Utshovঅধ্যায় 202
202.1
নারদ উবাচ
উত্সবে বৃত্তমাত্রে তু ত্রৈলোক্যাকাঙ্ক্ষিণাবুভৌ
মন্ত্রয়িত্বা ততঃ সেনাং তাবাজ্ঞাপয়তাং তদা
202.2
সুহৃদ্ভিরভ্যনুজ্ঞাতৌ দৈত্যবৃদ্ধৈশ্চ মন্ত্রিভিঃ
কৃত্বা প্রাস্থানিকং রাত্রৌ মঘাসু যয়তুস্তদা
202.3
গদাপট্টিশধারিণ্যা শূলমুদ্গরহস্তয়া
প্রস্থিতৌ সহধর্মিণ্যা মহত্যা দৈত্যসেনয়া
202.4
মঙ্গলৈঃ স্তুতিভিশ্চাপি বিজয়প্রতিসংহিতৈঃ
চারণৈঃ স্তূয়মানৌ তু জগ্মতুঃ পরয়া মুদা
202.5
তাবন্তরিক্ষমুত্পত্য দৈত্যৌ কামগমাবুভৌ
দেবানামেব ভবনং জগ্মতুর্যুদ্ধদুর্মদৌ
202.6
তয়োরাগমনং জ্ঞাত্বা বরদানং চ তত্প্রভোঃ
হিত্বা ত্রিবিষ্টপং জগ্মুর্ব্রহ্মলোকং ততঃ সুরাঃ
202.7
তাবিন্দ্রলোকং নির্জিত্য যক্ষরক্ষোগণাংস্তথা
খেচরাণ্যপি ভূতানি জিগ্যতুস্তীব্রবিক্রমৌ
202.8
অন্তর্ভূমিগতান্নাগাঞ্জিত্বা তৌ চ মহাসুরৌ
সমুদ্রবাসিনঃ সর্বান্ম্লেচ্ছজাতীন্বিজিগ্যতুঃ
202.9
ততঃ সর্বাং মহীং জেতুমারব্ধাবুগ্রশাসনৌ
সৈনিকাংশ্চ সমাহূয় সুতীক্ষ্ণাং বাচমূচতুঃ
202.10
রাজর্ষয়ো মহায়জ্ঞৈর্হব্যকব্যৈর্দ্বিজাতয়ঃ
তেজো বলং চ দেবানাং বর্ধয়ন্তি শ্রিয়ং তথা
202.11
তেষামেবং প্রবৃদ্ধানাং সর্বেষামসুরদ্বিষাম্
সংভূয় সর্বৈরস্মাভিঃ কার্যঃ সর্বাত্মনা বধঃ
202.12
এবং সর্বান্সমাদিশ্য পূর্বতীরে মহোদধেঃ
ক্রূরাং মতিং সমাস্থায় জগ্মতুঃ সর্বতোমুখম্
202.13
যজ্ঞৈর্যজন্তে যে কেচিদ্যাজয়ন্তি চ যে দ্বিজাঃ
তান্সর্বান্প্রসভং দৃষ্ট্বা বলিনৌ জঘ্নতুস্তদা
202.14
আশ্রমেষ্বগ্নিহোত্রাণি ঋষীণাং ভাবিতাত্মনাম্
গৃহীত্বা প্রক্ষিপন্ত্যপ্সু বিশ্রব্ধাঃ সৈনিকাস্তয়োঃ
202.15
তপোধনৈশ্চ যে শাপাঃ ক্রুদ্ধৈরুক্তা মহাত্মভিঃ
নাক্রামন্তি তয়োস্তেঽপি বরদানেন জৃম্ভতোঃ
202.16
নাক্রামন্তি যদা শাপা বাণা মুক্তাঃ শিলাস্বিব
নিয়মাংস্তদা পরিত্যজ্য ব্যদ্রবন্ত দ্বিজাতয়ঃ
202.17
পৃথিব্যাং যে তপঃসিদ্ধা দান্তাঃ শমপরায়ণাঃ
তয়োর্ভয়াদ্দুদ্রুবুস্তে বৈনতেয়াদিবোরগাঃ
202.18
মথিতৈরাশ্রমৈর্ভগ্নৈর্বিকীর্ণকলশস্রুবৈঃ
শূন্যমাসীজ্জগত্সর্বং কালেনেব হতং যথা
202.19
রাজর্ষিভিরদৃশ্যদ্ভিরৃষিভিশ্চ মহাসুরৌ
উভৌ বিনিশ্চয়ং কৃত্বা বিকুর্বাতে বধৈষিণৌ
202.20
প্রভিন্নকরটৌ মত্তৌ ভূত্বা কুঞ্জররূপিণৌ
সংলীনানপি দুর্গেষু নিন্যতুর্যমসাদনম্
202.21
সিংহৌ ভূত্বা পুনর্ব্যাঘ্রৌ পুনশ্চান্তর্হিতাবুভৌ
তৈস্তৈরুপায়ৈস্তৌ ক্রূরাবৃষীন্দৃষ্ট্বা নিজঘ্নতুঃ
202.22
নিবৃত্তয়জ্ঞস্বাধ্যায়া প্রণষ্টনৃপতিদ্বিজা
উত্সন্নোত্সবয়জ্ঞা চ বভূব বসুধা তদা
202.23
হাহাভূতা ভয়ার্তা চ নিবৃত্তবিপণাপণা
নিবৃত্তদেবকার্যা চ পুণ্যোদ্বাহবিবর্জিতা
202.24
নিবৃত্তকৃষিগোরক্ষা বিধ্বস্তনগরাশ্রমা
অস্থিকঙ্কালসংকীর্ণা ভূর্বভূবোগ্রদর্শনা
202.25
নিবৃত্তপিতৃকার্যং চ নির্বষট্কারমঙ্গলম্
জগত্প্রতিভয়াকারং দুষ্প্রেক্ষ্যমভবত্তদা
202.26
চন্দ্রাদিত্যৌ গ্রহাস্তারা নক্ষত্রাণি দিবৌকসঃ
জগ্মুর্বিষাদং তত্কর্ম দৃষ্ট্বা সুন্দোপসুন্দয়োঃ
202.27
এবং সর্বা দিশো দৈত্যৌ জিত্বা ক্রূরেণ কর্মণা
নিঃসপত্নৌ কুরুক্ষেত্রে নিবেশমভিচক্রতুঃ