UtshovChapter 204
204.1
नारद उवाच
जित्वा तु पृथिवीं दैत्यौ निःसपत्नौ गतव्यथौ
कृत्वा त्रैलोक्यमव्यग्रं कृतकृत्यौ बभूवतुः
Narada uvacha
Jitva tu prithivim daityau nihsapatnau gatavyathau
Kritva trailokyamavyagram kritakrityau babhuvatuh
204.2
देवगन्धर्वयक्षाणां नागपार्थिवरक्षसाम्
आदाय सर्वरत्नानि परां तुष्टिमुपागतौ
Devagandharvayakshanam nagaparthivarakshasam
Adaya sarvaratnani param tushtimupagatau
204.3
यदा न प्रतिषेद्धारस्तयोः सन्तीह केचन
निरुद्योगौ तदा भूत्वा विजह्रातेऽमराविव
Yada na pratisheddharastayoh santiha kechana
Nirudyogau tada bhutva vijahratemaraviva
204.4
स्त्रीभिर्माल्यैश्च गन्धैश्च भक्षैर्भोज्यैश्च पुष्कलैः
पानैश्च विविधैर्हृद्यैः परां प्रीतिमवापतुः
Stribhirmalyaishcha gandhaishcha bhakshairbhojyaishcha pushkalaih
Panaishcha vividhairhridyaih param pritimavapatuh
204.5
अन्तःपुरे वनोद्याने पर्वतोपवनेषु च
यथेप्सितेषु देशेषु विजह्रातेऽमराविव
Antahpure vanodyane parvatopavaneshu cha
Yathepsiteshu desheshu vijahratemaraviva
204.6
ततः कदाचिद्विन्ध्यस्य पृष्ठे समशिलातले
पुष्पिताग्रेषु शालेषु विहारमभिजग्मतुः
Tatah kadachidvindhyasya prishthe samashilatale
Pushpitagreshu shaleshu viharamabhijagmatuh
204.7
दिव्येषु सर्वकामेषु समानीतेषु तत्र तौ
वरासनेषु संहृष्टौ सह स्त्रीभिर्निषेदतुः
Divyeshu sarvakameshu samaniteshu tatra tau
Varasaneshu sanhrishtau saha stribhirnishedatuh
204.8
ततो वादित्रनृत्ताभ्यामुपातिष्ठन्त तौ स्त्रियः
गीतैश्च स्तुतिसंयुक्तैः प्रीत्यर्थमुपजग्मिरे
Tato vaditranrittabhyamupatishthanta tau striyah
Gitaishcha stutisanyuktaih prityarthamupajagmire
204.9
ततस्तिलोत्तमा तत्र वने पुष्पाणि चिन्वती
वेषमाक्षिप्तमाधाय रक्तेनैकेन वाससा
Tatastilottama tatra vane pushpani chinvati
Veshamakshiptamadhaya raktenaikena vasasa
204.10
नदीतीरेषु जातान्सा कर्णिकारान्विचिन्वती
शनैर्जगाम तं देशं यत्रास्तां तौ महासुरौ
Naditireshu jatansa karnikaranvichinvati
Shanairjagama tam desham yatrastam tau mahasurau
204.11
तौ तु पीत्वा वरं पानं मदरक्तान्तलोचनौ
दृष्ट्वैव तां वरारोहां व्यथितौ संबभूवतुः
Tau tu pitva varam panam madaraktantalochanau
Drishtvaiva tam vararoham vyathitau sambabhuvatuh
204.12
तावुत्पत्यासनं हित्वा जग्मतुर्यत्र सा स्थिता
उभौ च कामसंमत्तावुभौ प्रार्थयतश्च ताम्
Tavutpatyasanam hitva jagmaturyatra sa sthita
Ubhau cha kamasammattavubhau prarthayatashcha tam
204.13
दक्षिणे तां करे सुभ्रूं सुन्दो जग्राह पाणिना
उपसुन्दोऽपि जग्राह वामे पाणौ तिलोत्तमाम्
Dakshine tam kare subhrum sundo jagraha panina
Upasundopi jagraha vame panau tilottamam
204.14
वरप्रदानमत्तौ तावौरसेन बलेन च
धनरत्नमदाभ्यां च सुरापानमदेन च
Varapradanamattau tavaurasena balena cha
Dhanaratnamadabhyam cha surapanamadena cha
204.15
सर्वैरेतैर्मदैर्मत्तावन्योन्यं भ्रुकुटीकृतौ
मदकामसमाविष्टौ परस्परमथोचतुः
Sarvairetairmadairmattavanyonyam bhrukutikritau
Madakamasamavishtau parasparamathochatuh
204.16
मम भार्या तव गुरुरिति सुन्दोऽभ्यभाषत
मम भार्या तव वधूरुपसुन्दोऽभ्यभाषत
Mama bharya tava gururiti sundobhyabhashata
Mama bharya tava vadhurupasundobhyabhashata
204.17
नैषा तव ममैषेति तत्र तौ मन्युराविशत्
तस्या हेतोर्गदे भीमे तावुभावप्यगृह्णताम्
Naisha tava mamaisheti tatra tau manyuravishat
Tasya hetorgade bhime tavubhavapyagrihnatam
204.18
तौ प्रगृह्य गदे भीमे तस्याः कामेन मोहितौ
अहं पूर्वमहं पूर्वमित्यन्योन्यं निजघ्नतुः
Tau pragrihya gade bhime tasyah kamena mohitau
Aham purvamaham purvamityanyonyam nijaghnatuh
204.19
तौ गदाभिहतौ भीमौ पेततुर्धरणीतले
रुधिरेणावलिप्ताङ्गौ द्वाविवार्कौ नभश्च्युतौ
Tau gadabhihatau bhimau petaturdharanitale
Rudhirenavaliptangau dvavivarkau nabhashchyutau
204.20
ततस्ता विद्रुता नार्यः स च दैत्यगणस्तदा
पातालमगमत्सर्वो विषादभयकम्पितः
Tatasta vidruta naryah sa cha daityaganastada
Patalamagamatsarvo vishadabhayakampitah
204.21
ततः पितामहस्तत्र सह देवैर्महर्षिभिः
आजगाम विशुद्धात्मा पूजयिष्यंस्तिलोत्तमाम्
Tatah pitamahastatra saha devairmaharshibhih
Ajagama vishuddhatma pujayishyanstilottamam
204.22
वरेण छन्दिता सा तु ब्रह्मणा प्रीतिमेव ह
वरयामास तत्रैनां प्रीतः प्राह पितामहः
Varena chhandita sa tu brahmana pritimeva ha
Varayamasa tatrainam pritah praha pitamahah
204.23
आदित्यचरिताँल्लोकान्विचरिष्यसि भामिनि
तेजसा च सुदृष्टां त्वां न करिष्यति कश्चन
Adityacharitanllokanvicharishyasi bhamini
Tejasa cha sudrishtam tvam na karishyati kashchana
204.24
एवं तस्यै वरं दत्त्वा सर्वलोकपितामहः
इन्द्रे त्रैलोक्यमाधाय ब्रह्मलोकं गतः प्रभुः
Evam tasyai varam dattva sarvalokapitamahah
Indre trailokyamadhaya brahmalokam gatah prabhuh
204.25
एवं तौ सहितौ भूत्वा सर्वार्थेष्वेकनिश्चयौ
तिलोत्तमार्थे संक्रुद्धावन्योन्यमभिजघ्नतुः
Evam tau sahitau bhutva sarvartheshvekanishchayau
Tilottamarthe sankruddhavanyonyamabhijaghnatuh
204.26
तस्माद्ब्रवीमि वः स्नेहात्सर्वान्भरतसत्तमान्
यथा वो नात्र भेदः स्यात्सर्वेषां द्रौपदीकृते
तथा कुरुत भद्रं वो मम चेत्प्रियमिच्छथ
Tasmadbravimi vah snehatsarvanbharatasattaman
Yatha vo natra bhedah syatsarvesham draupadikrite
Tatha kuruta bhadram vo mama chetpriyamichchhatha
204.27
वैशंपायन उवाच
एवमुक्ता महात्मानो नारदेन महर्षिणा
समयं चक्रिरे राजंस्तेऽन्योन्येन समागताः
समक्षं तस्य देवर्षेर्नारदस्यामितौजसः
Vaishampayana uvacha
Evamukta mahatmano naradena maharshina
Samayam chakrire rajanstenyonyena samagatah
Samaksham tasya devarshernaradasyamitaujasah
204.28
द्रौपद्या नः सहासीनमन्योऽन्यं योऽभिदर्शयेत्
स नो द्वादश वर्षाणि ब्रह्मचारी वने वसेत्
Draupadya nah sahasinamanyonyam yobhidarshayet
Sa no dvadasha varshani brahmachari vane vaset
204.29
कृते तु समये तस्मिन्पाण्डवैर्धर्मचारिभिः
नारदोऽप्यगमत्प्रीत इष्टं देशं महामुनिः
Krite tu samaye tasminpandavairdharmacharibhih
Naradopyagamatprita ishtam desham mahamunih
204.30
एवं तैः समयः पूर्वं कृतो नारदचोदितैः
न चाभिद्यन्त ते सार्वे तदान्योन्येन भारत
Evam taih samayah purvam krito naradachoditaih
Na chabhidyanta te sarve tadanyonyena bharata