অধ্যায় 203

203.1

নারদ উবাচ
ততো দেবর্ষয়ঃ সর্বে সিদ্ধাশ্চ পরমর্ষয়ঃ
জগ্মুস্তদা পরামার্তিং দৃষ্ট্বা তত্কদনং মহৎ

203.2

তেঽভিজগ্মুর্জিতক্রোধা জিতাত্মানো জিতেন্দ্রিয়াঃ
পিতামহস্য ভবনং জগতঃ কৃপয়া তদা

203.3

ততো দদৃশুরাসীনং সহ দেবৈঃ পিতামহম্
সিদ্ধৈর্ব্রহ্মর্ষিভিশ্চৈব সমন্তাত্পরিবারিতম্

203.4

তত্র দেবো মহাদেবস্তত্রাগ্নির্বায়ুনা সহ
চন্দ্রাদিত্যৌ চ ধর্মশ্চ পরমেষ্ঠী তথা বুধঃ

203.5

বৈখানসা বালখিল্যা বানপ্রস্থা মরীচিপাঃ
অজাশ্চৈবাবিমূঢাশ্চ তেজোগর্ভাস্তপস্বিনঃ
ঋষয়ঃ সর্ব এবৈতে পিতামহমুপাসতে

203.6

ততোঽভিগম্য সহিতাঃ সর্ব এব মহর্ষয়ঃ
সুন্দোপসুন্দয়োঃ কর্ম সর্বমেব শশংসিরে

203.7

যথাকৃতং যথা চৈব কৃতং যেন ক্রমেণ চ
ন্যবেদয়ংস্ততঃ সর্বমখিলেন পিতামহে

203.8

ততো দেবগণাঃ সর্বে তে চৈব পরমর্ষয়ঃ
তমেবার্থং পুরস্কৃত্য পিতামহমচোদয়ন্

203.9

ততঃ পিতামহঃ শ্রুত্বা সর্বেষাং তদ্বচস্তদা
মুহূর্তমিব সংচিন্ত্য কর্তব্যস্য বিনিশ্চয়ম্

203.10

তয়োর্বধং সমুদ্দিশ্য বিশ্বকর্মাণমাহ্বয়ৎ
দৃষ্ট্বা চ বিশ্বকর্মাণং ব্যাদিদেশ পিতামহঃ
সৃজ্যতাং প্রার্থনীয়েহ প্রমদেতি মহাতপাঃ

203.11

পিতামহং নমস্কৃত্য তদ্বাক্যমভিনন্দ্য চ
নির্মমে যোষিতং দিব্যাং চিন্তয়িত্বা প্রয়ত্নতঃ

203.12

ত্রিষু লোকেষু যত্কিংচিদ্ভূতং স্থাবরজঙ্গমম্
সমানয়দ্দর্শনীয়ং তত্তদ্যত্নাত্ততস্ততঃ

203.13

কোটিশশ্চাপি রত্নানি তস্যা গাত্রে ন্যবেশয়ৎ
তাং রত্নসংঘাতময়ীমসৃজদ্দেবরূপিণীম্

203.14

সা প্রয়ত্নেন মহতা নির্মিতা বিশ্বকর্মণা
ত্রিষু লোকেষু নারীণাং রূপেণাপ্রতিমাভবৎ

203.15

ন তস্যাঃ সূক্ষ্মমপ্যস্তি যদ্গাত্রে রূপসংপদা
ন যুক্তং যত্র বা দৃষ্টির্ন সজ্জতি নিরীক্ষতাম্

203.16

সা বিগ্রহবতীব শ্রীঃ কান্তরূপা বপুষ্মতী
জহার সর্বভূতানাং চক্ষূংষি চ মনাংসি চ

203.17

তিলং তিলং সমানীয় রত্নানাং যদ্বিনির্মিতা
তিলোত্তমেত্যতস্তস্যা নাম চক্রে পিতামহঃ

203.18

পিতামহ উবাচ
গচ্ছ সুন্দোপসুন্দাভ্যামসুরাভ্যাং তিলোত্তমে
প্রার্থনীয়েন রূপেণ কুরু ভদ্রে প্রলোভনম্

203.19

ত্বত্কৃতে দর্শনাদেব রূপসংপত্কৃতেন বৈ
বিরোধঃ স্যাদ্যথা তাভ্যামন্যোন্যেন তথা কুরু

203.20

নারদ উবাচ
সা তথেতি প্রতিজ্ঞায় নমস্কৃত্য পিতামহম্
চকার মণ্ডলং তত্র বিবুধানাং প্রদক্ষিণম্

203.21

প্রাঙ্মুখো ভগবানাস্তে দক্ষিণেন মহেশ্বরঃ
দেবাশ্চৈবোত্তরেণাসন্সর্বতস্ত্বৃষয়োঽভবন্

203.22

কুর্বন্ত্যা তু তয়া তত্র মণ্ডলং তত্প্রদক্ষিণম্
ইন্দ্রঃ স্থাণুশ্চ ভগবান্ধৈর্যেণ প্রত্যবস্থিতৌ

203.23

দ্রষ্টুকামস্য চাত্যর্থং গতায়াঃ পার্শ্বতস্তদা
অন্যদঞ্চিতপক্ষ্মান্তং দক্ষিণং নিঃসৃতং মুখম্

203.24

পৃষ্ঠতঃ পরিবর্তন্ত্যাঃ পশ্চিমং নিঃসৃতং মুখম্
গতায়াশ্চোত্তরং পার্শ্বমুত্তরং নিঃসৃতং মুখম্

203.25

মহেন্দ্রস্যাপি নেত্রাণাং পার্শ্বতঃ পৃষ্ঠতোঽগ্রতঃ
রক্তান্তানাং বিশালানাং সহস্রং সর্বতোঽভবৎ

203.26

এবং চতুর্মুখঃ স্থাণুর্মহাদেবোঽভবত্পুরা
তথা সহস্রনেত্রশ্চ বভূব বলসূদনঃ

203.27

তথা দেবনিকায়ানামৃষীণাং চৈব সর্বশঃ
মুখান্যভিপ্রবর্তন্তে যেন যাতি তিলোত্তমা

203.28

তস্যা গাত্রে নিপতিতা তেষাং দৃষ্টির্মহাত্মনাম্
সর্বেষামেব ভূয়িষ্ঠমৃতে দেবং পিতামহম্

203.29

গচ্ছন্ত্যাস্তু তদা দেবাঃ সর্বে চ পরমর্ষয়ঃ
কৃতমিত্যেব তত্কার্যং মেনিরে রূপসংপদা

203.30

তিলোত্তমায়াং তু তদা গতায়াং লোকভাবনঃ
সর্বান্বিসর্জয়ামাস দেবানৃষিগণাংশ্চ তান্

Contains text from DharmicData, made available under the Open Database License (ODbL). Simple meanings are written by AI and can contain mistakes.