Utshovঅধ্যায় 196
196.1
দ্রোণ উবাচ
মন্ত্রায় সমুপানীতৈর্ধৃতরাষ্ট্রহিতৈর্নৃপ
ধর্ম্যং পথ্যং যশস্যং চ বাচ্যমিত্যনুশুশ্রুমঃ
196.2
মমাপ্যেষা মতিস্তাত যা ভীষ্মস্য মহাত্মনঃ
সংবিভজ্যাস্তু কৌন্তেয়া ধর্ম এষ সনাতনঃ
196.3
প্রেষ্যতাং দ্রুপদায়াশু নরঃ কশ্চিত্প্রিয়ংবদঃ
বহুলং রত্নমাদায় তেষামর্থায় ভারত
196.4
মিথঃ কৃত্যং চ তস্মৈ স আদায় বহু গচ্ছতু
বৃদ্ধিং চ পরমাং ব্রূয়াত্তত্সংয়োগোদ্ভবাং তথা
196.5
সংপ্রীয়মাণং ত্বাং ব্রূয়াদ্রাজন্দুর্যোধনং তথা
অসকৃদ্দ্রুপদে চৈব ধৃষ্টদ্যুম্নে চ ভারত
196.6
উচিতত্বং প্রিয়ত্বং চ যোগস্যাপি চ বর্ণয়েৎ
পুনঃ পুনশ্চ কৌন্তেয়ান্মাদ্রীপুত্রৌ চ সান্ত্বয়ন্
196.7
হিরণ্ময়ানি শুভ্রাণি বহূন্যাভরণানি চ
বচনাত্তব রাজেন্দ্র দ্রৌপদ্যাঃ সংপ্রয়চ্ছতু
196.8
তথা দ্রুপদপুত্রাণাং সর্বেষাং ভরতর্ষভ
পাণ্ডবানাং চ সর্বেষাং কুন্ত্যা যুক্তানি যানি চ
196.9
এবং সান্ত্বসমায়ুক্তং দ্রুপদং পাণ্ডবৈঃ সহ
উক্ত্বাথানন্তরং ব্রূয়াত্তেষামাগমনং প্রতি
196.10
অনুজ্ঞাতেষু বীরেষু বলং গচ্ছতু শোভনম্
দুঃশাসনো বিকর্ণশ্চ পাণ্ডবানানয়ন্ত্বিহ
196.11
ততস্তে পার্থিবশ্রেষ্ঠ পূজ্যমানাঃ সদা ত্বয়া
প্রকৃতীনামনুমতে পদে স্থাস্যন্তি পৈতৃকে
196.12
এবং তব মহারাজ তেষু পুত্রেষু চৈব হ
বৃত্তমৌপয়িকং মন্যে ভীষ্মেণ সহ ভারত
196.13
কর্ণ উবাচ
যোজিতাবর্থমানাভ্যাং সর্বকার্যেষ্বনন্তরৌ
ন মন্ত্রয়েতাং ত্বচ্ছ্রেয়ঃ কিমদ্ভুততরং ততঃ
196.14
দুষ্টেন মনসা যো বৈ প্রচ্ছন্নেনান্তরাত্মনা
ব্রূয়ান্নিঃশ্রেয়সং নাম কথং কুর্যাত্সতাং মতম্
196.15
ন মিত্রাণ্যর্থকৃচ্ছ্রেষু শ্রেয়সে বেতরায় বা
বিধিপূর্বং হি সর্বস্য দুঃখং বা যদি বা সুখম্
196.16
কৃতপ্রজ্ঞোঽকৃতপ্রজ্ঞো বালো বৃদ্ধশ্চ মানবঃ
সসহায়োঽসহায়শ্চ সর্বং সর্বত্র বিন্দতি
196.17
শ্রূয়তে হি পুরা কশ্চিদম্বুবীচ ইতি শ্রুতঃ
আসীদ্রাজগৃহে রাজা মাগধানাং মহীক্ষিতাম্
196.18
স হীনঃ করণৈঃ সর্বৈরুচ্ছ্বাসপরমো নৃপঃ
অমাত্যসংস্থঃ কার্যেষু সর্বেষ্বেবাভবত্তদা
196.19
তস্যামাত্যো মহাকর্ণির্বভূবৈকেশ্বরঃ পুরা
স লব্ধবলমাত্মানং মন্যমানোঽবমন্যতে
196.20
স রাজ্ঞ উপভোগ্যানি স্ত্রিয়ো রত্নধনানি চ
আদদে সর্বশো মূঢ ঐশ্বর্যং চ স্বয়ং তদা
196.21
তদাদায় চ লুব্ধস্য লাভাল্লোভো ব্যবর্ধত
তথা হি সর্বমাদায় রাজ্যমস্য জিহীর্ষতি
196.22
হীনস্য করণৈঃ সর্বৈরুচ্ছ্বাসপরমস্য চ
যতমানোঽপি তদ্রাজ্যং ন শশাকেতি নঃ শ্রুতম্
196.23
কিমন্যদ্বিহিতান্নূনং তস্য সা পুরুষেন্দ্রতা
যদি তে বিহিতং রাজ্যং ভবিষ্যতি বিশাং পতে
196.24
মিষতঃ সর্বলোকস্য স্থাস্যতে ত্বয়ি তদ্ধ্রুবম্
অতোঽন্যথা চেদ্বিহিতং যতমানো ন লপ্স্যসে
196.25
এবং বিদ্বন্নুপাদত্স্ব মন্ত্রিণাং সাধ্বসাধুতাম্
দুষ্টানাং চৈব বোদ্ধব্যমদুষ্টানাং চ ভাষিতম্
196.26
দ্রোণ উবাচ
বিদ্ম তে ভাবদোষেণ যদর্থমিদমুচ্যতে
দুষ্টঃ পাণ্ডবহেতোস্ত্বং দোষং খ্যাপয়সে হি নঃ
196.27
হিতং তু পরমং কর্ণ ব্রবীমি কুরুবর্ধনম্
অথ ত্বং মন্যসে দুষ্টং ব্রূহি যত্পরমং হিতম্
196.28
অতোঽন্যথা চেত্ক্রিয়তে যদ্ব্রবীমি পরং হিতম্
কুরবো বিনশিষ্যন্তি নচিরেণেতি মে মতিঃ