadhah
Grihnantvime vidhivatpanimasya; yathopajosham vihitaisham hi krishna
190.5
वैशंपायन उवाच
ततोऽब्रवीद्भगवान्धर्मराज;मद्य पुण्याहमुत पाण्डवेय
अद्य पौष्यं योगमुपैति चन्द्रमाः; पाणिं कृष्णायास्त्वं गृहाणाद्य पूर्वम्
Vaishampayana uvacha
Tatobravidbhagavandharmaraja;madya punyahamuta pandaveya
Adya paushyam yogamupaiti chandramah; panim krishnayastvam grihanadya purvam
190.6
ततो राजा यज्ञसेनः सपुत्रो; जन्यार्थ युक्तं बहु तत्तदग्र्यम्
समानयामास सुतां च कृष्णा;माप्लाव्य रत्नैर्बहुभिर्विभूष्य
Tato raja yagyasenah saputro; janyartha yuktam bahu tattadagryam
Samanayamasa sutam cha krishna;maplavya ratnairbahubhirvibhushya
190.7
ततः सर्वे सुहृदस्तत्र तस्य; समाजग्मुः सचिवा मन्त्रिणश्च
द्रष्टुं विवाहं परमप्रतीता; द्विजाश्च पौराश्च यथाप्रधानाः
Tatah sarve suhridastatra tasya; samajagmuh sachiva mantrinashcha
Drashtum vivaham paramapratita; dvijashcha paurashcha yathapradhanah
190.8
तत्तस्य वेश्मार्थिजनोपशोभितं; विकीर्णपद्मोत्पलभूषिताजिरम्
महार्हरत्नौघविचित्रमाबभौ; दिवं यथा निर्मलतारकाचितम्
Tattasya veshmarthijanopashobhitam; vikirnapadmotpalabhushitajiram
Maharharatnaughavichitramababhau; divam yatha nirmalatarakachitam
190.9
ततस्तु ते कौरवराजपुत्रा; विभूषिताः कुण्डलिनो युवानः
महार्हवस्त्रा वरचन्दनोक्षिताः; कृताभिषेकाः कृतमङ्गलक्रियाः
Tatastu te kauravarajaputra; vibhushitah kundalino yuvanah
Maharhavastra varachandanokshitah; kritabhishekah kritamangalakriyah
190.10
पुरोहितेनाग्निसमानवर्चसा; सहैव धौम्येन यथाविधि प्रभो
क्रमेण सर्वे विविशुश्च तत्सदो; महर्षभा गोष्ठमिवाभिनन्दिनः
Purohitenagnisamanavarchasa; sahaiva dhaumyena yathavidhi prabho
Kramena sarve vivishushcha tatsado; maharshabha goshthamivabhinandinah
190.11
ततः समाधाय स वेदपारगो; जुहाव मन्त्रैर्ज्वलितं हुताशनम्
युधिष्ठिरं चाप्युपनीय मन्त्रवि;न्नियोजयामास सहैव कृष्णया
Tatah samadhaya sa vedaparago; juhava mantrairjvalitam hutashanam
Yudhishthiram chapyupaniya mantravi;nniyojayamasa sahaiva krishnaya
190.12
प्रदक्षिणं तौ प्रगृहीतपाणी; समानयामास स वेदपारगः
ततोऽभ्यनुज्ञाय तमाजिशोभिनं; पुरोहितो राजगृहाद्विनिर्ययौ
Pradakshinam tau pragrihitapani; samanayamasa sa vedaparagah
Tatobhyanugyaya tamajishobhinam; purohito rajagrihadviniryayau
190.13
क्रमेण चानेन नराधिपात्मजा; वरस्त्रियास्ते जगृहुस्तदा करम्
अहन्यहन्युत्तमरूपधारिणो; महारथाः कौरववंशवर्धनाः
Kramena chanena naradhipatmaja; varastriyaste jagrihustada karam
Ahanyahanyuttamarupadharino; maharathah kauravavanshavardhanah
190.14
इदं च तत्राद्भुतरूपमुत्तमं; जगाद विप्रर्षिरतीतमानुषम्
महानुभावा किल सा सुमध्यमा; बभूव कन्यैव गते गतेऽहनि
Idam cha tatradbhutarupamuttamam; jagada viprarshiratitamanusham
Mahanubhava kila sa sumadhyama; babhuva kanyaiva gate gatehani
190.15
कृते विवाहे द्रुपदो धनं ददौ; महारथेभ्यो बहुरूपमुत्तमम्
शतं रथानां वरहेमभूषिणां; चतुर्युजां हेमखलीनमालिनाम्
Krite vivahe drupado dhanam dadau; maharathebhyo bahurupamuttamam
Shatam rathanam varahemabhushinam; chaturyujam hemakhalinamalinam
190.16
शतं गजानामभिपद्मिनां तथा; शतं गिरीणामिव हेमशृङ्गिणाम्
तथैव दासीशतमग्र्ययौवनं; महार्हवेषाभरणाम्बरस्रजम्
Shatam gajanamabhipadminam tatha; shatam girinamiva hemashringinam
Tathaiva dasishatamagryayauvanam; maharhaveshabharanambarasrajam
190.17
पृथक्पृथक्चैव दशायुतान्वितं; धनं ददौ सौमकिरग्निसाक्षिकम्
तथैव वस्त्राणि च भूषणानि; प्रभावयुक्तानि महाधनानि
Prithakprithakchaiva dashayutanvitam; dhanam dadau saumakiragnisakshikam
Tathaiva vastrani cha bhushanani; prabhavayuktani mahadhanani
190.18
कृते विवाहे च ततः स्म पाण्डवाः; प्रभूतरत्नामुपलभ्य तां श्रियम्
विजह्रुरिन्द्रप्रतिमा महाबलाः; पुरे तु पाञ्चालनृपस्य तस्य ह
Krite vivahe cha tatah sma pandavah; prabhutaratnamupalabhya tam shriyam
Vijahrurindrapratima mahabalah; pure tu panchalanripasya tasya ha