Utshovঅধ্যায় 192
192.1
বৈশংপায়ন উবাচ
ততো রাজ্ঞাং চরৈরাপ্তৈশ্চারঃ সমুপনীয়ত
পাণ্ডবৈরুপসংপন্না দ্রৌপদী পতিভিঃ শুভা
192.2
যেন তদ্ধনুরায়ম্য লক্ষ্যং বিদ্ধং মহাত্মনা
সোঽর্জুনো জয়তাং শ্রেষ্ঠো মহাবাণধনুর্ধরঃ
192.3
যঃ শল্যং মদ্ররাজানমুত্ক্ষিপ্যাভ্রাময়দ্বলী
ত্রাসয়ংশ্চাপি সংক্রুদ্ধো বৃক্ষেণ পুরুষান্রণে
192.4
ন চাপি সংভ্রমঃ কশ্চিদাসীত্তত্র মহাত্মনঃ
স ভীমো ভীমসংস্পর্শঃ শত্রুসেনাঙ্গপাতনঃ
192.5
ব্রহ্মরূপধরাঞ্শ্রুত্বা পাণ্ডুরাজসুতাংস্তদা
কৌন্তেয়ান্মনুজেন্দ্রাণাং বিস্ময়ঃ সমজায়ত
192.6
সপুত্রা হি পুরা কুন্তী দগ্ধা জতুগৃহে শ্রুতা
পুনর্জাতানিতি স্মৈতান্মন্যন্তে সর্বপার্থিবাঃ
192.7
ধিক্কুর্বন্তস্তদা ভীষ্মং ধৃতরাষ্ট্রং চ কৌরবম্
কর্মণা সুনৃশংসেন পুরোচনকৃতেন বৈ
192.8
বৃত্তে স্বয়ংবরে চৈব রাজানঃ সর্ব এব তে
যথাগতং বিপ্রজগ্মুর্বিদিত্বা পাণ্ডবান্বৃতান্
192.9
অথ দুর্যোধনো রাজা বিমনা ভ্রাতৃভিঃ সহ
অশ্বত্থাম্না মাতুলেন কর্ণেন চ কৃপেণ চ
192.10
বিনিবৃত্তো বৃতং দৃষ্ট্বা দ্রৌপদ্যা শ্বেতবাহনম্
তং তু দুঃশাসনো ব্রীডন্মন্দং মন্দমিবাব্রবীৎ
192.11
যদ্যসৌ ব্রাহ্মণো ন স্যাদ্বিন্দেত দ্রৌপদীং ন সঃ
ন হি তং তত্ত্বতো রাজন্বেদ কশ্চিদ্ধনংজয়ম্
192.12
দৈবং তু পরমং মন্যে পৌরুষং তু নিরর্থকম্
ধিগস্মত্পৌরুষং তাত যদ্ধরন্তীহ পাণ্ডবাঃ
192.13
এবং সংভাষমাণাস্তে নিন্দন্তশ্চ পুরোচনম্
বিবিশুর্হাস্তিনপুরং দীনা বিগতচেতসঃ
192.14
ত্রস্তা বিগতসংকল্পা দৃষ্ট্বা পার্থান্মহৌজসঃ
মুক্তান্হব্যবহাচ্চৈনান্সংয়ুক্তান্দ্রুপদেন চ
192.15
ধৃষ্টদ্যুম্নং চ সংচিন্ত্য তথৈব চ শিখণ্ডিনম্
দ্রুপদস্যাত্মজাংশ্চান্যান্সর্বয়ুদ্ধবিশারদান্
192.16
বিদুরস্ত্বথ তাঞ্শ্রুত্বা দ্রৌপদ্যা পাণ্ডবান্বৃতান্
ব্রীডিতান্ধার্তরাষ্ট্রাংশ্চ ভগ্নদর্পানুপাগতান্
192.17
ততঃ প্রীতমনাঃ ক্ষত্তা ধৃতরাষ্ট্রং বিশাং পতে
উবাচ দিষ্ট্যা কুরবো বর্ধন্ত ইতি বিস্মিতঃ
192.18
বৈচিত্রবীর্যস্তু নৃপো নিশম্য বিদুরস্য তৎ
অব্রবীত্পরমপ্রীতো দিষ্ট্যা দিষ্ট্যেতি ভারত
192.19
মন্যতে হি বৃতং পুত্রং জ্যেষ্ঠং দ্রুপদকন্যয়া
দুর্যোধনমবিজ্ঞানাত্প্রজ্ঞাচক্ষুর্নরেশ্বরঃ
192.20
অথ ত্বাজ্ঞাপয়ামাস দ্রৌপদ্যা ভূষণং বহু
আনীয়তাং বৈ কৃষ্ণেতি পুত্রং দুর্যোধনং তদা
192.21
অথাস্য পশ্চাদ্বিদুর আচখ্যৌ পাণ্ডবান্বৃতান্
সর্বান্কুশলিনো বীরান্পূজিতান্দ্রুপদেন চ
তেষাং সংবন্ধিনশ্চান্যান্বহূন্বলসমন্বিতান্
192.22
ধৃতরাষ্ট্র উবাচ
যথৈব পাণ্ডোঃ পুত্রাস্তে তথৈবাভ্যধিকা মম
সেয়মভ্যধিকা প্রীতির্বৃদ্ধির্বিদুর মে মতা
যত্তে কুশলিনো বীরা মিত্রবন্তশ্চ পাণ্ডবাঃ
192.23
কো হি দ্রুপদমাসাদ্য মিত্রং ক্ষত্তঃ সবান্ধবম্
ন বুভূষেদ্ভবেনার্থী গতশ্রীরপি পার্থিবঃ
192.24
বৈশংপায়ন উবাচ
তং তথা ভাষমাণং তু বিদুরঃ প্রত্যভাষত
নিত্যং ভবতু তে বুদ্ধিরেষা রাজঞ্শতং সমাঃ
192.25
ততো দুর্যোধনশ্চৈব রাধেয়শ্চ বিশাং পতে
ধৃতরাষ্ট্রমুপাগম্য বচোঽব্রূতামিদং তদা
192.26
সংনিধৌ বিদুরস্য ত্বাং বক্তুং নৃপ ন শক্নুবঃ
বিবিক্তমিতি বক্ষ্যাবঃ কিং তবেদং চিকীর্ষিতম্
192.27
সপত্নবৃদ্ধিং যত্তাত মন্যসে বৃদ্ধিমাত্মনঃ
অভিষ্টৌষি চ যত্ক্ষত্তুঃ সমীপে দ্বিপদাং বর
192.28
অন্যস্মিন্নৃপ কর্তব্যে ত্বমন্যত্কুরুষেঽনঘ
তেষাং বলবিঘাতো হি কর্তব্যস্তাত নিত্যশঃ
192.29
তে বয়ং প্রাপ্তকালস্য চিকীর্ষাং মন্ত্রয়ামহে
যথা নো ন গ্রসেয়ুস্তে সপুত্রবলবান্ধবান্