UtshovChapter 191
191.1
वैशंपायन उवाच
पाण्डवैः सह संयोगं गतस्य द्रुपदस्य तु
न बभूव भयं किंचिद्देवेभ्योऽपि कथंचन
Vaishampayana uvacha
Pandavaih saha sanyogam gatasya drupadasya tu
Na babhuva bhayam kinchiddevebhyopi kathanchana
191.2
कुन्तीमासाद्य ता नार्यो द्रुपदस्य महात्मनः
नाम संकीर्तयन्त्यस्ताः पादौ जग्मुः स्वमूर्धभिः
Kuntimasadya ta naryo drupadasya mahatmanah
Nama sankirtayantyastah padau jagmuh svamurdhabhih
191.3
कृष्णा च क्षौमसंवीता कृतकौतुकमङ्गला
कृताभिवादना श्वश्र्वास्तस्थौ प्रह्वा कृताञ्जलिः
Krishna cha kshaumasanvita kritakautukamangala
Kritabhivadana shvashrvastasthau prahva kritanjalih
191.4
रूपलक्षणसंपन्नां शीलाचारसमन्विताम्
द्रौपदीमवदत्प्रेम्णा पृथाशीर्वचनं स्नुषाम्
Rupalakshanasampannam shilacharasamanvitam
Draupadimavadatpremna prithashirvachanam snusham
191.5
यथेन्द्राणी हरिहये स्वाहा चैव विभावसौ
रोहिणी च यथा सोमे दमयन्ती यथा नले
Yathendrani harihaye svaha chaiva vibhavasau
Rohini cha yatha some damayanti yatha nale
191.6
यथा वैश्रवणे भद्रा वसिष्ठे चाप्यरुन्धती
यथा नारायणे लक्ष्मीस्तथा त्वं भव भर्तृषु
Yatha vaishravane bhadra vasishthe chapyarundhati
Yatha narayane lakshmistatha tvam bhava bhartrishu
191.7
जीवसूर्वीरसूर्भद्रे बहुसौख्यसमन्विता
सुभगा भोगसंपन्ना यज्ञपत्नी स्वनुव्रता
Jivasurvirasurbhadre bahusaukhyasamanvita
Subhaga bhogasampanna yagyapatni svanuvrata
191.8
अतिथीनागतान्साधून्बालान्वृद्धान्गुरूंस्तथा
पूजयन्त्या यथान्यायं शश्वद्गच्छन्तु ते समाः
Atithinagatansadhunbalanvriddhangurunstatha
Pujayantya yathanyayam shashvadgachchhantu te samah
191.9
कुरुजाङ्गलमुख्येषु राष्ट्रेषु नगरेषु च
अनु त्वमभिषिच्यस्व नृपतिं धर्मवत्सलम्
Kurujangalamukhyeshu rashtreshu nagareshu cha
Anu tvamabhishichyasva nripatim dharmavatsalam
191.10
पतिभिर्निर्जितामुर्वीं विक्रमेण महाबलैः
कुरु ब्राह्मणसात्सर्वामश्वमेधे महाक्रतौ
Patibhirnirjitamurvim vikramena mahabalaih
Kuru brahmanasatsarvamashvamedhe mahakratau
191.11
पृथिव्यां यानि रत्नानि गुणवन्ति गुनान्विते
तान्याप्नुहि त्वं कल्याणि सुखिनी शरदां शतम्
Prithivyam yani ratnani gunavanti gunanvite
Tanyapnuhi tvam kalyani sukhini sharadam shatam
191.12
यथा च त्वाभिनन्दामि वध्वद्य क्षौमसंवृताम्
तथा भूयोऽभिनन्दिष्ये सूतपुत्रां गुणान्विताम्
Yatha cha tvabhinandami vadhvadya kshaumasanvritam
Tatha bhuyobhinandishye sutaputram gunanvitam
191.13
ततस्तु कृतदारेभ्यः पाण्डुभ्यः प्राहिणोद्धरिः
मुक्तावैडूर्यचित्राणि हैमान्याभरणानि च
Tatastu kritadarebhyah pandubhyah prahinoddharih
Muktavaiduryachitrani haimanyabharanani cha
191.14
वासांसि च महार्हाणि नानादेश्यानि माधवः
कम्बलाजिनरत्नानि स्पर्शवन्ति शुभानि च
Vasansi cha maharhani nanadeshyani madhavah
Kambalajinaratnani sparshavanti shubhani cha
191.15
शयनासनयानानि विविधानि महान्ति च
वैडूर्यवज्रचित्राणि शतशो भाजनानि च
Shayanasanayanani vividhani mahanti cha
Vaiduryavajrachitrani shatasho bhajanani cha
191.16
रूपयौवनदाक्षिण्यैरुपेताश्च स्वलंकृताः
प्रेष्याः संप्रददौ कृष्णो नानादेश्याः सहस्रशः
Rupayauvanadakshinyairupetashcha svalankritah
Preshyah sampradadau krishno nanadeshyah sahasrashah
191.17
गजान्विनीतान्भद्रांश्च सदश्वांश्च स्वलंकृतान्
रथांश्च दान्तान्सौवर्णैः शुभैः पट्टैरलंकृतान्
Gajanvinitanbhadranshcha sadashvanshcha svalankritan
Rathanshcha dantansauvarnaih shubhaih pattairalankritan
191.18
कोटिशश्च सुवर्णं स तेषामकृतकं तथा
वीतीकृतममेयात्मा प्राहिणोन्मधुसूदनः
Kotishashcha suvarnam sa teshamakritakam tatha
Vitikritamameyatma prahinonmadhusudanah
191.19
तत्सर्वं प्रतिजग्राह धर्मराजो युधिष्ठिरः
मुदा परमया युक्तो गोविन्दप्रियकाम्यया
Tatsarvam pratijagraha dharmarajo yudhishthirah
Muda paramaya yukto govindapriyakamyaya