অধ্যায় 195

195.1

ভীষ্ম উবাচ
ন রোচতে বিগ্রহো মে পাণ্ডুপুত্রৈঃ কথংচন
যথৈব ধৃতরাষ্ট্রো মে তথা পাণ্ডুরসংশয়ম্

গান্ধার্যাশ্চ যথা পুত্রাস্তথা কুন্তীসুতা মতাঃ
যথা চ মম তে রক্ষ্যা ধৃতরাষ্ট্র তথা তব

যথা চ মম রাজ্ঞশ্চ তথা দুর্যোধনস্য তে
তথা কুরূণাং সর্বেষামন্যেষামপি ভারত

এবং গতে বিগ্রহং তৈর্ন রোচয়ে; সংধায় বীরৈর্দীয়তামদ্য ভূমিঃ
তেষামপীদং প্রপিতামহানাং; রাজ্যং পিতুশ্চৈব কুরূত্তমানাম্

দুর্যোধন যথা রাজ্যং ত্বমিদং তাত পশ্যসি
মম পৈতৃকমিত্যেবং তেঽপি পশ্যন্তি পাণ্ডবাঃ

যদি রাজ্যং ন তে প্রাপ্তাঃ পাণ্ডবেয়াস্তপস্বিনঃ
কুত এব তবাপীদং ভারতস্য চ কস্যচিৎ

অথ ধর্মেণ রাজ্যং ত্বং প্রাপ্তবান্ভরতর্ষভ
তেঽপি রাজ্যমনুপ্রাপ্তাঃ পূর্বমেবেতি মে মতিঃ

মধুরেণৈব রাজ্যস্য তেষামর্ধং প্রদীয়তাম্
এতদ্ধি পুরুষব্যাঘ্র হিতং সর্বজনস্য চ

অতোঽন্যথা চেত্ক্রিয়তে ন হিতং নো ভবিষ্যতি
তবাপ্যকীর্তিঃ সকলা ভবিষ্যতি ন সংশয়ঃ

কীর্তিরক্ষণমাতিষ্ঠ কীর্তির্হি পরমং বলম্
নষ্টকীর্তের্মনুষ্যস্য জীবিতং হ্যফলং স্মৃতম্

যাবত্কীর্তির্মনুষ্যস্য ন প্রণশ্যতি কৌরব
তাবজ্জীবতি গান্ধারে নষ্টকীর্তিস্তু নশ্যতি

তমিমং সমুপাতিষ্ঠ ধর্মং কুরুকুলোচিতম্
অনুরূপং মহাবাহো পূর্বেষামাত্মনঃ কুরু

দিষ্ট্যা ধরন্তি তে বীরা দিষ্ট্যা জীবতি সা পৃথা
দিষ্ট্যা পুরোচনঃ পাপো নসকামোঽত্যয়ং গতঃ

তদা প্রভৃতি গান্ধারে ন শক্নোম্যভিবীক্ষিতুম্
লোকে প্রাণভৃতাং কংচিচ্ছ্রুত্বা কুন্তীং তথাগতাম্

ন চাপি দোষেণ তথা লোকো বৈতি পুরোচনম্
যথা ত্বাং পুরুষব্যাঘ্র লোকো দোষেণ গচ্ছতি

তদিদং জীবিতং তেষাং তব কল্মষনাশনম্
সংমন্তব্যং মহারাজ পাণ্ডবানাং চ দর্শনম্

ন চাপি তেষাং বীরাণাং জীবতাং কুরুনন্দন
পিত্র্যোংঽশঃ শক্য আদাতুমপি বজ্রভৃতা স্বয়ম্

তে হি সর্বে স্থিতা ধর্মে সর্বে চৈবৈকচেতসঃ
অধর্মেণ নিরস্তাশ্চ তুল্যে রাজ্যে বিশেষতঃ

যদি ধর্মস্ত্বয়া কার্যো যদি কার্যং প্রিয়ং চ মে
ক্ষেমং চ যদি কর্তব্যং তেষামর্ধং প্রদীয়তাম্