অধ্যায় 200

200.1

জনমেজয় উবাচ
এবং সংপ্রাপ্য রাজ্যং তদিন্দ্রপ্রস্থে তপোধন
অত ঊর্ধ্বং মহাত্মানঃ কিমকুর্বন্ত পাণ্ডবাঃ

সর্ব এব মহাত্মানঃ পূর্বে মম পিতামহাঃ
দ্রৌপদী ধর্মপত্নী চ কথং তানন্ববর্তত

কথং বা পঞ্চ কৃষ্ণায়ামেকস্যাং তে নরাধিপাঃ
বর্তমানা মহাভাগা নাভিদ্যন্ত পরস্পরম্

শ্রোতুমিচ্ছাম্যহং সর্বং বিস্তরেণ তপোধন
তেষাং চেষ্টিতমন্যোন্যং যুক্তানাং কৃষ্ণয়া তয়া

বৈশংপায়ন উবাচ
ধৃতরাষ্ট্রাভ্যনুজ্ঞাতাঃ কৃষ্ণয়া সহ পাণ্ডবাঃ
রেমিরে পুরুষব্যাঘ্রাঃ প্রাপ্তরাজ্যাঃ পরংতপাঃ

প্রাপ্য রাজ্যং মহাতেজাঃ সত্যসংধো যুধিষ্ঠিরঃ
পালয়ামাস ধর্মেণ পৃথিবীং ভ্রাতৃভিঃ সহ

জিতারয়ো মহাপ্রাজ্ঞাঃ সত্যধর্মপরায়ণাঃ
মুদং পরমিকাং প্রাপ্তাস্তত্রোষুঃ পাণ্ডুনন্দনাঃ

কুর্বাণাঃ পৌরকার্যাণি সর্বাণি পুরুষর্ষভাঃ
আসাং চক্রুর্মহার্হেষু পার্থিবেষ্বাসনেষু চ

অথ তেষূপবিষ্টেষু সর্বেষ্বেব মহাত্মসু
নারদস্ত্বথ দেবর্ষিরাজগাম যদৃচ্ছয়া
আসনং রুচিরং তস্মৈ প্রদদৌ স্বং যুধিষ্ঠিরঃ

দেবর্ষেরুপবিষ্টস্য স্বয়মর্ঘ্যং যথাবিধি
প্রাদাদ্যুধিষ্ঠিরো ধীমান্রাজ্যং চাস্মৈ ন্যবেদয়ৎ

প্রতিগৃহ্য তু তাং পূজামৃষিঃ প্রীতমনাভবৎ
আশীর্ভির্বর্ধয়িত্বা তু তমুবাচাস্যতামিতি

নিষসাদাভ্যনুজ্ঞাতস্ততো রাজা যুধিষ্ঠিরঃ
প্রেষয়ামাস কৃষ্ণায়ৈ ভগবন্তমুপস্থিতম্

শ্রুত্বৈব দ্রৌপদী চাপি শুচির্ভূত্বা সমাহিতা
জগাম তত্র যত্রাস্তে নারদঃ পাণ্ডবৈঃ সহ

তস্যাভিবাদ্য চরণৌ দেবর্ষের্ধর্মচারিণী
কৃতাঞ্জলিঃ সুসংবীতা স্থিতাথ দ্রুপদাত্মজা

তস্যাশ্চাপি স ধর্মাত্মা সত্যবাগৃষিসত্তমঃ
আশিষো বিবিধাঃ প্রোচ্য রাজপুত্র্যাস্তু নারদঃ
গম্যতামিতি হোবাচ ভগবাংস্তামনিন্দিতাম্

গতায়ামথ কৃষ্ণায়াং যুধিষ্ঠিরপুরোগমান্
বিবিক্তে পাণ্ডবান্সর্বানুবাচ ভগবানৃষিঃ

পাঞ্চালী ভবতামেকা ধর্মপত্নী যশস্বিনী
যথা বো নাত্র ভেদঃ স্যাত্তথা নীতির্বিধীয়তাম্

সুন্দোপসুন্দাবসুরৌ ভ্রাতরৌ সহিতাবুভৌ
আস্তামবধ্যাবন্যেষাং ত্রিষু লোকেষু বিশ্রুতৌ

একরাজ্যাবেকগৃহাবেকশয্যাসনাশনৌ
তিলোত্তমায়াস্তৌ হেতোরন্যোন্যমভিজঘ্নতুঃ

রক্ষ্যতাং সৌহৃদং তস্মাদন্যোন্যপ্রতিভাবিকম্
যথা বো নাত্র ভেদঃ স্যাত্তত্কুরুষ্ব যুধিষ্ঠির

যুধিষ্ঠির উবাচ
সুন্দোপসুন্দাবসুরৌ কস্য পুত্রৌ মহামুনে
উত্পন্নশ্চ কথং ভেদঃ কথং চান্যোন্যমঘ্নতাম্

অপ্সরা দেবকন্যা বা কস্য চৈষা তিলোত্তমা
যস্যাঃ কামেন সংমত্তৌ জঘ্নতুস্তৌ পরস্পরম্

এতত্সর্বং যথাবৃত্তং বিস্তরেণ তপোধন
শ্রোতুমিচ্ছামহে বিপ্র পরং কৌতূহলং হি নঃ