অধ্যায় 191

191.1

বৈশংপায়ন উবাচ
পাণ্ডবৈঃ সহ সংয়োগং গতস্য দ্রুপদস্য তু
ন বভূব ভয়ং কিংচিদ্দেবেভ্যোঽপি কথংচন

কুন্তীমাসাদ্য তা নার্যো দ্রুপদস্য মহাত্মনঃ
নাম সংকীর্তয়ন্ত্যস্তাঃ পাদৌ জগ্মুঃ স্বমূর্ধভিঃ

কৃষ্ণা চ ক্ষৌমসংবীতা কৃতকৌতুকমঙ্গলা
কৃতাভিবাদনা শ্বশ্র্বাস্তস্থৌ প্রহ্বা কৃতাঞ্জলিঃ

রূপলক্ষণসংপন্নাং শীলাচারসমন্বিতাম্
দ্রৌপদীমবদত্প্রেম্ণা পৃথাশীর্বচনং স্নুষাম্

যথেন্দ্রাণী হরিহয়ে স্বাহা চৈব বিভাবসৌ
রোহিণী চ যথা সোমে দময়ন্তী যথা নলে

যথা বৈশ্রবণে ভদ্রা বসিষ্ঠে চাপ্যরুন্ধতী
যথা নারায়ণে লক্ষ্মীস্তথা ত্বং ভব ভর্তৃষু

জীবসূর্বীরসূর্ভদ্রে বহুসৌখ্যসমন্বিতা
সুভগা ভোগসংপন্না যজ্ঞপত্নী স্বনুব্রতা

অতিথীনাগতান্সাধূন্বালান্বৃদ্ধান্গুরূংস্তথা
পূজয়ন্ত্যা যথান্যায়ং শশ্বদ্গচ্ছন্তু তে সমাঃ

কুরুজাঙ্গলমুখ্যেষু রাষ্ট্রেষু নগরেষু চ
অনু ত্বমভিষিচ্যস্ব নৃপতিং ধর্মবত্সলম্

পতিভির্নির্জিতামুর্বীং বিক্রমেণ মহাবলৈঃ
কুরু ব্রাহ্মণসাত্সর্বামশ্বমেধে মহাক্রতৌ

পৃথিব্যাং যানি রত্নানি গুণবন্তি গুনান্বিতে
তান্যাপ্নুহি ত্বং কল্যাণি সুখিনী শরদাং শতম্

যথা চ ত্বাভিনন্দামি বধ্বদ্য ক্ষৌমসংবৃতাম্
তথা ভূয়োঽভিনন্দিষ্যে সূতপুত্রাং গুণান্বিতাম্

ততস্তু কৃতদারেভ্যঃ পাণ্ডুভ্যঃ প্রাহিণোদ্ধরিঃ
মুক্তাবৈডূর্যচিত্রাণি হৈমান্যাভরণানি চ

বাসাংসি চ মহার্হাণি নানাদেশ্যানি মাধবঃ
কম্বলাজিনরত্নানি স্পর্শবন্তি শুভানি চ

শয়নাসনয়ানানি বিবিধানি মহান্তি চ
বৈডূর্যবজ্রচিত্রাণি শতশো ভাজনানি চ

রূপয়ৌবনদাক্ষিণ্যৈরুপেতাশ্চ স্বলংকৃতাঃ
প্রেষ্যাঃ সংপ্রদদৌ কৃষ্ণো নানাদেশ্যাঃ সহস্রশঃ

গজান্বিনীতান্ভদ্রাংশ্চ সদশ্বাংশ্চ স্বলংকৃতান্
রথাংশ্চ দান্তান্সৌবর্ণৈঃ শুভৈঃ পট্টৈরলংকৃতান্

কোটিশশ্চ সুবর্ণং স তেষামকৃতকং তথা
বীতীকৃতমমেয়াত্মা প্রাহিণোন্মধুসূদনঃ

তত্সর্বং প্রতিজগ্রাহ ধর্মরাজো যুধিষ্ঠিরঃ
মুদা পরময়া যুক্তো গোবিন্দপ্রিয়কাম্যয়া