Utshovঅধ্যায় 201
201.1
নারদ উবাচ
শৃণু মে বিস্তরেণেমমিতিহাসং পুরাতনম্
ভ্রাতৃভীঃ সহিতঃ পার্থ যথাবৃত্তং যুধিষ্ঠির
201.2
মহাসুরস্যান্ববায়ে হিরণ্যকশিপোঃ পুরা
নিকুম্ভো নাম দৈত্যেন্দ্রস্তেজস্বী বলবানভূৎ
201.3
তস্য পুত্রৌ মহাবীর্যৌ জাতৌ ভীমপরাক্রমৌ
সহান্যোন্যেন ভুঞ্জাতে বিনান্যোন্যং ন গচ্ছতঃ
201.4
অন্যোন্যস্য প্রিয়করাবন্যোন্যস্য প্রিয়ংবদৌ
একশীলসমাচারৌ দ্বিধৈবৈকং যথা কৃতৌ
201.5
তৌ বিবৃদ্ধৌ মহাবীর্যৌ কার্যেষ্বপ্যেকনিশ্চয়ৌ
ত্রৈলোক্যবিজয়ার্থায় সমাস্থায়ৈকনিশ্চয়ম্
201.6
কৃত্বা দীক্ষাং গতৌ বিন্ধ্যং তত্রোগ্রং তেপতুস্তপঃ
তৌ তু দীর্ঘেণ কালেন তপোয়ুক্তৌ বভূবতুঃ
201.7
ক্ষুত্পিপাসাপরিশ্রান্তৌ জটাবল্কলধারিণৌ
মলোপচিতসর্বাঙ্গৌ বায়ুভক্ষৌ বভূবতুঃ
201.8
আত্মমাংসানি জুহ্বন্তৌ পাদাঙ্গুষ্ঠাগ্রধিষ্ঠিতৌ
ঊর্ধ্ববাহূ চানিমিষৌ দীর্ঘকালং ধৃতব্রতৌ
201.9
তয়োস্তপঃপ্রভাবেণ দীর্ঘকালং প্রতাপিতঃ
ধূমং প্রমুমুচে বিন্ধ্যস্তদদ্ভুতমিবাভবৎ
201.10
ততো দেবাভবন্ভীতা উগ্রং দৃষ্ট্বা তয়োস্তপঃ
তপোবিঘাতার্থমথো দেবা বিঘ্নানি চক্রিরে
201.11
রত্নৈঃ প্রলোভয়ামাসুঃ স্ত্রীভিশ্চোভৌ পুনঃ পুনঃ
ন চ তৌ চক্রতুর্ভঙ্গং ব্রতস্য সুমহাব্রতৌ
201.12
অথ মায়াং পুনর্দেবাস্তয়োশ্চক্রুর্মহাত্মনোঃ
ভগিন্যো মাতরো ভার্যাস্তয়োঃ পরিজনস্তথা
201.13
পরিপাত্যমানা বিত্রস্তাঃ শূলহস্তেন রক্ষসা
স্রস্তাভরণকেশান্তা একান্তভ্রষ্টবাসসঃ
201.14
অভিধাব্য ততঃ সর্বাস্তৌ ত্রাহীতি বিচুক্রুশুঃ
ন চ তৌ চক্রতুর্ভঙ্গং ব্রতস্য সুমহাব্রতৌ
201.15
যদা ক্ষোভং নোপয়াতি নার্তিমন্যতরস্তয়োঃ
ততঃ স্ত্রিয়স্তা ভূতং চ সর্বমন্তরধীয়ত
201.16
ততঃ পিতামহঃ সাক্ষাদভিগম্য মহাসুরৌ
বরেণ ছন্দয়ামাস সর্বলোকপিতামহঃ
201.17
ততঃ সুন্দোপসুন্দৌ তৌ ভ্রাতরৌ দৃঢবিক্রমৌ
দৃষ্ট্বা পিতামহং দেবং তস্থতুঃ প্রাঞ্জলী তদা
201.18
ঊচতুশ্চ প্রভুং দেবং ততস্তৌ সহিতৌ তদা
আবয়োস্তপসানেন যদি প্রীতঃ পিতামহঃ
201.19
মায়াবিদাবস্ত্রবিদৌ বলিনৌ কামরূপিণৌ
উভাবপ্যমরৌ স্যাবঃ প্রসন্নো যদি নৌ প্রভুঃ
201.20
পিতামহ উবাচ
ঋতেঽমরত্বমন্যদ্বাং সর্বমুক্তং ভবিষ্যতি
অন্যদ্বৃণীতাং মৃত্যোশ্চ বিধানমমরৈঃ সমম্
201.21
করিষ্যাবেদমিতি যন্মহদভ্যুত্থিতং তপঃ
যুবয়োর্হেতুনানেন নামরত্বং বিধীয়তে
201.22
ত্রৈলোক্যবিজয়ার্থায় ভবদ্ভ্যামাস্থিতং তপঃ
হেতুনানেন দৈত্যেন্দ্রৌ ন বাং কামং করোম্যহম্
201.23
সুন্দোপসুন্দাবূচতুঃ
ত্রিষু লোকেষু যদ্ভূতং কিংচিত্স্থাবরজঙ্গমম্
সর্বস্মান্নৌ ভয়ং ন স্যাদৃতেঽন্যোন্যং পিতামহ
201.24
পিতামহ উবাচ
যত্প্রার্থিতং যথোক্তং চ কামমেতদ্দদানি বাম্
মৃত্যোর্বিধানমেতচ্চ যথাবদ্বাং ভবিষ্যতি
201.25
নারদ উবাচ
ততঃ পিতামহো দত্ত্বা বরমেতত্তদা তয়োঃ
নিবর্ত্য তপসস্তৌ চ ব্রহ্মলোকং জগাম হ
201.26
লব্ধ্বা বরাণি সর্বাণি দৈত্যেন্দ্রাবপি তাবুভৌ
অবধ্যৌ সর্বলোকস্য স্বমেব ভবনং গতৌ
201.27
তৌ তু লব্ধবরৌ দৃষ্ট্বা কৃতকামৌ মহাসুরৌ
সর্বঃ সুহৃজ্জনস্তাভ্যাং প্রমোদমুপজগ্মিবান্
201.28
ততস্তৌ তু জটা হিত্বা মৌলিনৌ সংবভূবতুঃ
মহার্হাভরণোপেতৌ বিরজোম্বরধারিণৌ
201.29
অকালকৌমুদীং চৈব চক্রতুঃ সার্বকামিকীম্
দৈত্যেন্দ্রৌ পরমপ্রীতৌ তয়োশ্চৈব সুহৃজ্জনঃ
201.30
ভক্ষ্যতাং ভুজ্যতাং নিত্যং রম্যতাং গীয়তামিতি
পীয়তাং দীয়তাং চেতি বাচ আসন্গৃহে গৃহে
201.31
তত্র তত্র মহাপানৈরুত্কৃষ্টতলনাদিতৈঃ
হৃষ্টং প্রমুদিতং সর্বং দৈত্যানামভবত্পুরম্
201.32
তৈস্তৈর্বিহারৈর্বহুভির্দৈত্যানাং কামরূপিণাম্
সমাঃ সংক্রীডতাং তেষামহরেকমিবাভবৎ