অধ্যায় 204

204.1

নারদ উবাচ
জিত্বা তু পৃথিবীং দৈত্যৌ নিঃসপত্নৌ গতব্যথৌ
কৃত্বা ত্রৈলোক্যমব্যগ্রং কৃতকৃত্যৌ বভূবতুঃ

204.2

দেবগন্ধর্বয়ক্ষাণাং নাগপার্থিবরক্ষসাম্
আদায় সর্বরত্নানি পরাং তুষ্টিমুপাগতৌ

204.3

যদা ন প্রতিষেদ্ধারস্তয়োঃ সন্তীহ কেচন
নিরুদ্যোগৌ তদা ভূত্বা বিজহ্রাতেঽমরাবিব

204.4

স্ত্রীভির্মাল্যৈশ্চ গন্ধৈশ্চ ভক্ষৈর্ভোজ্যৈশ্চ পুষ্কলৈঃ
পানৈশ্চ বিবিধৈর্হৃদ্যৈঃ পরাং প্রীতিমবাপতুঃ

204.5

অন্তঃপুরে বনোদ্যানে পর্বতোপবনেষু চ
যথেপ্সিতেষু দেশেষু বিজহ্রাতেঽমরাবিব

204.6

ততঃ কদাচিদ্বিন্ধ্যস্য পৃষ্ঠে সমশিলাতলে
পুষ্পিতাগ্রেষু শালেষু বিহারমভিজগ্মতুঃ

204.7

দিব্যেষু সর্বকামেষু সমানীতেষু তত্র তৌ
বরাসনেষু সংহৃষ্টৌ সহ স্ত্রীভির্নিষেদতুঃ

204.8

ততো বাদিত্রনৃত্তাভ্যামুপাতিষ্ঠন্ত তৌ স্ত্রিয়ঃ
গীতৈশ্চ স্তুতিসংয়ুক্তৈঃ প্রীত্যর্থমুপজগ্মিরে

204.9

ততস্তিলোত্তমা তত্র বনে পুষ্পাণি চিন্বতী
বেষমাক্ষিপ্তমাধায় রক্তেনৈকেন বাসসা

204.10

নদীতীরেষু জাতান্সা কর্ণিকারান্বিচিন্বতী
শনৈর্জগাম তং দেশং যত্রাস্তাং তৌ মহাসুরৌ

204.11

তৌ তু পীত্বা বরং পানং মদরক্তান্তলোচনৌ
দৃষ্ট্বৈব তাং বরারোহাং ব্যথিতৌ সংবভূবতুঃ

204.12

তাবুত্পত্যাসনং হিত্বা জগ্মতুর্যত্র সা স্থিতা
উভৌ চ কামসংমত্তাবুভৌ প্রার্থয়তশ্চ তাম্

204.13

দক্ষিণে তাং করে সুভ্রূং সুন্দো জগ্রাহ পাণিনা
উপসুন্দোঽপি জগ্রাহ বামে পাণৌ তিলোত্তমাম্

204.14

বরপ্রদানমত্তৌ তাবৌরসেন বলেন চ
ধনরত্নমদাভ্যাং চ সুরাপানমদেন চ

204.15

সর্বৈরেতৈর্মদৈর্মত্তাবন্যোন্যং ভ্রুকুটীকৃতৌ
মদকামসমাবিষ্টৌ পরস্পরমথোচতুঃ

204.16

মম ভার্যা তব গুরুরিতি সুন্দোঽভ্যভাষত
মম ভার্যা তব বধূরুপসুন্দোঽভ্যভাষত

204.17

নৈষা তব মমৈষেতি তত্র তৌ মন্যুরাবিশৎ
তস্যা হেতোর্গদে ভীমে তাবুভাবপ্যগৃহ্ণতাম্

204.18

তৌ প্রগৃহ্য গদে ভীমে তস্যাঃ কামেন মোহিতৌ
অহং পূর্বমহং পূর্বমিত্যন্যোন্যং নিজঘ্নতুঃ

204.19

তৌ গদাভিহতৌ ভীমৌ পেততুর্ধরণীতলে
রুধিরেণাবলিপ্তাঙ্গৌ দ্বাবিবার্কৌ নভশ্চ্যুতৌ

204.20

ততস্তা বিদ্রুতা নার্যঃ স চ দৈত্যগণস্তদা
পাতালমগমত্সর্বো বিষাদভয়কম্পিতঃ

204.21

ততঃ পিতামহস্তত্র সহ দেবৈর্মহর্ষিভিঃ
আজগাম বিশুদ্ধাত্মা পূজয়িষ্যংস্তিলোত্তমাম্

204.22

বরেণ ছন্দিতা সা তু ব্রহ্মণা প্রীতিমেব হ
বরয়ামাস তত্রৈনাং প্রীতঃ প্রাহ পিতামহঃ

204.23

আদিত্যচরিতাঁল্লোকান্বিচরিষ্যসি ভামিনি
তেজসা চ সুদৃষ্টাং ত্বাং ন করিষ্যতি কশ্চন

204.24

এবং তস্যৈ বরং দত্ত্বা সর্বলোকপিতামহঃ
ইন্দ্রে ত্রৈলোক্যমাধায় ব্রহ্মলোকং গতঃ প্রভুঃ

204.25

এবং তৌ সহিতৌ ভূত্বা সর্বার্থেষ্বেকনিশ্চয়ৌ
তিলোত্তমার্থে সংক্রুদ্ধাবন্যোন্যমভিজঘ্নতুঃ

204.26

তস্মাদ্ব্রবীমি বঃ স্নেহাত্সর্বান্ভরতসত্তমান্
যথা বো নাত্র ভেদঃ স্যাত্সর্বেষাং দ্রৌপদীকৃতে
তথা কুরুত ভদ্রং বো মম চেত্প্রিয়মিচ্ছথ

204.27

বৈশংপায়ন উবাচ
এবমুক্তা মহাত্মানো নারদেন মহর্ষিণা
সময়ং চক্রিরে রাজংস্তেঽন্যোন্যেন সমাগতাঃ
সমক্ষং তস্য দেবর্ষের্নারদস্যামিতৌজসঃ

204.28

দ্রৌপদ্যা নঃ সহাসীনমন্যোঽন্যং যোঽভিদর্শয়েৎ
স নো দ্বাদশ বর্ষাণি ব্রহ্মচারী বনে বসেৎ

204.29

কৃতে তু সময়ে তস্মিন্পাণ্ডবৈর্ধর্মচারিভিঃ
নারদোঽপ্যগমত্প্রীত ইষ্টং দেশং মহামুনিঃ

204.30

এবং তৈঃ সময়ঃ পূর্বং কৃতো নারদচোদিতৈঃ
ন চাভিদ্যন্ত তে সার্বে তদান্যোন্যেন ভারত

Contains text from DharmicData, made available under the Open Database License (ODbL). Simple meanings are written by AI and can contain mistakes.