অধ্যায় 198

198.1

ধৃতরাষ্ট্র উবাচ
ভীষ্মঃ শাংতনবো বিদ্বান্দ্রোণশ্চ ভগবানৃষিঃ
হিতং পরমকং বাক্যং ত্বং চ সত্যং ব্রবীষি মাম্

198.2

যথৈব পাণ্ডোস্তে বীরাঃ কুন্তীপুত্রা মহারথাঃ
তথৈব ধর্মতঃ সর্বে মম পুত্রা ন সংশয়ঃ

198.3

যথৈব মম পুত্রাণামিদং রাজ্যং বিধীয়তে
তথৈব পাণ্ডুপুত্রাণামিদং রাজ্যং ন সংশয়ঃ

198.4

ক্ষত্তরানয় গচ্ছৈতান্সহ মাত্রা সুসত্কৃতান্
তয়া চ দেবরূপিণ্যা কৃষ্ণয়া সহ ভারত

198.5

দিষ্ট্যা জীবন্তি তে পার্থা দিষ্ট্যা জীবতি সা পৃথা
দিষ্ট্যা দ্রুপদকন্যাং চ লব্ধবন্তো মহারথাঃ

198.6

দিষ্ট্যা বর্ধামহে সর্বে দিষ্ট্যা শান্তঃ পুরোচনঃ
দিষ্ট্যা মম পরং দুঃখমপনীতং মহাদ্যুতে

198.7

বৈশংপায়ন উবাচ
ততো জগাম বিদুরো ধৃতরাষ্ট্রস্য শাসনাৎ
সকাশং যজ্ঞসেনস্য পাণ্ডবানাং চ ভারত

198.8

তত্র গত্বা স ধর্মজ্ঞঃ সর্বশাস্ত্রবিশারদঃ
দ্রুপদং ন্যায়তো রাজন্সংয়ুক্তমুপতস্থিবান্

198.9

স চাপি প্রতিজগ্রাহ ধর্মেণ বিদুরং ততঃ
চক্রতুশ্চ যথান্যায়ং কুশলপ্রশ্নসংবিদম্

198.10

দদর্শ পাণ্ডবাংস্তত্র বাসুদেবং চ ভারত
স্নেহাত্পরিষ্বজ্য স তান্পপ্রচ্ছানাময়ং ততঃ

198.11

তৈশ্চাপ্যমিতবুদ্ধিঃ স পূজিতোঽথ যথাক্রমম্
বচনাদ্ধৃতরাষ্ট্রস্য স্নেহয়ুক্তং পুনঃ পুনঃ

198.12

পপ্রচ্ছানাময়ং রাজংস্ততস্তান্পাণ্ডুনন্দনান্
প্রদদৌ চাপি রত্নানি বিবিধানি বসূনি চ

198.13

পাণ্ডবানাং চ কুন্ত্যাশ্চ দ্রৌপদ্যাশ্চ বিশাং পতে
দ্রুপদস্য চ পুত্রাণাং যথা দত্তানি কৌরবৈঃ

198.14

প্রোবাচ চামিতমতিঃ প্রশ্রিতং বিনয়ান্বিতঃ
দ্রুপদং পাণ্ডুপুত্রাণাং সংনিধৌ কেশবস্য চ

198.15

রাজঞ্শৃণু সহামাত্যঃ সপুত্রশ্চ বচো মম
ধৃতরাষ্ট্রঃ সপুত্রস্ত্বাং সহামাত্যঃ সবান্ধবঃ

198.16

অব্রবীত্কুশলং রাজন্প্রীয়মাণঃ পুনঃ পুনঃ
প্রীতিমাংস্তে দৃঢং চাপি সংবন্ধেন নরাধিপ

198.17

তথা ভীষ্মঃ শাংতনবঃ কৌরবৈঃ সহ সর্বশঃ
কুশলং ত্বাং মহাপ্রাজ্ঞঃ সর্বতঃ পরিপৃচ্ছতি

198.18

ভারদ্বাজো মহেষ্বাসো দ্রোণঃ প্রিয়সখস্তব
সমাশ্লেষমুপেত্য ত্বাং কুশলং পরিপৃচ্ছতি

198.19

ধৃতরাষ্ট্রশ্চ পাঞ্চাল্য ত্বয়া সংবন্ধমীয়িবান্
কৃতার্থং মন্যতেঽঽত্মানং তথা সর্বেঽপি কৌরবাঃ

198.20

ন তথা রাজ্যসংপ্রাপ্তিস্তেষাং প্রীতিকরী মতা
যথা সংবন্ধকং প্রাপ্য যজ্ঞসেন ত্বয়া সহ

198.21

এতদ্বিদিত্বা তু ভবান্প্রস্থাপয়তু পাণ্ডবান্
দ্রষ্টুং হি পাণ্ডুদায়াদাংস্ত্বরন্তে কুরবো ভৃশম্

198.22

বিপ্রোষিতা দীর্ঘকালমিমে চাপি নরর্ষভাঃ
উত্সুকা নগরং দ্রষ্টুং ভবিষ্যন্তি পৃথা তথা

198.23

কৃষ্ণামপি চ পাঞ্চালীং সর্বাঃ কুরুবরস্ত্রিয়ঃ
দ্রষ্টুকামাঃ প্রতীক্ষন্তে পুরং চ বিষয়ং চ নঃ

198.24

স ভবান্পাণ্ডুপুত্রাণামাজ্ঞাপয়তু মাচিরম্
গমনং সহদারাণামেতদাগমনং মম

198.25

বিসৃষ্টেষু ত্বয়া রাজন্পাণ্ডবেষু মহাত্মসু
ততোঽহং প্রেষয়িষ্যামি ধৃতরাষ্ট্রস্য শীঘ্রগান্
আগমিষ্যন্তি কৌন্তেয়াঃ কুন্তী চ সহ কৃষ্ণয়া

Contains text from DharmicData, made available under the Open Database License (ODbL). Simple meanings are written by AI and can contain mistakes.