Utshovঅধ্যায় 205
205.1
বৈশংপায়ন উবাচ
এবং তে সময়ং কৃত্বা ন্যবসংস্তত্র পাণ্ডবাঃ
বশে শস্ত্রপ্রতাপেন কুর্বন্তোঽন্যান্মহীক্ষিতঃ
205.2
তেষাং মনুজসিংহানাং পঞ্চানামমিতৌজসাম্
বভূব কৃষ্ণা সর্বেষাং পার্থানাং বশবর্তিনী
205.3
তে তয়া তৈশ্চ সা বীরৈঃ পতিভিঃ সহ পঞ্চভিঃ
বভূব পরমপ্রীতা নাগৈরিব সরস্বতী
205.4
বর্তমানেষু ধর্মেণ পাণ্ডবেষু মহাত্মসু
ব্যবর্ধন্কুরবঃ সর্বে হীনদোষাঃ সুখান্বিতাঃ
205.5
অথ দীর্ঘেণ কালেন ব্রাহ্মণস্য বিশাং পতে
কস্যচিত্তস্করাঃ কেচিজ্জহ্রুর্গা নৃপসত্তম
205.6
হ্রিয়মাণে ধনে তস্মিন্ব্রাহ্মণঃ ক্রোধমূর্চ্ছিতঃ
আগম্য খাণ্ডবপ্রস্থমুদক্রোশত পাণ্ডবান্
205.7
হ্রিয়তে গোধনং ক্ষুদ্রৈর্নৃশংসৈরকৃতাত্মভিঃ
প্রসহ্য বোঽস্মাদ্বিষয়াদভিধাবত পাণ্ডবাঃ
205.8
ব্রাহ্মণস্য প্রমত্তস্য হবির্ধ্বাঙ্ক্ষৈর্বিলুপ্যতে
শার্দূলস্য গুহাং শূন্যাং নীচঃ ক্রোষ্টাভিমর্শতি
205.9
ব্রাহ্মণস্বে হৃতে চোরৈর্ধর্মার্থে চ বিলোপিতে
রোরূয়মাণে চ ময়ি ক্রিয়তামস্ত্রধারণম্
205.10
রোরূয়মাণস্যাভ্যাশে তস্য বিপ্রস্য পাণ্ডবঃ
তানি বাক্যানি শুশ্রাব কুন্তীপুত্রো ধনংজয়ঃ
205.11
শ্রুত্বা চৈব মহাবাহুর্মা ভৈরিত্যাহ তং দ্বিজম্
আয়ুধানি চ যত্রাসন্পাণ্ডবানাং মহাত্মনাম্
কৃষ্ণয়া সহ তত্রাসীদ্ধর্মরাজো যুধিষ্ঠিরঃ
205.12
স প্রবেশায় চাশক্তো গমনায় চ পাণ্ডবঃ
তস্য চার্তস্য তৈর্বাক্যৈশ্চোদ্যমানঃ পুনঃ পুনঃ
আক্রন্দে তত্র কৌন্তেয়শ্চিন্তয়ামাস দুঃখিতঃ
205.13
হ্রিয়মাণে ধনে তস্মিন্ব্রাহ্মণস্য তপস্বিনঃ
অশ্রুপ্রমার্জনং তস্য কর্তব্যমিতি নিশ্চিতঃ
205.14
উপপ্রেক্ষণজোঽধর্মঃ সুমহান্স্যান্মহীপতেঃ
যদ্যস্য রুদতো দ্বারি ন করোম্যদ্য রক্ষণম্
205.15
অনাস্তিক্যং চ সর্বেষামস্মাকমপি রক্ষণে
প্রতিতিষ্ঠেত লোকেঽস্মিন্নধর্মশ্চৈব নো ভবেৎ
205.16
অনাপৃচ্ছ্য চ রাজানং গতে ময়ি ন সংশয়ঃ
অজাতশত্রোর্নৃপতের্মম চৈবাপ্রিয়ং ভবেৎ
205.17
অনুপ্রবেশে রাজ্ঞস্তু বনবাসো ভবেন্মম
অধর্মো বা মহানস্তু বনে বা মরণং মম
শরীরস্যাপি নাশেন ধর্ম এব বিশিষ্যতে
205.18
এবং বিনিশ্চিত্য ততঃ কুন্তীপুত্রো ধনংজয়ঃ
অনুপ্রবিশ্য রাজানমাপৃচ্ছ্য চ বিশাং পতে
205.19
ধনুরাদায় সংহৃষ্টো ব্রাহ্মণং প্রত্যভাষত
ব্রাহ্মণাগম্যতাং শীঘ্রং যাবত্পরধনৈষিণঃ
205.20
ন দূরে তে গতাঃ ক্ষুদ্রাস্তাবদ্গচ্ছামহে সহ
যাবদাবর্তয়াম্যদ্য চোরহস্তাদ্ধনং তব
205.21
সোঽনুসৃত্য মহাবাহুর্ধন্বী বর্মী রথী ধ্বজী
শরৈর্বিধ্বংসিতাংশ্চোরানবজিত্য চ তদ্ধনম্
205.22
ব্রাহ্মণস্য উপাহৃত্য যশঃ পীত্বা চ পাণ্ডবঃ
আজগাম পুরং বীরঃ সব্যসাচী পরংতপঃ
205.23
সোঽভিবাদ্য গুরূন্সর্বাংস্তৈশ্চাপি প্রতিনন্দিতঃ
ধর্মরাজমুবাচেদং ব্রতমাদিশ্যতাং মম
205.24
সময়ঃ সমতিক্রান্তো ভবত্সংদর্শনান্ময়া
বনবাসং গমিষ্যামি সময়ো হ্যেষ নঃ কৃতঃ
205.25
ইত্যুক্তো ধর্মরাজস্তু সহসা বাক্যমপ্রিয়ম্
কথমিত্যব্রবীদ্বাচা শোকার্তঃ সজ্জমানয়া
যুধিষ্ঠিরো গুডাকেশং ভ্রাতা ভ্রাতরমচ্যুতম্
205.26
প্রমাণমস্মি যদি তে মত্তঃ শৃণু বচোঽনঘ
অনুপ্রবেশে যদ্বীর কৃতবাংস্ত্বং মমাপ্রিয়ম্
সর্বং তদনুজানামি ব্যলীকং ন চ মে হৃদি
205.27
গুরোরনুপ্রবেশো হি নোপঘাতো যবীয়সঃ
যবীয়সোঽনুপ্রবেশো জ্যেষ্ঠস্য বিধিলোপকঃ
205.28
নিবর্তস্ব মহাবাহো কুরুষ্ব বচনং মম
ন হি তে ধর্মলোপোঽস্তি ন চ মে ধর্ষণা কৃতা
205.29
অর্জুন উবাচ
ন ব্যাজেন চরেদ্ধর্মমিতি মে ভবতঃ শ্রুতম্
ন সত্যাদ্বিচলিষ্যামি সত্যেনায়ুধমালভে
205.30
বৈশংপায়ন উবাচ
সোঽভ্যনুজ্ঞাপ্য রাজানং ব্রহ্মচর্যায় দীক্ষিতঃ
বনে দ্বাদশ বর্ষাণি বাসায়োপজগাম হ