UtshovChapter 200
200.1
जनमेजय उवाच
एवं संप्राप्य राज्यं तदिन्द्रप्रस्थे तपोधन
अत ऊर्ध्वं महात्मानः किमकुर्वन्त पाण्डवाः
Janamejaya uvacha
Evam samprapya rajyam tadindraprasthe tapodhana
Ata urdhvam mahatmanah kimakurvanta pandavah
200.2
सर्व एव महात्मानः पूर्वे मम पितामहाः
द्रौपदी धर्मपत्नी च कथं तानन्ववर्तत
Sarva eva mahatmanah purve mama pitamahah
Draupadi dharmapatni cha katham tananvavartata
200.3
कथं वा पञ्च कृष्णायामेकस्यां ते नराधिपाः
वर्तमाना महाभागा नाभिद्यन्त परस्परम्
Katham va pancha krishnayamekasyam te naradhipah
Vartamana mahabhaga nabhidyanta parasparam
200.4
श्रोतुमिच्छाम्यहं सर्वं विस्तरेण तपोधन
तेषां चेष्टितमन्योन्यं युक्तानां कृष्णया तया
Shrotumichchhamyaham sarvam vistarena tapodhana
Tesham cheshtitamanyonyam yuktanam krishnaya taya
200.5
वैशंपायन उवाच
धृतराष्ट्राभ्यनुज्ञाताः कृष्णया सह पाण्डवाः
रेमिरे पुरुषव्याघ्राः प्राप्तराज्याः परंतपाः
Vaishampayana uvacha
Dhritarashtrabhyanugyatah krishnaya saha pandavah
Remire purushavyaghrah praptarajyah parantapah
200.6
प्राप्य राज्यं महातेजाः सत्यसंधो युधिष्ठिरः
पालयामास धर्मेण पृथिवीं भ्रातृभिः सह
Prapya rajyam mahatejah satyasandho yudhishthirah
Palayamasa dharmena prithivim bhratribhih saha
200.7
जितारयो महाप्राज्ञाः सत्यधर्मपरायणाः
मुदं परमिकां प्राप्तास्तत्रोषुः पाण्डुनन्दनाः
Jitarayo mahapragyah satyadharmaparayanah
Mudam paramikam praptastatroshuh pandunandanah
200.8
कुर्वाणाः पौरकार्याणि सर्वाणि पुरुषर्षभाः
आसां चक्रुर्महार्हेषु पार्थिवेष्वासनेषु च
Kurvanah paurakaryani sarvani purusharshabhah
Asam chakrurmaharheshu parthiveshvasaneshu cha
200.9
अथ तेषूपविष्टेषु सर्वेष्वेव महात्मसु
नारदस्त्वथ देवर्षिराजगाम यदृच्छया
आसनं रुचिरं तस्मै प्रददौ स्वं युधिष्ठिरः
Atha teshupavishteshu sarveshveva mahatmasu
Naradastvatha devarshirajagama yadrichchhaya
Asanam ruchiram tasmai pradadau svam yudhishthirah
200.10
देवर्षेरुपविष्टस्य स्वयमर्घ्यं यथाविधि
प्रादाद्युधिष्ठिरो धीमान्राज्यं चास्मै न्यवेदयत्
Devarsherupavishtasya svayamarghyam yathavidhi
Pradadyudhishthiro dhimanrajyam chasmai nyavedayat
200.11
प्रतिगृह्य तु तां पूजामृषिः प्रीतमनाभवत्
आशीर्भिर्वर्धयित्वा तु तमुवाचास्यतामिति
Pratigrihya tu tam pujamrishih pritamanabhavat
Ashirbhirvardhayitva tu tamuvachasyatamiti
200.12
निषसादाभ्यनुज्ञातस्ततो राजा युधिष्ठिरः
प्रेषयामास कृष्णायै भगवन्तमुपस्थितम्
Nishasadabhyanugyatastato raja yudhishthirah
Preshayamasa krishnayai bhagavantamupasthitam
200.13
श्रुत्वैव द्रौपदी चापि शुचिर्भूत्वा समाहिता
जगाम तत्र यत्रास्ते नारदः पाण्डवैः सह
Shrutvaiva draupadi chapi shuchirbhutva samahita
Jagama tatra yatraste naradah pandavaih saha
200.14
तस्याभिवाद्य चरणौ देवर्षेर्धर्मचारिणी
कृताञ्जलिः सुसंवीता स्थिताथ द्रुपदात्मजा
Tasyabhivadya charanau devarsherdharmacharini
Kritanjalih susanvita sthitatha drupadatmaja
200.15
तस्याश्चापि स धर्मात्मा सत्यवागृषिसत्तमः
आशिषो विविधाः प्रोच्य राजपुत्र्यास्तु नारदः
गम्यतामिति होवाच भगवांस्तामनिन्दिताम्
Tasyashchapi sa dharmatma satyavagrishisattamah
Ashisho vividhah prochya rajaputryastu naradah
Gamyatamiti hovacha bhagavanstamaninditam
200.16
गतायामथ कृष्णायां युधिष्ठिरपुरोगमान्
विविक्ते पाण्डवान्सर्वानुवाच भगवानृषिः
Gatayamatha krishnayam yudhishthirapurogaman
Vivikte pandavansarvanuvacha bhagavanrishih
200.17
पाञ्चाली भवतामेका धर्मपत्नी यशस्विनी
यथा वो नात्र भेदः स्यात्तथा नीतिर्विधीयताम्
Panchali bhavatameka dharmapatni yashasvini
Yatha vo natra bhedah syattatha nitirvidhiyatam
200.18
सुन्दोपसुन्दावसुरौ भ्रातरौ सहितावुभौ
आस्तामवध्यावन्येषां त्रिषु लोकेषु विश्रुतौ
Sundopasundavasurau bhratarau sahitavubhau
Astamavadhyavanyesham trishu lokeshu vishrutau
200.19
एकराज्यावेकगृहावेकशय्यासनाशनौ
तिलोत्तमायास्तौ हेतोरन्योन्यमभिजघ्नतुः
Ekarajyavekagrihavekashayyasanashanau
Tilottamayastau hetoranyonyamabhijaghnatuh
200.20
रक्ष्यतां सौहृदं तस्मादन्योन्यप्रतिभाविकम्
यथा वो नात्र भेदः स्यात्तत्कुरुष्व युधिष्ठिर
Rakshyatam sauhridam tasmadanyonyapratibhavikam
Yatha vo natra bhedah syattatkurushva yudhishthira
200.21
युधिष्ठिर उवाच
सुन्दोपसुन्दावसुरौ कस्य पुत्रौ महामुने
उत्पन्नश्च कथं भेदः कथं चान्योन्यमघ्नताम्
Yudhishthira uvacha
Sundopasundavasurau kasya putrau mahamune
Utpannashcha katham bhedah katham chanyonyamaghnatam
200.22
अप्सरा देवकन्या वा कस्य चैषा तिलोत्तमा
यस्याः कामेन संमत्तौ जघ्नतुस्तौ परस्परम्
Apsara devakanya va kasya chaisha tilottama
Yasyah kamena sammattau jaghnatustau parasparam
200.23
एतत्सर्वं यथावृत्तं विस्तरेण तपोधन
श्रोतुमिच्छामहे विप्र परं कौतूहलं हि नः
Etatsarvam yathavrittam vistarena tapodhana
Shrotumichchhamahe vipra param kautuhalam hi nah