অধ্যায় 194

194.1

কর্ণ উবাচ
দুর্যোধন তব প্রজ্ঞা ন সম্যগিতি মে মতিঃ
ন হ্যুপায়েন তে শক্যাঃ পাণ্ডবাঃ কুরুনন্দন

194.2

পূর্বমেব হি তে সূক্ষ্মৈরুপায়ৈর্যতিতাস্ত্বয়া
নিগ্রহীতুং যদা বীর শকিতা ন তদা ত্বয়া

194.3

ইহৈব বর্তমানাস্তে সমীপে তব পার্থিব
অজাতপক্ষাঃ শিশবঃ শকিতা নৈব বাধিতুম্

194.4

জাতপক্ষা বিদেশস্থা বিবৃদ্ধাঃ সর্বশোঽদ্য তে
নোপায়সাধ্যাঃ কৌন্তেয়া মমৈষা মতিরচ্যুত

194.5

ন চ তে ব্যসনৈর্যোক্তুং শক্যা দিষ্টকৃতা হি তে
শঙ্কিতাশ্চেপ্সবশ্চৈব পিতৃপৈতামহং পদম্

194.6

পরস্পরেণ ভেদশ্চ নাধাতুং তেষু শক্যতে
একস্যাং যে রতাঃ পত্ন্যাং ন ভিদ্যন্তে পরস্পরম্

194.7

ন চাপি কৃষ্ণা শক্যেত তেভ্যো ভেদয়িতুং পরৈঃ
পরিদ্যূনান্বৃতবতী কিমুতাদ্য মৃজাবতঃ

194.8

ঈপ্সিতশ্চ গুণঃ স্ত্রীণামেকস্যা বহুভর্তৃতা
তং চ প্রাপ্তবতী কৃষ্ণা ন সা ভেদয়িতুং সুখম্

194.9

আর্যবৃত্তশ্চ পাঞ্চাল্যো ন স রাজা ধনপ্রিয়ঃ
ন সংত্যক্ষ্যতি কৌন্তেয়ান্রাজ্যদানৈরপি ধ্রুবম্

194.10

তথাস্য পুত্রো গুণবাননুরক্তশ্চ পাণ্ডবান্
তস্মান্নোপায়সাধ্যাংস্তানহং মন্যে কথংচন

194.11

ইদং ত্বদ্য ক্ষমং কর্তুমস্মাকং পুরুষর্ষভ
যাবন্ন কৃতমূলাস্তে পাণ্ডবেয়া বিশাং পতে
তাবত্প্রহরণীয়াস্তে রোচতাং তব বিক্রমঃ

194.12

অস্মত্পক্ষো মহান্যাবদ্যাবত্পাঞ্চালকো লঘুঃ
তাবত্প্রহরণং তেষাং ক্রিয়তাং মা বিচারয়

194.13

বাহনানি প্রভূতানি মিত্রাণি বহুলানি চ
যাবন্ন তেষাং গান্ধারে তাবদেবাশু বিক্রম

194.14

যাবচ্চ রাজা পাঞ্চাল্যো নোদ্যমে কুরুতে মনঃ
সহ পুত্রৈর্মহাবীর্যৈস্তাবদেবাশু বিক্রম

194.15

যাবন্নায়াতি বার্ষ্ণেয়ঃ কর্ষন্যাদববাহিনীম্
রাজ্যার্থে পাণ্ডবেয়ানাং তাবদেবাশু বিক্রম

194.16

বসূনি বিবিধান্ভোগান্রাজ্যমেব চ কেবলম্
নাত্যাজ্যমস্তি কৃষ্ণস্য পাণ্ডবার্থে মহীপতে

194.17

বিক্রমেণ মহী প্রাপ্তা ভরতেন মহাত্মনা
বিক্রমেণ চ লোকাংস্ত্রীঞ্জিতবান্পাকশাসনঃ

194.18

বিক্রমং চ প্রশংসন্তি ক্ষত্রিয়স্য বিশাং পতে
স্বকো হি ধর্মঃ শূরাণাং বিক্রমঃ পার্থিবর্ষভ

194.19

তে বলেন বয়ং রাজন্মহতা চতুরঙ্গিণা
প্রমথ্য দ্রুপদং শীঘ্রমানয়ামেহ পাণ্ডবান্

194.20

ন হি সাম্না ন দানেন ন ভেদেন চ পাণ্ডবাঃ
শক্যাঃ সাধয়িতুং তস্মাদ্বিক্রমেণৈব তাঞ্জহি

194.21

তান্বিক্রমেণ জিত্বেমামখিলাং ভুঙ্ক্ষ্ব মেদিনীম্
নান্যমত্র প্রপশ্যামি কার্যোপায়ং জনাধিপ

194.22

বৈশংপায়ন উবাচ
শ্রুত্বা তু রাধেয়বচো ধৃতরাষ্ট্রঃ প্রতাপবান্
অভিপূজ্য ততঃ পশ্চাদিদং বচনমব্রবীৎ

194.23

উপপন্নং মহাপ্রাজ্ঞে কৃতাস্ত্রে সূতনন্দনে
ত্বয়ি বিক্রমসংপন্নমিদং বচনমীদৃশম্

194.24

ভূয় এব তু ভীষ্মশ্চ দ্রোণো বিদুর এব চ
যুবাং চ কুরুতাং বুদ্ধিং ভবেদ্যা নঃ সুখোদয়া

194.25

তত আনায্য তান্সর্বান্মন্ত্রিণঃ সুমহায়শাঃ
ধৃতরাষ্ট্রো মহারাজ মন্ত্রয়ামাস বৈ তদা

Contains text from DharmicData, made available under the Open Database License (ODbL). Simple meanings are written by AI and can contain mistakes.