Utshovঅধ্যায় 197
197.1
বিদুর উবাচ
রাজন্নিঃসংশয়ং শ্রেয়ো বাচ্যস্ত্বমসি বান্ধবৈঃ
ন ত্বশুশ্রূষমাণেষু বাক্যং সংপ্রতিতিষ্ঠতি
197.2
হিতং হি তব তদ্বাক্যমুক্তবান্কুরুসত্তমঃ
ভীষ্মঃ শাংতনবো রাজন্প্রতিগৃহ্ণাসি তন্ন চ
197.3
তথা দ্রোণেন বহুধা ভাষিতং হিতমুত্তমম্
তচ্চ রাধাসুতঃ কর্ণো মন্যতে ন হিতং তব
197.4
চিন্তয়ংশ্চ ন পশ্যামি রাজংস্তব সুহৃত্তমম্
আভ্যাং পুরুষসিংহাভ্যাং যো বা স্যাত্প্রজ্ঞয়াধিকঃ
197.5
ইমৌ হি বৃদ্ধৌ বয়সা প্রজ্ঞয়া চ শ্রুতেন চ
সমৌ চ ত্বয়ি রাজেন্দ্র তেষু পাণ্ডুসুতেষু চ
197.6
ধর্মে চানবমৌ রাজন্সত্যতায়াং চ ভারত
রামাদ্দাশরথেশ্চৈব গয়াচ্চৈব ন সংশয়ঃ
197.7
ন চোক্তবন্তাবশ্রেয়ঃ পুরস্তাদপি কিংচন
ন চাপ্যপকৃতং কিংচিদনয়োর্লক্ষ্যতে ত্বয়ি
197.8
তাবিমৌ পুরুষব্যাঘ্রাবনাগসি নৃপ ত্বয়ি
ন মন্ত্রয়েতাং ত্বচ্ছ্রেয়ঃ কথং সত্যপরাক্রমৌ
197.9
প্রজ্ঞাবন্তৌ নরশ্রেষ্ঠাবস্মিঁল্লোকে নরাধিপ
ত্বন্নিমিত্তমতো নেমৌ কিংচিজ্জিহ্মং বদিষ্যতঃ
ইতি মে নৈষ্ঠিকী বুদ্ধির্বর্ততে কুরুনন্দন
197.10
ন চার্থহেতোর্ধর্মজ্ঞৌ বক্ষ্যতঃ পক্ষসংশ্রিতম্
এতদ্ধি পরমং শ্রেয়ো মেনাতে তব ভারত
197.11
দুর্যোধনপ্রভৃতয়ঃ পুত্রা রাজন্যথা তব
তথৈব পাণ্ডবেয়াস্তে পুত্রা রাজন্ন সংশয়ঃ
197.12
তেষু চেদহিতং কিংচিন্মন্ত্রয়েয়ুরবুদ্ধিতঃ
মন্ত্রিণস্তে ন তে শ্রেয়ঃ প্রপশ্যন্তি বিশেষতঃ
197.13
অথ তে হৃদয়ে রাজন্বিশেষস্তেষু বর্ততে
অন্তরস্থং বিবৃণ্বানাঃ শ্রেয়ঃ কুর্যুর্ন তে ধ্রুবম্
197.14
এতদর্থমিমৌ রাজন্মহাত্মানৌ মহাদ্যুতী
নোচতুর্বিবৃতং কিংচিন্ন হ্যেষ তব নিশ্চয়ঃ
197.15
যচ্চাপ্যশক্যতাং তেষামাহতুঃ পুরুষর্ষভৌ
তত্তথা পুরুষব্যাঘ্র তব তদ্ভদ্রমস্তু তে
197.16
কথং হি পাণ্ডবঃ শ্রীমান্সব্যসাচী পরংতপঃ
শক্যো বিজেতুং সংগ্রামে রাজন্মঘবতা অপি
197.17
ভীমসেনো মহাবাহুর্নাগায়ুতবলো মহান্
কথং হি যুধি শক্যেত বিজেতুমমরৈরপি
197.18
তথৈব কৃতিনৌ যুদ্ধে যমৌ যমসুতাবিব
কথং বিষহিতুং শক্যৌ রণে জীবিতুমিচ্ছতা
197.19
যস্মিন্ধৃতিরনুক্রোশঃ ক্ষমা সত্যং পরাক্রমঃ
নিত্যানি পাণ্ডবশ্রেষ্ঠে স জীয়েত কথং রণে
197.20
যেষাং পক্ষধরো রামো যেষাং মন্ত্রী জনার্দনঃ
কিং নু তৈরজিতং সংখ্যে যেষাং পক্ষে চ সাত্যকিঃ
197.21
দ্রুপদঃ শ্বশুরো যেষাং যেষাং শ্যালাশ্চ পার্ষতাঃ
ধৃষ্টদ্যুম্নমুখা বীরা ভ্রাতরো দ্রুপদাত্মজাঃ
197.22
সোঽশক্যতাং চ বিজ্ঞায় তেষামগ্রেণ ভারত
দায়াদ্যতাং চ ধর্মেণ সম্যক্তেষু সমাচর
197.23
ইদং নির্দিগ্ধময়শঃ পুরোচনকৃতং মহৎ
তেষামনুগ্রহেণাদ্য রাজন্প্রক্ষালয়াত্মনঃ
197.24
দ্রুপদোঽপি মহান্রাজা কৃতবৈরশ্চ নঃ পুরা
তস্য সংগ্রহণং রাজন্স্বপক্ষস্য বিবর্ধনম্
197.25
বলবন্তশ্চ দাশার্হা বহবশ্চ বিশাং পতে
যতঃ কৃষ্ণস্ততস্তে স্যুর্যতঃ কৃষ্ণস্ততো জয়ঃ
197.26
যচ্চ সাম্নৈব শক্যেত কার্যং সাধয়িতুং নৃপ
কো দৈবশপ্তস্তত্কার্তুং বিগ্রহেণ সমাচরেৎ
197.27
শ্রুত্বা চ জীবতঃ পার্থান্পৌরজানপদো জনঃ
বলবদ্দর্শনে গৃধ্নুস্তেষাং রাজন্কুরু প্রিয়ম্
197.28
দুর্যোধনশ্চ কর্ণশ্চ শকুনিশ্চাপি সৌবলঃ
অধর্ময়ুক্তা দুষ্প্রজ্ঞা বালা মৈষাং বচঃ কৃথাঃ
197.29
উক্তমেতন্ময়া রাজন্পুরা গুণবতস্তব
দুর্যোধনাপরাধেন প্রজেয়ং বিনশিষ্যতি