অধ্যায় 193

193.1

ধৃতরাষ্ট্র উবাচ
অহমপ্যেবমেবৈতচ্চিন্তয়ামি যথা যুবাম্
বিবেক্তুং নাহমিচ্ছামি ত্বাকারং বিদুরং প্রতি

অতস্তেষাং গুণানেব কীর্তয়ামি বিশেষতঃ
নাববুধ্যেত বিদুরো মমাভিপ্রায়মিঙ্গিতৈঃ

যচ্চ ত্বং মন্যসে প্রাপ্তং তদ্ব্রূহি ত্বং সুয়োধন
রাধেয় মন্যসে ত্বং চ যত্প্রাপ্তং তদ্ব্রবীহি মে

দুর্যোধন উবাচ
অদ্য তান্কুশলৈর্বিপ্রৈঃ সুকৃতৈরাপ্তকারিভিঃ
কুন্তীপুত্রান্ভেদয়ামো মাদ্রীপুত্রৌ চ পাণ্ডবৌ

অথ বা দ্রুপদো রাজা মহদ্ভির্বিত্তসংচয়ৈঃ
পুত্রাশ্চাস্য প্রলোভ্যন্তামমাত্যাশ্চৈব সর্বশঃ

পরিত্যজধ্বং রাজানং কুন্তীপুত্রং যুধিষ্ঠিরম্
অথ তত্রৈব বা তেষাং নিবাসং রোচয়ন্তু তে

ইহৈষাং দোষবদ্বাসং বর্ণয়ন্তু পৃথক্পৃথক্
তে ভিদ্যমানাস্তত্রৈব মনঃ কুর্বন্তু পাণ্ডবাঃ

অথ বা কুশলাঃ কেচিদুপায়নিপুণা নরাঃ
ইতরেতরতঃ পার্থান্ভেদয়ন্ত্বনুরাগতঃ

ব্যুত্থাপয়ন্তু বা কৃষ্ণাং বহুত্বাত্সুকরং হি তৎ
অথ বা পাণ্ডবাংস্তস্যাং ভেদয়ন্তু ততশ্চ তাম্

ভীমসেনস্য বা রাজন্নুপায়কুশলৈর্নরৈঃ
মৃত্যুর্বিধীয়তাং ছন্নৈঃ স হি তেষাং বলাধিকঃ

তস্মিংস্তু নিহতে রাজন্হতোত্সাহা হতৌজসঃ
যতিষ্যন্তে ন রাজ্যায় স হি তেষাং ব্যপাশ্রয়ঃ

অজেয়ো হ্যর্জুনঃ সংখ্যে পৃষ্ঠগোপে বৃকোদরে
তমৃতে ফল্গুনো যুদ্ধে রাধেয়স্য ন পাদভাক্

তে জানমানা দৌর্বল্যং ভীমসেনমৃতে মহৎ
অস্মান্বলবতো জ্ঞাত্বা নশিষ্যন্ত্যবলীয়সঃ

ইহাগতেষু পার্থেষু নিদেশবশবর্তিষু
প্রবর্তিষ্যামহে রাজন্যথাশ্রদ্ধং নিবর্হণে

অথ বা দর্শনীয়াভিঃ প্রমদাভির্বিলোভ্যতাম্
একৈকস্তত্র কৌন্তেয়স্ততঃ কৃষ্ণা বিরজ্যতাম্

প্রেষ্যতাং বাপি রাধেয়স্তেষামাগমনায় বৈ
তে লোপ্ত্রহারৈঃ সংধায় বধ্যন্তামাপ্তকারিভিঃ

এতেষামভ্যুপায়ানাং যস্তে নির্দোষবান্মতঃ
তস্য প্রয়োগমাতিষ্ঠ পুরা কালোঽতিবর্ততে

যাবচ্চাকৃতবিশ্বাসা দ্রুপদে পার্থিবর্ষভে
তাবদেবাদ্য তে শক্যা ন শক্যাস্তু ততঃ পরম্

এষা মম মতিস্তাত নিগ্রহায় প্রবর্ততে
সাধু বা যদি বাসাধু কিং বা রাধেয় মন্যসে