Utshovঅধ্যায় 199
199.1
দ্রুপদ উবাচ
এবমেতন্মহাপ্রাজ্ঞ যথাত্থ বিদুরাদ্য মাম্
মমাপি পরমো হর্ষঃ সংবন্ধেঽস্মিন্কৃতে বিভো
199.2
গমনং চাপি যুক্তং স্যাদ্গৃহমেষাং মহাত্মনাম্
ন তু তাবন্ময়া যুক্তমেতদ্বক্তুং স্বয়ং গিরা
199.3
যদা তু মন্যতে বীরঃ কুন্তীপুত্রো যুধিষ্ঠিরঃ
ভীমসেনার্জুনৌ চৈব যমৌ চ পুরুষর্ষভৌ
199.4
রামকৃষ্ণৌ চ ধর্মজ্ঞৌ তদা গচ্ছন্তু পাণ্ডবাঃ
এতৌ হি পুরুষব্যাঘ্রাবেষাং প্রিয়হিতে রতৌ
199.5
যুধিষ্ঠির উবাচ
পরবন্তো বয়ং রাজংস্ত্বয়ি সর্বে সহানুগাঃ
যথা বক্ষ্যসি নঃ প্রীত্যা করিষ্যামস্তথা বয়ম্
199.6
বৈশংপায়ন উবাচ
ততোঽব্রবীদ্বাসুদেবো গমনং মম রোচতে
যথা বা মন্যতে রাজা দ্রুপদঃ সর্বধর্মবিৎ
199.7
দ্রুপদ উবাচ
যথৈব মন্যতে বীরো দাশার্হঃ পুরুষোত্তমঃ
প্রাপ্তকালং মহাবাহুঃ সা বুদ্ধির্নিশ্চিতা মম
199.8
যথৈব হি মহাভাগাঃ কৌন্তেয়া মম সাংপ্রতম্
তথৈব বাসুদেবস্য পাণ্ডুপুত্রা ন সংশয়ঃ
199.9
ন তদ্ধ্যায়তি কৌন্তেয়ো ধর্মপুত্রো যুধিষ্ঠিরঃ
যদেষাং পুরুষব্যাঘ্রঃ শ্রেয়ো ধ্যায়তি কেশবঃ
199.10
বৈশংপায়ন উবাচ
ততস্তে সমনুজ্ঞাতা দ্রুপদেন মহাত্মনা
পাণ্ডবাশ্চৈব কৃষ্ণশ্চ বিদুরশ্চ মহামতিঃ
199.11
আদায় দ্রৌপদীং কৃষ্ণাং কুন্তীং চৈব যশস্বিনীম্
সবিহারং সুখং জগ্মুর্নগরং নাগসাহ্বয়ম্
199.12
শ্রুত্বা চোপস্থিতান্বীরান্ধৃতরাষ্ট্রোঽপি কৌরবঃ
প্রতিগ্রহায় পাণ্ডূনাং প্রেষয়ামাস কৌরবান্
199.13
বিকর্ণং চ মহেষ্বাসং চিত্রসেনং চ ভারত
দ্রোণং চ পরমেষ্বাসং গৌতমং কৃপমেব চ
199.14
তৈস্তে পরিবৃতা বীরাঃ শোভমানা মহারথাঃ
নগরং হাস্তিনপুরং শনৈঃ প্রবিবিশুস্তদা
199.15
কৌতূহলেন নগরং দীর্যমাণমিবাভবৎ
যত্র তে পুরুষব্যাঘ্রাঃ শোকদুঃখবিনাশনাঃ
199.16
তত উচ্চাবচা বাচঃ প্রিয়াঃ প্রিয়চিকীর্ষুভিঃ
উদীরিতা অশৃণ্বংস্তে পাণ্ডবা হৃদয়ংগমাঃ
199.17
অয়ং স পুরুষব্যাঘ্রঃ পুনরায়াতি ধর্মবিৎ
যো নঃ স্বানিব দায়াদান্ধর্মেণ পরিরক্ষতি
199.18
অদ্য পাণ্ডুর্মহারাজো বনাদিব বনপ্রিয়ঃ
আগতঃ প্রিয়মস্মাকং চিকীর্ষুর্নাত্র সংশয়ঃ
199.19
কিং নু নাদ্য কৃতং তাবত্সর্বেষাং নঃ পরং প্রিয়ম্
যন্নঃ কুন্তীসুতা বীরা ভর্তারঃ পুনরাগতাঃ
199.20
যদি দত্তং যদি হুতং বিদ্যতে যদি নস্তপঃ
তেন তিষ্ঠন্তু নগরে পাণ্ডবাঃ শরদাং শতম্
199.21
ততস্তে ধৃতরাষ্ট্রস্য ভীষ্মস্য চ মহাত্মনঃ
অন্যেষাং চ তদর্হাণাং চক্রুঃ পাদাভিবন্দনম্
199.22
কৃত্বা তু কুশলপ্রশ্নং সর্বেণ নগরেণ তে
সমাবিশন্ত বেশ্মানি ধৃতরাষ্ট্রস্য শাসনাৎ
199.23
বিশ্রান্তাস্তে মহাত্মানঃ কংচিত্কালং মহাবলাঃ
আহূতা ধৃতরাষ্ট্রেণ রাজ্ঞা শাংতনবেন চ
199.24
ধৃতরাষ্ট্র উবাচ
ভ্রাতৃভিঃ সহ কৌন্তেয় নিবোধেদং বচো মম
পুনর্বো বিগ্রহো মা ভূত্খাণ্ডবপ্রস্থমাবিশ
199.25
ন চ বো বসতস্তত্র কশ্চিচ্ছক্তঃ প্রবাধিতুম্
সংরক্ষ্যমাণান্পার্থেন ত্রিদশানিব বজ্রিণা
অর্ধং রাজ্যস্য সংপ্রাপ্য খাণ্ডবপ্রস্থমাবিশ
199.26
বৈশংপায়ন উবাচ
প্রতিগৃহ্য তু তদ্বাক্যং নৃপং সর্বে প্রণম্য চ
প্রতস্থিরে ততো ঘোরং বনং তন্মনুজর্ষভাঃ
অর্ধং রাজ্যস্য সংপ্রাপ্য খাণ্ডবপ্রস্থমাবিশন্
199.27
ততস্তে পাণ্ডবাস্তত্র গত্বা কৃষ্ণপুরোগমাঃ
মণ্ডয়াং চক্রিরে তদ্বৈ পুরং স্বর্গবদচ্যুতাঃ
199.28
ততঃ পুণ্যে শিবে দেশে শান্তিং কৃত্বা মহারথাঃ
নগরং মাপয়ামাসুর্দ্বৈপায়নপুরোগমাঃ
199.29
সাগরপ্রতিরূপাভিঃ পরিখাভিরলংকৃতম্
প্রাকারেণ চ সংপন্নং দিবমাবৃত্য তিষ্ঠতা
199.30
পাণ্ডুরাভ্রপ্রকাশেন হিমরাশিনিভেন চ
শুশুভে তত্পুরশ্রেষ্ঠং নাগৈর্ভোগবতী যথা
199.31
দ্বিপক্ষগরুডপ্রখ্যৈর্দ্বারৈর্ঘোরপ্রদর্শনৈঃ
গুপ্তমভ্রচয়প্রখ্যৈর্গোপুরৈর্মন্দরোপমৈঃ
199.32
বিবিধৈরতিনির্বিদ্ধৈঃ শস্ত্রোপেতৈঃ সুসংবৃতৈঃ
শক্তিভিশ্চাবৃতং তদ্ধি দ্বিজিহ্বৈরিব পন্নগৈঃ
তল্পৈশ্চাভ্যাসিকৈর্যুক্তং শুশুভে যোধরক্ষিতম্
199.33
তীক্ষ্ণাঙ্কুশশতঘ্নীভির্যন্ত্রজালৈশ্চ শোভিতম্
আয়সৈশ্চ মহাচক্রৈঃ শুশুভে তত্পুরোত্তমম্
199.34
সুবিভক্তমহারথ্যং দেবতাবাধবর্জিতম্
বিরোচমানং বিবিধৈঃ পাণ্ডুরৈর্ভবনোত্তমৈঃ
199.35
তত্ত্রিবিষ্টপসংকাশমিন্দ্রপ্রস্থং ব্যরোচত
মেঘবৃন্দমিবাকাশে বৃদ্ধং বিদ্যুত্সমাবৃতম্
199.36
তত্র রম্যে শুভে দেশে কৌরব্যস্য নিবেশনম্
শুশুভে ধনসংপূর্ণং ধনাধ্যক্ষক্ষয়োপমম্
199.37
তত্রাগচ্ছন্দ্বিজা রাজন্সর্ববেদবিদাং বরাঃ
নিবাসং রোচয়ন্তি স্ম সর্বভাষাবিদস্তথা
199.38
বণিজশ্চাভ্যয়ুস্তত্র দেশে দিগ্ভ্যো ধনার্থিনঃ
সর্বশিল্পবিদশ্চৈব বাসায়াভ্যাগমংস্তদা
199.39
উদ্যানানি চ রম্যাণি নগরস্য সমন্ততঃ
আম্রৈরাম্রাতকৈর্নীপৈরশোকৈশ্চম্পকৈস্তথা
199.40
পুংনাগৈর্নাগপুষ্পৈশ্চ লকুচৈঃ পনসৈস্তথা
শালতালকদম্বৈশ্চ বকুলৈশ্চ সকেতকৈঃ
199.41
মনোহরৈঃ পুষ্পিতৈশ্চ ফলভারাবনামিতৈঃ
প্রাচীনামলকৈর্লোধ্রৈরঙ্কোলৈশ্চ সুপুষ্পিতৈঃ
199.42
জম্বূভিঃ পাটলাভিশ্চ কুব্জকৈরতিমুক্তকৈঃ
করবীরৈঃ পারিজাতৈরন্যৈশ্চ বিবিধৈর্দ্রুমৈঃ
199.43
নিত্যপুষ্পফলোপেতৈর্নানাদ্বিজগণায়ুতম্
মত্তবর্হিণসংঘুষ্টং কোকিলৈশ্চ সদামদৈঃ
199.44
গৃহৈরাদর্শবিমলৈর্বিবিধৈশ্চ লতাগৃহৈঃ
মনোহরৈশ্চিত্রগৃহৈস্তথা জগতিপর্বতৈঃ
বাপীভির্বিবিধাভিশ্চ পূর্ণাভিঃ পরমাম্ভসা
199.45
সরোভিরতিরম্যৈশ্চ পদ্মোত্পলসুগন্ধিভিঃ
হংসকারণ্ডবয়ুতৈশ্চক্রবাকোপশোভিতৈঃ
199.46
রম্যাশ্চ বিবিধাস্তত্র পুষ্করিণ্যো বনাবৃতাঃ
তডাগানি চ রম্যাণি বৃহন্তি চ মহান্তি চ
199.47
তেষাং পুণ্যজনোপেতং রাষ্ট্রমাবসতাং মহৎ
পাণ্ডবানাং মহারাজ শশ্বত্প্রীতিরবর্ধত
199.48
তত্র ভীষ্মেণ রাজ্ঞা চ ধর্মপ্রণয়নে কৃতে
পাণ্ডবাঃ সমপদ্যন্ত খাণ্ডবপ্রস্থবাসিনঃ
199.49
পঞ্চভিস্তৈর্মহেষ্বাসৈরিন্দ্রকল্পৈঃ সমন্বিতম্
শুশুভে তত্পুরশ্রেষ্ঠং নাগৈর্ভোগবতী যথা
199.50
তান্নিবেশ্য ততো বীরো রামেণ সহ কেশবঃ
যয়ৌ দ্বারবতীং রাজন্পাণ্ডবানুমতে তদা